រំពឹង​បំបែកកំណត់ត្រានាំចេញប្រមាណ ២០០០ លានដុល្លារ ពីតំបន់​សេដ្ឋកិច្ច​ពិសេស​ភ្នំពេញ

បើតាមសេចក្តីប្រកាស​ព័ត៌មានពី​តំបន់​សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ (RGPPSEZ) រំពឹង​ថា ការនាំ​ចេញ​ទំនិញ​​ពីតំបន់​សេដ្ឋកិច្ចពិសេសរ៉ូយ៉ាល់ គ្រុប ​ភ្នំពេញនឹង​បំបែកកំណត់​ត្រាសរុប​​​ប្រមាណ ២០០០ លានដុល្លារអាមេរិក​ក្នុង​ឆ្នាំ ២០២៤ នេះ។

ចាប់តាំងពីការបង្កើតឡើងក្នុងឆ្នាំ ២០០៦ មក តំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ (RGPPSEZ) បានអភិវឌ្ឍនិង​បានផ្លាស់ប្តូរមុខមាត់ថ្មីនៃទឹកដីធ្លាប់តែជាវាលស្រែមានសកម្មភាពការងារដ៏តិចតួច មកជាតំបន់ឧស្សាហកម្មឈានមុខគេមួយ ដែលមានក្រុមហ៊ុនកម្មន្តសាលចំនួន ៨៥ ក្រុមហ៊ុន និងក្រុមហ៊ុនមិនមែនកម្មន្តសាលចំនួន ២៩ ក្រុមហ៊ុន និងផ្តល់ឱកាសការងារដល់ប្រជាជនខ្មែរដល់ទៅជាង ៤៣ ០០០ នាក់។

ប្រភព​ពី​តំបន់សេដ្ឋកិច្ចពិសេសរ៉ូយ៉ាល់ គ្រុប ភ្នំពេញ នៅដើមឆ្នាំ២០២៤ ក្រុមហ៊ុនមានការចាប់ផ្តើមមួយដ៏ល្អប្រសើរដោយការនាំចេញសរុបក្នុងខែមករា និងខែកុម្ភៈ មាន​តម្លៃ ២៦៤ លាន ដុល្លារអាមេរិក ខ្ពស់ជាងតួ​លេខ​ក្នុងរយៈពេលដូចគ្នាកាលពីឆ្នាំមុន។ ជាមួយគ្នានេះ ក៏​រំពឹងខ្ពស់​នៅក្នុងឆ្នាំ ២០២៤ នឹងអាច​បំបែកកំណត់ត្រាម្តងទៀត ដោយការនាំចេញសរុបបាន​ប្រមាណ ២០០០ លានដុល្លារអាមេរិក។

ដើម្បីបំពេញនូវតម្រូវការទីតាំងឧស្សាហកម្មដ៏មានគុណភាពខ្ពស់នៅ​ជុំវិញរាជធានីភ្នំពេញ ក្រុមហ៊ុនកំពុងដំណើរការស្នើសុំបង្កើតតំបន់សេដ្ឋកិច្ចពិសេស រ៉ូយ៉ាល់ គ្រុប កណ្តាល ឬ Royal Group Kandal Special Economic Zone (RGKSEZ) ដែលលាតសន្ធឹងលើផ្ទៃដីទំហំប្រមាណ ១២០ ​ហិកតា​ថែមទៀត៕