សម្ដេចនាយករដ្ឋមន្ត្រី បានបង្កើតក្រុមគ្រូពេទ្យចាំថែទាំព្រះរាជសុខភាពថ្វាយព្រះមហាក្សត្រ និងហ្លួងម៉ែ

សម្ដេចធិបតី នាយករដ្ឋមន្ត្រី បានសម្រេចចាត់តាំងលោករដ្ឋមន្ត្រីក្រសួងសុខាភិបាល អមដោយក្រុមវេជ្ជបណ្ឌិតជំនាញៗមួយចំនួនឱ្យប្រចាំការថែទាំព្រះរាជសុខភាពថ្វាយព្រះមហាក្សត្រនៃកម្ពុជា និងសម្ដេចព្រះវររាជមាតាជាតិខ្មែរ។

បើយោងតាមសេចក្ដីសម្រេចរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានសម្រេចបង្កើតក្រុមគ្រូពេទ្យថែទាំព្រះរាជសុខភាពថ្វាយព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល។

ក្រុមគ្រូពេទ្យថែទាំព្រះរាជសុខភាពថ្វាយព្រះមហាក្សត្រ និងសម្ដេចព្រះវររាជមាតាជាតិខ្មែរ គឺត្រូវបានដឹកនាំដោយលោក ឈាង រ៉ា រដ្ឋមន្ត្រីក្រសួងសុខាភិបាល លោក គង់ សន្យា អគ្គនាយកមន្ទីរពេទ្យកាល់ម៉ែត ជាអនុប្រធាន អមដោយវេជ្ជបណ្ឌិតជំនាញៗ ដូចជា លោក ឈួយ ម៉េង (វេជ្ជបណ្ឌិតប្រចាំការ) លោក ឡឹម តារា លោក សុខ ជូរ លោក ឱ វ៉ាន់ដា វេជ្ជបណ្ឌិត ង៉ែត ប៉ាធី (វេជ្ជបណ្ឌិតប្រចាំការ) និងវេជ្ជបណ្ឌិត ស៊ំ សត្ថា (វេជ្ជបណ្ឌិតប្រចាំការ)។

បើតាមសេចក្ដីសម្រេចដដែលនេះ គឺក្រុមគ្រូពេទ្យនេះ មានភារកិច្ចទទួលខុសត្រូវក្នុងការពិនិត្យ ពិគ្រោះយោបល់ ព្យាបាល និងថែទាំព្រះរាជសុខភាពថ្វាយព្រះករុណា ព្រះមហាក្សត្រនៃកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ។ ក្រុមគ្រូពេទ្យថែទាំព្រះរាជសុខភាព មានសិទ្ធិអញ្ជើញអ្នកជំនាញវេជ្ជសាស្ត្រ និងអមវេជ្ជសាស្ត្រនានាចូលរួមជួយការងារក្នុងករណីចាំបាច់បាន៕