តំណាងក្រសួងមហាផ្ទៃ ស្នើមន្ត្រីអន្តោប្រវេសន៍ទប់ស្កាត់ឱ្យបានការជ្រៀតចូលខុសច្បាប់របស់ជនបរទេស   

មន្ត្រីជាន់ខ្ពស់ក្រសួងមហាផ្ទៃ ជំរុញដល់ថ្នាក់ដឹកនាំ និងមន្ត្រីនៃអគ្គនាយកដ្ឋានអន្តោប្រវេសន៍ បង្កើនការយកចិត្តទុកដាក់ក្នុងការគ្រប់គ្រងចេញ-ចូលរបស់ជនបរទេសឱ្យបានហ្មត់ចត់ និងមានប្រសិទ្ធភាពថែមទៀត ពិសេសត្រូវទប់ស្កាត់ឱ្យបានការជ្រៀតចូលដោយខុសច្បាប់។

ឱកាសអញ្ជើញជាអធិបតីក្នុងពិធីបើកសន្និបាតត្រួតពិនិត្យលទ្ធផលការងារប្រចាំឆ្នាំរបស់អគ្គនាយកដ្ឋានអន្តោប្រវេសន៍ នារសៀលថ្ងៃទី១១ ខែមីនា ឆ្នាំ២០២៤ លោក​ គៀត​ ច័ន្ទថារិទ្ធ​ រដ្ឋលេខាធិការក្រសួងមហាផ្ទៃ​ បានលើកឡើងថា ការងារអន្តោប្រវេសន៍ គឺជាកិច្ចការដ៏សំខាន់មួយក្នុងចំណោមកិច្ចការសំខាន់ៗដទៃទៀតរបស់ជាតិ និងក្រសួងមហាផ្ទៃ ដែលការងារនេះមានការពាក់ព័ន្ធដោយផ្ទាល់ទៅនឹងការរក្សាសន្តិសុខជាតិ អធិបតេយ្យភាពជាតិ បូរណភាពទឹកដី សុវត្ថិភាព និងសណ្តាប់ធ្នាប់សង្គម ក៏ដូចជាការទាក់ទាញភ្ញៀវទេសចរ និងវិនិយោគិនបរទេស ដែលក្រសួងមហាផ្ទៃ មានភារកិច្ចទទួលខុសត្រូវទាំងស្រុងចំពោះមុខរាជរដ្ឋាភិបាល និងប្រជាជន។

ដូច្នេះ លោករដ្ឋលេខាធិការ គៀត​ ច័ន្ទថារិទ្ធ បានស្នើឱ្យមានការយកចិត្តទុកដាក់ក្នុងការគ្រប់គ្រងការចេញ-ចូលប្រទេសរបស់ជនបរទេសឱ្យបានហ្មត់ចត់ និងមានប្រសិទ្ធភាពថែមទៀត ទាំងការលើកកម្ពស់សមត្ថភាពគ្រប់គ្រងនៅតាមច្រកទ្វារគ្រប់ប្រភេទ និងការបង្ការ ទប់ស្កាត់មិនឱ្យមានការជ្រៀតចូលខុសច្បាប់ សំដៅធានាឆ្លើយតបបានទាំងសំណូមពរនៃការថែរក្សាសន្តិសុខជាតិ និងស្មារតីអនុវត្តច្បាប់ស្តីពីអន្តោប្រវេសន៍ រួមទាំងការអនុវត្តគោលនយោបាយវិនិយោគ និងទេសចរណ៍ជាតិ។  

ជាមួយគ្នានេះ នៅចំពោះមុខថ្នាក់ដឹកនាំ​ និងមន្ត្រីនៃអគ្គនាយកដ្ឋានអន្តោប្រវេសន៍ ក៏ដូចជានាយប៉ុស្តិ៍ច្រកទ្វារអន្តរជាតិទាំងអស់​ លោករដ្ឋលេខាធិការ ក៏បានស្នើឱ្យបង្កើនសកម្មភាពត្រួតពិនិត្យការចេញ-ចូល ឆ្លងកាត់ច្រកទ្វារអន្តរជាតិនានា ដើម្បីបង្ការទប់ស្កាត់ការជ្រៀតចូលរបស់មុខសញ្ញាភេរវកម្ម មុខសញ្ញាឧក្រិដ្ឋកម្មឆ្លងដែនគ្រប់ប្រភេទ និងមុខសញ្ញាល្មើសច្បាប់ផ្សេងៗទៀតផងដែរ៕