ព័ត៌មានជាតិ

មណ្ឌលផ្តល់សេវាសាធារណៈថ្មីផ្សារទំនើបអ៊ីអនពង្រីកទីតាំងធំជាងមុន ផ្តល់សេវាច្រើនជាងមុន

បានផុស

២ years មុន

នៅ

ថ្ងៃសុក្រ ២៦ មករា ២០២៤

ដោយ

មណ្ឌលផ្តល់សេវាសាធារណៈនៅក្នុងផ្សារទំនើបអ៊ីអនម៉លភ្នំពេញ (Aeon1) បានផ្លាស់ប្តូរទីតាំងចាស់នៅជាន់ទី ១ ទៅទីតាំងថ្មីនៅជាន់ទី ៤ ដែលមានបរិវេណធំទូលាយជាងទីតាំងចាស់ ហើយបានបន្ថែមសេវាសាធារណៈចាំបាច់មួយចំនួនទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងពិធីសម្ពោធបើកឱ្យប្រើប្រាស់ជាផ្លូវការមណ្ឌលផ្តល់សេវាសាធារណៈទីតាំងថ្មីនៅក្នុងផ្សារទំនើបអ៊ីអនម៉លភ្នំពេញ (Aeon1) កាលពីម្សិលមិញនេះ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូនបានគូសបញ្ជាក់ មណ្ឌលផ្តល់សេវាសាធារណៈទីតាំងថ្មីនេះ គឺជាសមិទ្ធផលថ្មីមួយបន្ថែមទៀត និងជាយន្តការមួយក្នុងការបង្ខិតការផ្តល់សេវាសាធារណៈឱ្យបានកាន់តែជិតប្រជាពលរដ្ឋ បង្កលក្ខណៈងាយស្រួល ចំណេញពេលវេលា និងកាត់បន្ថយការចំណាយ ក៏ដូចជាបង្កើនប្រសិទ្ធភាព និង តម្លាភាពនៃការផ្តល់សេវាសាធារណៈរបស់ក្រសួង ជូនដល់ប្រជាពលរដ្ឋ ស្របតាមយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាលកម្ពុជា។

មណ្ឌលផ្ដល់សេវាសាធារណៈទីតាំងថ្មី មានបរិវេណធំទូលាយជាងទីតាំងចាស់ ហើយបានបន្ថែមសេវាសាធារណៈចាំបាច់មួយចំនួនទៀតដូចជា សេវាចុះបញ្ជីរថយន្តថ្មី សេវាផ្ទេរកម្មសិទ្ធិរថយន្ត និងការដាក់ពាក្យស្នើសុំត្រួតពិនិត្យលក្ខណៈបច្ចេកទេសយានជំនិះ កាន់តែផ្តល់ភាពងាយស្រួល និងស្របតាមកំណើននៃតម្រូវការរបស់បងប្អូនប្រជាពលរដ្ឋដែលជាអ្នកមកទទួលសេវា។

លោក លោក ប៉េង ពោធិ៍នា បានបន្ថែមថា ទីតាំងថ្មីនេះប្រើប្រាស់ប្រព័ន្ធបច្ចេកវិទ្យាឌីជីថលដើម្បីជួយសម្រួលដល់ការផ្តល់សេវាសាធារណៈប្រកបដោយតម្លាភាព ប្រសិទ្ធភាព និងគណនេយ្យភាព ដែលកំពុងដើរតួនាទីយ៉ាងសំខាន់ក្នុងការធ្វើកំណែទម្រង់និងការអភិវឌ្ឍសេដ្ឋកិច្ច-សង្គម ស្របតាមចក្ខុវិស័យ មាគ៌ានយោបាយ និង យុទ្ធសាស្ត្របញ្ចកោណរបស់រាជរដ្ឋាភិបាល អាណត្តិទី៧នេះ។

មណ្ឌលផ្តល់សេវាសាធារណៈរបស់ក្រសួងសាធារណការ និងដឹកជញ្ជូន បានបើកដំណើរការផ្តល់សេវាមានចំនួន ០៧ ទីតាំង៖

១. មណ្ឌលផ្តល់សេវាសាធារណៈ នៅផ្សារទំនើប អ៊ីអនម៉ល ភ្នំពេញ (Aeon I)
២. មណ្ឌលផ្ដល់សេវាសាធារណៈ ប្តូរនិងប្រឡងយកបណ្ណបើកបរយានយន្ត នៅផ្សារទំនើប អ៊ីអនម៉លសែនសុខ (Aeon II)
៣. មណ្ឌលផ្តល់សេវាសាធារណៈ នៅផ្សារទំនើប ជីបម៉ុង ណូរ៉ូម៉ល (ChipMong Noro Mall)
៤. មណ្ឌលផ្តល់សេវាសាធារណៈ នៅទីស្តីការក្រសួងសាធារណការ និងដឹកជញ្ជូន
៥. មណ្ឌលផ្ដល់សេវាសាធារណៈ នៅផ្សារទំនើប ហេរីថេកវ៉ក (The Heritage Walk) នៅខេត្តសៀមរាប
៦. មណ្ឌលផ្តល់សេវាសាធារណៈ នៅផ្សារទំនើបហ្វូរី ថាម សឃ្វែរ (Furi Times Square Mall) នៅខេត្តព្រះសីហនុ
៧. មណ្ឌលផ្តល់សេវាសាធារណៈនៅផ្សារទំនើប អ៊ីអនម៉ល មានជ័យ (Aeon III)៕