ប្រឡង​មន្រ្តីកសិកម្ម​​នៅ​ថ្ងៃនេះ រដ្ឋមន្ត្រីក្រសួងមុខងារ​សាធារណៈ ចុះដល់ទីតាំងប្រឡង​នៅ​សាកលវិទ្យាល័យភូមិន្ទភ្នំពេញ

ឯកឧត្តម ហ៊ុន ម៉ានី រដ្ឋមន្ត្រីក្រសួងមុខងារសាធារណៈនិងជាប្រធានគណៈកម្មការរៀបចំការប្រឡង បានចុះពិនិត្យសកម្មភាព​​តាក់តែងវិញ្ញាសារបស់គណៈមេប្រយោគនៃគណៈកម្មការរៀបចំការប្រឡងប្រជែងជ្រើសរើសមន្ត្រីកសិកម្មឃុំ ឆ្នាំ២០២៣ នាព្រឹកថ្ងៃទី១៧ ខែធ្នូ ឆ្នាំ២០២៣ នាមណ្ឌលប្រឡងស្ថិតក្នុងសាកលវិទ្យាល័យភូមិន្ទភ្នំពេញ។

ខណៈគណៈកម្មការមេប្រយោគកំពុងដំណើរការរៀបចំ និងតាក់តែងវិញ្ញាសាសម្រាប់បេក្ខជនប្រឡងប្រជែងជ្រើសរើសមន្ត្រីកសិកម្មឃុំ ឆ្នាំ២០២៣ យ៉ាងសស្រាក់សស្រាំដោយសម្ងាត់ពីសាស្ត្រចារ្យនិងមន្ត្រីជំនាញចម្រុះ និងដោយមានការតាមដានមើលពីអ្នកសង្កេតការមកពីតំណាងអង្គភាពប្រឆាំងអំពើពុករលួយ សហភាពសហព័ន្ធយុវជនកម្ពុជា តំណាងសាកលវិទ្យាល័យនានានិងសាធារណជនដែលបានចុះឈ្មោះ។

សូមបញ្ជាក់ថា វិញ្ញាសាកំពុងតាក់តែងមានចំនួន៣ រួមមាន៖ ១.វិញ្ញាសាជំនាញកសិកម្ម ២.វិញ្ញាសាភាសាអង់គ្លេស និង​៣.វិញ្ញាសាពហុចម្លើយ។ ការរៀបចំវិញ្ញាសា និងអនុវត្តវិញ្ញាសានឹងត្រូវចាត់ចែងក្នុងថ្ងៃតែមួយ ដោយការរៀបចំវិញ្ញាសានឹងត្រូវធ្វើនៅពេលព្រឹកហើយការចាប់ផ្តើមប្រឡងនឹងត្រូវធ្វើចាប់ពីថ្ងៃត្រង់ម៉ោង ១២៖០០ តទៅ។