ព័ត៌មានជាតិ

អាជ្ញាធរសង្កាត់ផ្សារដើមថ្កូវ អំពាវនាវពលរដ្ឋធ្វើសេវាឯកសារដោយខ្លួនឯង កុំពឹងពាក់អ្នករត់ការ នាំខាតបង់ប្រាក់កាស ពេលវេលា

បានផុស

៨ ខែ មុន

នៅ

ថ្ងៃសុក្រ ២៦ កក្កដា ២០២៤

ដោយ

អាជ្ញាធរសង្កាត់ផ្សារដើមថ្កូវ ប្ដេជ្ញាបម្រើសេវាសាធារណៈជូនប្រជាពលរដ្ឋឲ្យបានលឿន រហ័ស និងអំពាវនាវពលរដ្ឋអញ្ជើញទៅទទួលយកការធ្វើសេវាឯកសារដោយខ្លួនឯង ចៀសវាងការពឹងពាក់តាមអ្នករត់ការ នាំខាតបង់ប្រាក់កាស និងពេលវេលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហែម សុផាត ចៅសង្កាត់ផ្សារដើមថ្កូវ បានឲ្យដឹងថា បច្ចុប្បន្ននៅមានប្រជាពលរដ្ឋមួយចំនួន បន្តពឹងពាក់អ្នកដទៃលើការរត់ឯកសារ ដោយមិនបានមកទទួលធ្វើឯកសារដែលខ្លួនចង់បំពេញ នេះជាកត្តានាំឲ្យពួកគាត់ខាតបង់ប្រាក់កាស និងត្រូវចំណាយពេលវេលា។

លោកចៅសង្កាត់ បន្តថា ការផ្តល់សេវាលើតម្រូវការឯកសាររបស់ប្រជាពលរដ្ឋ រដ្ឋបាលសង្កាត់ មានក្រុមមន្ត្រីប្រចាំការជាប់ជាប្រចាំនៅរៀងរាល់ម៉ោងធ្វើការ ដើម្បីរង់ចាំទទួលស្វាគមន៍ជានិច្ច រាល់អ្នកដែលមកបំពេញការធ្វើសេវា តាមរយៈយន្តការច្រកចេញចូលតែមួយ ដោយក្រុមមន្ត្រី នឹងបំពេញជូនភ្លាមចំពោះឯកសារ មិនត្រូវចំណាយរង់ចាំ ពោលគឺអាចចាំទទួលយកផ្ទាល់តែម្ដង។

លោកចៅសង្កាត់ សង្កត់ធ្ងន់ថា សូមប្រជាពលរដ្ឋចូលមកយន្តការច្រកចេញតែមួយរបស់សង្កាត់ កុំពឹងពាក់លើអ្នករត់ការ។ ក្នុងនោះ លោក ក៏បានប្ដេជ្ញាណែនាំដល់មន្ត្រី បម្រើប្រជាពលរដ្ឋឲ្យមានប្រសិទ្ធភាព លឿន និងរហ័ស។ ណែនាំជាប្រចាំមិនឲ្យទទួលការសូកប៉ាន់ណាមួយឡើយ ករណីមានបញ្ហា ឬការទទួលលុយនោះ លោកនឹងសុំគោលការណ៍ថ្នាក់ដឹកនាំអនុវត្តវិធានការច្បាប់៕

អត្ថបទ ៖ សុភា