ព័ត៌មានជាតិ

តំណាងលោក ហ៊ុន ម៉ាណែត ប្រកាសទទួលស្គាល់សមាសភាពក្រុមជំនួយការផ្នែករាជធានី-ខេត្តនៃយុវជន CPP ថ្នាក់កណ្តាល ១៦២នាក់

បានផុស

៥ years មុន

នៅ

ថ្ងៃអាទិត្យ ៧ កុម្ភៈ ២០២១

ដោយ

ភ្នំពេញ ៖ លោក ហេង សួរ សមាជិកគណៈកម្មាធិការកណ្ដាល និងជាប្រធានផ្នែករាជធានី-ខេត្ត នៃយុវជនគណបក្សប្រជាជនកម្ពុជាថ្នាក់កណ្ដាល និងជាតំណាងលោក ហ៊ុន ម៉ាណែត សមាជិកអចិន្ត្រៃយ៍គណៈកម្មាធិការកណ្ដាល និងជាប្រធានយុវជនគណបក្សប្រជាជនកម្ពុជាថ្នាក់កណ្ដាល កាលពីរសៀលថ្ងៃទី០៦ ខែកុម្ភៈ ឆ្នាំ២០២១បានប្រកាសទទួលស្គាល់សមាសភាពក្រុមជំនួយការផ្នែករាជធានី-ខេត្ត នៃយុវជនគណបក្សប្រជាជនកម្ពុជាថ្នាក់កណ្ដាលចំនួន ១៦២នាក់ នៅគណៈកម្មាធិការគណបក្សប្រជាជនកម្ពុជារាជធានីភ្នំពេញ។

លោក ហេង សួរ បានផ្តាំផ្ញើការសួរសុខទុក្ខទៅដល់សមាជិក-សមាជិកាពីសំណាក់លោក ហ៊ុន ម៉ាណែត ដែលជានិច្ចកាលតែងតែគិតគូយកចិត្តទុកដាក់ដល់សមាជិក-សមាជិកាទាំងអស់ ដែលបង្ហាញពីកម្លាំងសាមគ្គីជាធ្លុងមួយក្នុងការចូលរួមយ៉ាងសស្រាក់សស្រាំ ក្នុងបុព្វហេតុកសាងសង្គមជាតិ។

លោក ហេង សួរ បានសម្ដែងនូវក្តីសប្បាយរីករាយ និងកោតសរសើរចំពោះក្រុមជំនួយការផែ្នករាជធានី-ខេត្ត នៃយុវជនគណបក្សប្រជាជាជនកម្ពុជាថ្នាក់កណ្តាល ដែលតែងតែបានចូលរួមឧបត្ថម្ភគាំទ្រដល់សកម្មភាពការងារសង្គមនាពេលកន្លងមក ជាពិសេសតាមរយៈការចូលរួមចំណែកបរិច្ចាគថវិកាជួយដល់ប្រជាពលរដ្ឋរងគ្រោះដោយសារគ្រោះធម្មជាតិ និងការចូលរួមជាមួយរាជរដ្ឋាភិបាលក្នុងការទិញវ៉ាក់សាំងចាក់ការពារជំងឺកូវីដ១៩ ជាដើម។

លោកបានមានប្រសាសន៍ថា បេសកកម្មរបស់យុវជនគណបក្សប្រជាជនកម្ពុជាថ្នាក់កណ្តាល គឺដើម្បីចូលរួមចំណែកជួយប្រជាជន និងប្រទេសជាតិឱ្យកាន់តែរីកចម្រើនថែមទៀត ស្របតាមកម្មវិធីនយោបាយរបស់គណបក្ស ដែលយុវជនជាសសរទ្រូងនៃប្រទេសជាតិ។

លោកបានបន្តថា «យុវជនគណបក្សប្រជាជនកម្ពុជាថ្នាក់កណ្តាលអាចសម្រេចកិច្ចការដ៏មានសារៈសំខាន់នេះបាន គឺអាស្រ័យការចូលរួមយ៉ាងសកម្មពីក្រុមជំនួយការគ្រប់ផ្នែក ជាពិសេសក្រុមជំនួយការផ្នែករាជធានី-ខេត្ត ដែលត្រូវដើរតួនាទីយ៉ាងសកម្មក្នុងការសម្របសម្រួលជាមួយផ្នែកពាក់ព័ន្ធផ្សេងទៀត និងក្រុមការងារយុវជនគណបក្សប្រជាជនកម្ពុជារាជធានី-ខេត្ត»។

លោកបានជម្រាបជូនអំពីរចនាសម្ព័ន្ធ តួនាទី ភារកិច្ច របៀបរបបធ្វើការរបស់ក្រុមជំនាញចំណុះផ្នែករាជធានី-ខេត្ត ការចាត់តាំងក្រុមជំនាញចំណុះផ្នែករាជធានី-ខេត្ត និងគោលការណ៍នានារបស់គណបក្ស ព្រមទាំងបានផ្សព្វផ្សាយអំពីវឌ្ឍនភាពក្នុងការខិតខំរៀបចំនូវប្រព័ន្ធការងារមួយ ដែលអាចធានាបាននូវប្រសិទ្ធភាពខ្ពស់ សម្រាប់ការចូលរួមសហការក្នុងការអនុវត្តការងារពីបណ្តាផ្នែកផ្សេងទៀត ជាពិសេសការត្រៀមអនុវត្តផែនការសកម្មភាពក្រុមការងារយុវជនគណបក្សរាជធានី-ខេត្ត ឆ្នាំ២០២១ ដែលនឹងក្លាយជាផែនទីចង្អុលផ្លូវ ដើម្បីយកទៅអនុវត្តឱ្យស្របតាមសូចនាករដែលបានកំណត់ ប្រកបដោយប្រសិទ្ធភាព និងអាចសម្រេចបានតាមផែនការដែលគណបក្សបានកំណត់ ក៏ដូចជាតាមគោលការណ៍ណែនាំរបស់ ប្រធានយុវជនគណបក្សប្រជាជនកម្ពុជាថ្នាក់កណ្ដាល៕

ដោយ ៖ សំអឿន