មន្ត្រីល្អ ត្រូវខិតខំសិក្សារៀនសូត្រ ដុសខាត់ចំណេះដឹង មានសមត្ថភាពគ្រប់គ្រាន់

ក្នុងគោលបំណងដាស់តឿនក្រើនរំលឹកដល់មន្ត្រីនៅថ្នាក់មូលដ្ឋាន លោក កើត ឆែ អភិបាលរងរាជធានីភ្នំពេញ តំណាង លោក ឃួង ស្រេង អភិបាលរាជធានីភ្នំពេញ បានថ្លែងថា ធ្វើជាមន្ត្រីបម្រើប្រជាពលរដ្ឋ មិនត្រូវអនុវត្តផ្ទុយពីគោលបំណង និងឆន្ទៈដើមរបស់ខ្លួនដែលដាក់ចិត្តដាក់កាយបម្រើប្រជាពលរដ្ឋ ក្នុងនាមជាមន្ត្រីនៅមូលដ្ឋានឡើយ។ ដើម្បីក្លាយជាមន្ត្រីល្អត្រូវ ខិតខំសិក្សារៀនសូត្រ ដុសខាត់ចំណេះដឹង ឱ្យមានសមត្ថភាពគ្រប់គ្រាន់ នោះទើបជាមន្ត្រីដែលមានគុណភាព។

លោក កើត ឆែ មានប្រសាសន៍ដូច្នេះ ក្នុងវគ្គបណ្តុះបណ្តាល ស្តីពី ការដោះស្រាយវិវាទក្រៅប្រព័ន្ធតុលាការ នាព្រឹកថ្ងៃទី១ ខែវិច្ឆិកា នេះ នៅសាលារាជធានីភ្នំពេញ។​​​

លោក កើត ឆែ មានប្រសាសន៍បន្តថា កាំបិតកាន់តែសំលៀង កាន់តែមុត តែវាក៏សឹកដែកច្រើនដែរ នៅពេលយើងប្រើខុសគោលបំណង។ អស់លោក លោកស្រី ចំណាយពេលមកចូលរួមវគ្គ បណ្តុះបណ្តាលការដោះស្រាយវិវាទក្រៅប្រព័ន្ធតុលា គឺជាការចូលរួមអនុវត្តលើកកម្ពស់ការអនុវត្តច្បាប់ក្រៅប្រពន្ធ័តុលាការ ដើម្បីសុខដុមនីកម្មក្នុងសង្គម គឺប្រជាពលរដ្ឋឈ្នះទាំងអស់គ្នា។

វគ្គបណ្តុះបណ្តាលដោះស្រាយវិវាទក្រៅប្រពន្ធ័តុលាការនេះ គឺស្ថិតលើទិដ្ឋភាពដែលពាក់ពន្ធ័នឹងការពង្រឹងការងាររដ្ឋបាល និងការផ្តល់សេវាសាធារណៈ និងសូមកោតសរសើរចំពោះការសម្របសម្រួលជ្រើសរើសប្រធានបទ៖ ការដោះស្រាយវិវាទក្រៅប្រពន្ធ័តុលាការ ដែលជាវិធានការអាទិភាព នៃយុទ្ធសាស្ត្របញ្ចកោណ ដំណាក់កាលទី១ នៃរាជរដ្ឋាភិបាលអាណត្តិទី៧។

គួរបញ្ជាក់ថា កាលពីថ្ងៃទី២៧ ខែតុលា ឆ្នាំ២០២៣ គណៈរដ្ឋមន្ត្រីបាន អនុម័តនូវ សេចក្តីព្រាងព្រះរាជក្រឹត្យ ស្តីពី ការបង្កើតការរៀបចំ និងកិច្ចដំណើរការ អាជ្ញាធរជាតិដោះស្រាយវិវាទក្រៅប្រព័ន្ធតុលាការ។ ការដោះស្រាយវិវាទក្រៅប្រព័ន្ធតុលាការ គឺបានឆ្លើយតបទៅនឹងគោលបំណងជាមូលដ្ឋាននោះគឺ ការចំណេញពេលវេលា និងថវិកាក្នុងការដោះស្រាយវិវាទ និងការធានានូវសុខដុមនីយកម្មក្នុងសង្គម៕

អត្ថបទ៖ ស្រីរ័ត្ន