កម្មវិធីធំ ៣ រៀបចំក្នុងពេល​តែមួយ​ថ្ងៃ​ឆ្លង​ឆ្នាំនៅ​បាត់ដំបង

ទូកយ៉ាងច្រើនត្រូវ​បាន​យក​មកតម្កល់​នៅ​មាត់ស្ទឹងសង្កែ ត្រៀមប្រកួតនាថ្ងៃខាងមុខនេះ ខណៈ​ដែលខេត្តបាត់ដំបង​មានរៀបចំកម្មវិធី​ជាច្រើនដើម្បី​ចូលរួមអបអរសាទរ​ថ្ងៃ​ឆ្លង​ឆ្នាំ​សកល​ ២០២៤។

លោក ហម អរុណ អនុប្រធាននៃមន្ទីរទេសចរណ៍ខេត្តបាត់ដំបង​បានបញ្ជាក់ថា នា​ឱកាស​អបអរ​​បុណ្យឆ្លង​ឆ្នាំ​សាកល​ អាជ្ញាធរ​ខេត្ត​បាន​រៀបចំកម្មវិធីជាច្រើន​សម្រាប់ទាក់ទាញ​ទេសចរ។ ក្រៅ​ពី​មានការប្រណាំទូក ក៏​នឹង​មាន​រៀបចំតាំងពិព័រណ៌ម្ហូបអាហារដ៏ធំជាងឆ្នាំមុនៗ ក្នុងគោលបំណងឆ្លើយតបនិងអបអរសាទរការដាក់បញ្ចូលក្រុងបាត់ដំបង ជាសមាជិកបណ្តាញទីក្រុងច្នៃប្រតិដ្ឋរបស់អង្គការយូនេស្កូលើវិស័យម្ហូបអាហារ(Gastronomy)។

បន្ថែមពីនេះ ក៏​មានការ​តាំង​បង្ហាញ​​ផលិតផល​ភូមិ​មួយផលិតផល​មួយ​មកពី​បណ្តាស្រុក​ភូមិនានា​ដើម្បី​បង្ហាញសក្តានុពល​ខេត្ត​បាត់ដំបង។

ពាក់ព័ន្ធ​ការ​ឃើញមានទូកយ៉ាងច្រើនមកតម្កល់​តាម​មាត់ស្ទឹងសង្កែត្រៀមប្រកួតនាថ្ងៃខាងមុខនេះ មានមតិមហាជនក៏ដូចជាប្រជាពលរដ្ឋ ដែលមានវ័យចំណាស់ៗបានលើកឡើងដូចៗគ្នាជាចម្ងល់ថា ហេតុអ្វីមាន​ប្រណាំងទូក២ដង ក្នុងមួយឆ្នាំបែបនេះ? មន្រ្តីទេសចរណ៍​រូបនេះ​ពន្យល់​ថា សូមបងប្អូនប្រជាពលរដ្ឋកុំយល់ច្រឡំ នោះមិនមែនជាពិធីប្រណាំងទូកនោះទេ វាជាព្រឹត្តិការណ៍​កីឡាប្រណាំងទូកជាអន្តរជាតិ ដើម្បីជ្រើសរើសកីឡាករកម្ពុជាទៅប្រកួតជាអន្តរជាតិនៅក្រៅប្រទេស ដើម្បី​ដណ្តើម​ជយលាភីខ្នាតពិភពលោក ស្របពេលការ​រៀបចំអបអរសាទរថ្ងៃ​ឆ្លង​ឆ្នាំ​ខាង​មុខ​នេះ។

ការ​រៀបចំនេះដើម្បី​អបអរសាទរក្នុងការឆ្លងឆ្នាំសកលផង ដើម្បី​ផ្តល់ក្តីសប្បាយរីករាយដល់ប្រជាពលរដ្ឋទូទាំងខេត្តក៏ដូចជាមកពីតាមបណ្តាខេត្តចូលរួមទស្សនាកម្សាន្តជាមួយនិងការសម្តែងសិល្បះធំៗច្រើនប្រភេទ រួមនិងម្ហូបអាហារឆ្ងុយឆ្ងាញ់ពិសេសៗរាប់សិបមុខ ចាប់ផ្តើមពីថ្ងៃទី ២៩ រហូតដល់ថ្ងៃទី៣១ខែធ្នូខាងមុខនេះ ក្នុងរយះពេល ៣ ថ្ងៃ៕

អត្ថបទ៖ សៅ សារិទ្ធ