ក្រសួងសុខាភិបាល ពង្រឹងការថែទាំសុខភាពផ្លូវចិត្ត និងសុខភាពមាតា និងទារក

វេជ្ជបណ្ឌិត ហុក គឹមចេង អគ្គនាយកបច្ចេកទេសសុខាភិបាល បានអញ្ជើញចូលជាគណៈអធិបតីភាព បើកវគ្គបណ្តុះបណ្តាលកសាងសមត្ថភាព ស្តីពី ការផ្សារភ្ជាប់សុខភាពផ្លូវចិត្ត និងសុខភាពមាតា និងកុមារ ដែលប្រព្រឹត្តទៅនៅសណ្ឋាគារ កំពតស្វីតប៊ូទិក ខេត្តកំពត នេះថ្ងៃទី០១ ខែកុម្ភៈ ឆ្នាំ២០២៤។

វគ្គបណ្តុះបណ្តាលនេះ នឹងធ្វើឱ្យមន្រ្តីសុខាភិបាលដែលបម្រើការដល់ការគាំពារសុខភាពមាតា និងទារក បានយល់ដឹងអំពី ការប្រែប្រួលសុខភាពផ្លូវចិត្តលើស្ត្រីមានផ្ទៃពោះ និងការលូតលាស់ផ្លូវចិត្តរបស់កុមារ និងបង្កើនចំណេះរបស់មន្រ្តីសុខាភិបាលក្នុងការវាយតម្លៃសុខភាពផ្លូវចិត្តលើស្ត្រីមានផ្ទៃពោះ សុខភាពផ្លូវចិត្តស្ត្រីក្រោយការសម្រាលកូន បញ្ហាសុខភាពផ្លូវចិត្តរបស់កុមារ ដែលមន្រ្តីសុខាភិបាលត្រូវមានសមត្ថភាពរកឃើញឱ្យបានឆាប់ ដើម្បីមានសមត្ថភាពធ្វើអន្តរាគមន៍ឱ្យបានសមស្រប។

វេជ្ជបណ្ឌិត ហុក គឹមចេង មានប្រសាសន៍ថា មនុស្សគ្រប់រូបត្រូវមានសុខភាពផ្លូវចិត្តល្អ ដូចសុខភាពផ្លូវកាយដែរ យ៉ាងណាមិញសុខភាពផ្លូវចិត្តល្អរបស់មាតា និងកុមារ មានសារៈសំខាន់ណាស់ ក្នុងការថែទាំផ្ទៃពោះឱ្យបានល្អ និងការលូតលាស់របស់ទារក និងកុមារ ផងដែរ។ សុខភាពផ្លូវចិត្តមាននៅគ្រប់ទីកន្លែង (Mental health is everywhere) ដូច្នេះកិច្ចអន្តរាគមន៍សុខភាពផ្លូវចិត្តត្រូវការកិច្ចសហការប្រទាក់ក្រឡា ហើយការដាក់បញ្ចូលការថែទាំសុខភាពផ្លូវចិត្តទៅក្នុងកម្មវិធីជាតិគាំពារមាតា និងទារក នឹងនាំមកនូវការផ្តល់សេវាគាំពារមាតា និងទារក មានលក្ខណៈគ្រប់ជ្រុងជ្រោយទាំងផ្លូវកាយ និងផ្លូវចិត្ត។

ទន្ទឹមនឹងនេះ អគ្គនាយកបច្ចេកទេសសុខាភិបាល ខាងលើ បានលើកឡើងថា កិច្ចសហការរួមគ្នា រវាងនាយកដ្ឋានសុខភាពផ្លូវចិត្ត និងការបំពានគ្រឿងញៀន និងមជ្ឈមណ្ឌលជាតិគាំពារមាតា និងទារក នឹងជួយលើកកម្ពស់សុខភាពមាតា ទារក និងកុមារ ឱ្យកាន់តែប្រសើរឡើងថែមទៀត និងធ្វើឱ្យការគ្របដណ្តប់សុខភាពជាសកលកាន់តែមានភាពទូលំទូលាយថែមទៀតផងដែរ។

គួរបញ្ជាក់ថា វគ្គបណ្តុះបណ្តាលកសាងសមត្ថភាពនេះ មានការអញ្ជើញចូលរួមដោយ លោកវេជ្ជបណ្ឌិត ឈិត សុផល ប្រធាននាយកដ្ឋានសុខភាពផ្លូវចិត្ត និងការបំពានគ្រឿងញៀន តំណាងមជ្ឈមណ្ឌលជាតិគាំពារមាតា និងទារក តំណាងមន្ទីរសុខាភិបាល នៃរដ្ឋបាលខេត្តកំពត និងសិក្ខាកាមជាវេជ្ជបណ្ឌិត គ្រូពេទ្យ គិលានុបដ្ឋាក និងឆ្មប ដែលអញ្ជើញមកពី ២៥ រាជធានី ខេត្ត សរុបចំនួន ១២០រូប៕