ព័ត៌មានជាតិ

ក្រសួងបរិស្ថាន ប្រគល់បណ្ណសរសើរជូនក្រុមហ៊ុន សាមសុង ក្នុងកម្មវិធីលើកទឹកចិត្តប្រតិបត្តិមេត្រីបរិស្ថាន

បានផុស

៣ years មុន

នៅ

ថ្ងៃសុក្រ ២៧ តុលា ២០២៣

ដោយ

ក្រុមហ៊ុន សាមសុងអេឡិចត្រូនិក ប្រចាំប្រទេសកម្ពុជា បានទទួលនូវបណ្ណសរសើរពីក្រសួងបរិស្ថាន ក្នុងកម្មវិធី “លើកទឹកចិត្តប្រតិបត្តិមេត្រីបរិស្ថាន និងប្រកាសជ័យលាភី ឃុំ-សង្កាត់ ដែលបានចូលរួមចលនាប្រឡងប្រណាំង “ភូមិ ឃុំ-សង្កាត់មានសុវត្ថិភាព” ដែលរៀបចំដោយ អគ្គនាយកដ្ឋានចំណេះដឹងនិងព័ត៌មានបរិស្ថាន នៃក្រសួងបរិស្ថាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្មវិធីនេះបានប្រារព្ធឡើងកាលពីថ្ងៃទី ២៦ ខែតុលា ឆ្នាំ ២០២៣ នៅទីស្ដីការក្រសួងបរិស្ថាន ដោយមានការចូលរួមក្រោមអធិបតីភាព ឯកឧត្ដមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន និង ឯកឧត្ដម កែន សេរីរដ្ឋា អគ្គនាយក នៃអគ្គនាយកដ្ឋានចំណេះដឹង និងព័ត៌មានបរិស្ថាន ក្រសួងបរិស្ថាន ព្រមទាំងភ្ញៀវកិត្តិយសជាច្រើន។

ស្របពេលគ្នានេះដែរ ក្រសួងបរិស្ថាន ក៏បានធ្វើការប្រគល់នូវរង្វាន់ជ័យលាភីជូនដល់ភូមិ ឃុំ-សង្កាត់ ចំនួន ៥០ ដែលមានអនាម័យស្អាត, សោភ័ណភាពល្អ និងបរិស្ថានល្អផងដែរ។

“តំណាងក្រុមហ៊ុន សាមសុង សូមថ្លែងអំណរគុណយ៉ាងជ្រាលជ្រៅដល់ក្រសួងបរិស្ថានដែលបានប្រគល់នូវបណ្ណសរសើរមេត្រីបរិស្ថានក្នុងថ្ងៃនេះ។ ហើយក្រុមហ៊ុន សាមសុង ក៏នៅតែប្តេជ្ញាចិត្តក្នុងការដោះស្រាយបញ្ហាប្រឈមមុខនូវភាពលំបាកពីការប្រែប្រួលនៃអាកាសធាតុ (Climate Change) មួយនេះ។ យុទ្ធសាស្ត្រថ្មីរបស់យើង គឺទាក់ទងទៅនឹងនិរន្តរភាពបរិស្ថានដែលចាប់ផ្ដើមចេញពីថាមពលនៃភាពច្នៃប្រណិតបច្ចេកវិទ្យាលើគ្រប់ផលិតផលរបស់សាមសុង ចាប់ពីស្មាតហ្វូនរហូតដល់ឧបករណ៍ប្រើប្រាស់។ យើងបានដាក់បញ្ចូលនូវមុខងារដ៏ពិសេសដោយប្រើប្រាស់បច្ចេកវិទ្យាចុងក្រោយបង្អស់ ដើម្បីកាត់បន្ថយផលប៉ះពាល់ទៅដល់បរិស្ថាន។ នេះជាបញ្ហាប្រឈមដែលយើងត្រូវយកចិត្តទុកដាក់បំផុត យើងប្រើប្រាស់ធនធានទាំងអស់តាមលទ្ធភាពដែលអាចធ្វើទៅបាន។ យុទ្ធសាស្ត្រនិរន្តរភាពបរិស្ថាននេះ មិនមែនគ្រាន់តែជាចក្ខុវិស័យប៉ុណ្ណោះទេ ប៉ុន្តែវាក៏ជាការអំពាវនាវឱ្យធ្វើនូវសកម្មភាព ហើយយើងក៏កំពុងកំណត់គោលដៅ ដើម្បីសម្រេចបាននូវអព្យាក្រឹតភាពលើគុណតម្លៃទាំងមូលក្នុងឆ្នាំ ២០៥០”។

ឯកឧត្ដមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ក៏បានមានប្រសាសន៍បន្ថែមផងដែរថា “តំណាងឱ្យរាជរដ្ឋាភិបាលពិតជាសូមកោតសរសើរដល់ក្រុមហ៊ុន សាមសុង ចំពោះការខិតខំប្រឹងប្រែង និងយកចិត្តទុកដាក់លើបរិស្ថានពិភពលោក ក៏ដូចជាព្រះរាជាណាចក្រកម្ពុជាយើងផងដែរ ជាពិសេសការជួយកាត់បន្ថយនូវសំរាមអេឡិចត្រូនិក និងអនុវត្តកិច្ចការងារដើម្បីកាត់បន្ថយនូវឧស្ម័នកាបូន”។

សូមបញ្ជាក់ថា គ្រប់ផលិតផលរបស់ក្រុមហ៊ុន សាមសុង មិនថាជាទូរទស្សន៍, ទូរទឹកកក, ម៉ាស៊ីនបោក ខោអាវ ឬទូរស័ព្ទនោះទេ គឺត្រូវបានផលិតឡើងដោយគិតគូរពីបរិស្ថានខ្លាំងបំផុត។ ក្រុមហ៊ុន សាមសុង ពិតជាមានសេចក្តីសោមនស្សរីករាយជាខ្លាំងដែលបានក្លាយជាចំណែកមួយក្នុងការ អភិវឌ្ឍប្រទេសកម្ពុជា ដើម្បីអនាគតអ្នកជំនាន់ក្រោយកាន់តែល្អប្រសើរ ក្រោមកម្មវិធី “និរន្តរភាព បរិស្ថាន”។

សូមរំលឹកផងដែរថា ក្រុមហ៊ុន សាមសុង ក៏នៅតែបន្តធ្វើគ្រប់យុទ្ធនាការ ដើម្បីធ្វើយ៉ាងណាឱ្យ ទីក្រុងប៊ូសាន នៃប្រទេសកូរ៉េ ក្លាយជាម្ចាស់ទីតាំងនៃព្រឹត្តិការណ៍ពិព័រណ៍ពិភពលោក World Expo ២០៣០។

សម្រាប់ព័ត៌មានលម្អិតបន្ថែម សូមអញ្ជើញមកទស្សនាផលិតផលដោយផ្ទាល់ ឬតេស្តដោយផ្ទាល់ដៃនៅតាមហាងទំនើបចែកចាយផលិតផល សាមសុង ទាំងអស់ដែលនៅជិតលោកអ្នកបំផុតទូទាំងប្រទេស ឬក៏អាចចូលទៅកាន់ Facebook: SamsungCambodia, IG: samsungcambodia, TikTok: samsungcambodia ឬ ក៏អាចធ្វើការទំនាក់ទំនងទៅកាន់ផ្នែកសេវាបម្រើអតិថិជន ២៤/៧ ឥតគិតថ្លៃតាមរយៈទូរស័ព្ទលេខ ៖ ១៨០០-២០ ៣២ ៣២!៕