គណៈកម្មាធិការគ្រោះមហន្តរាយ អំពាវនាវតំបន់ទេសចរណ៍ធម្មជាតិ បង្កើនការប្រុងប្រយ័ត្នខ្ពស់ចំពោះជំនន់ទឹកភ្លៀងរហ័ស

លោក សុទ្ធគឹម កុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានណែនាំដល់អាជ្ញាធរគ្រប់លំដាប់ថ្នាក់ យកចិត្តទុកដាក់តាមដាន និង ត្រៀមកម្លាំងក្នុងការជួយសង្គ្រោះ និង អន្តរាគមន៍ដល់ប្រជាពលរដ្ឋ ឱ្យបានទាន់ពេលវេលា ពិសេសនៅតាមរមណីយដ្ឋាន និង តំបន់ទេសចរណ៍មួយចំនួន ដែលមានទឹកធ្លាក់នៅតំបន់ភ្នំ និង ទឹកជ្រោះមានទឹកធ្លាក់ ព្រោះអាចមានគ្រោះទឹកជំនន់ឆាប់រហ័សកើតឡើងអាចបង្កគ្រោះថ្នាក់ដល់អ្នកទេសចរ។

ការអំពាវនាវនេះធ្វើឡើងបន្ទាប់ពីប្រទេសកម្ពុជាបានទទួលរងនូវឥទ្ធិពលព្យុះ បាវី បង្កឱ្យមានភ្លៀងធ្លាក់ខ្លាំងទូទាំងប្រទេស ដោយតំបន់មួយចំនួនកំពុងប្រឈមមុខនឹងហានិភ័យទឹកជំនន់ និង ជំនន់រហ័ស ជាពិសេសតាមជ្រលងភ្នំដងអូរ និង ស្ទឹង។

លោក សុទ្ធគឹម កុលមុនី បានមានប្រសាសន៍នៅព្រឹកថ្ងៃទី ១៣ កក្កដា នេះថា ដោយសារមានភ្លៀងធ្លាក់ខ្លាំងចាប់ពីថ្ងៃទី ១១ ឈានចូលដល់ ថ្ងៃទី ១២ ខែកក្កដា បានធ្វើឱ្យប៉ះពាល់តំបន់មួយចំនួនរួមមាន ស្រុកសំឡូត ខេត្តបាត់ដំបង ក្រុងកំពត និង ស្រុកកំពង់សីលា ខេត្តព្រះសីហនុ។ ប៉ុន្តែស្ថានភាពជំនន់ទឹកភ្លៀងនេះ មិនធ្ងន់ធ្ងរ និង មិនបណ្តាលឱ្យប៉ះពាល់ដល់អាយុជីវិតមនុស្សទេ ពោលគឺប៉ះពាល់តែទៅលើហេដ្ឋារចនាសម្ព័ន្ធដងទឹកព្រែក និង អូរ ដែលទឹកហូរកាត់ផ្លូវដែលធ្វើឱ្យបង្អាក់ដល់ការធ្វើចរាចរណ៍ប្រជាពលរដ្ឋមួយរយៈប៉ុណ្ណោះ។

លោកបន្តថា យ៉ាងណាក៏ដោយ មកដល់ល្ងាចថ្ងៃទី ១២ កក្កដា ទឹកជំនន់នៅក្រុងកំពត បានស្រកអស់ហើយ ស្ថានភាពភ្លៀងនៅបន្តរលឹម តែមិនបង្កឱ្យទៅជាទឹកជំនន់ទៀតទេ។ ចំណែនៅស្រុកសំឡូត ទឹកចាប់ផ្តើមស្រកដែរ តែយឺតៗ ដោយសារមានភ្លៀងរលឹមនៅបន្ត ហើយនៅស្រុកកំពង់សីលា ទឹកក៏ចាប់ផ្តើមដែរ តែភ្លៀងបន្តរលឹម។ អាជ្ញាធរគ្រប់លំដាប់ថ្នាក់ បានចុះជួយអន្តរាគមន៍ និង ធ្វើចរាចរណ៍នៅតំបន់រងគ្រោះដោយជំនន់ ដើម្បីធានាសុខសុវត្ថិភាពជូនប្រជាពលរដ្ឋ និង ជម្លៀសប្រជាជនទៅរកទីទួលសុវត្ថិភាពផងដែរ។

លោកបានបន្តទៀតថា ចំណែកគណៈកម្មាធិការគ្រោះមហន្តរាយ បានណែនាំដល់អាជ្ញាធរគ្រប់លំដាប់ថ្នាក់ តាមដាន និង ត្រៀមកម្លាំងជួយសង្គ្រោះ និង អន្តរាគមន៍ប្រជាពលរដ្ឋឱ្យបានទាន់ពេលវេលា ពិសេសណែនាំដល់តំបន់ទេសចរណ៍មួយចំនួនដែលមានទឹកធ្លាក់តាមតំបន់ភ្នំ និង ទឹកជ្រោះដែលមានទឹកធ្លាក់អាចមានគ្រោះទឹកជំនន់រហ័សកើតឡើង និង បង្កឱ្យគ្រោះថ្នាក់ដល់អ្នកទេសចរ។

លោកបានបញ្ជាក់ថា សម្រាប់ឆ្នាំនេះ គណៈកម្មាធិការគ្រោះមហន្តរាយ បានត្រៀមកម្លាំងរួចរាល់ហើយ និង កំពុងតាមដានអាកាសធាតុយ៉ាងយកចិត្តទុកដាក់ជាទីបំផុត ហើយប្រសិនបើផ្ទៃមេឃនៅតែអាប់អួរ និង ភ្លៀងនៅបន្តធ្លាក់ខ្លាំង អាចនឹងបង្កឱ្យមានជំនន់ទឹកភ្លៀង។ ដូចនេះ អាជ្ញាធរគ្រប់លំដាប់ថ្នាក់ យកចិត្តទុកដាក់ និង តាមដានអាកាសធាតុឱ្យបានច្បាស់លាស់ ដើម្បីត្រៀមជូនដំណឹងដល់ប្រជាពលរដ្ឋ និង ជួយសង្គ្រោះពួកគាត់ឱ្យទាន់ពេលវេលាពេលមានជំនន់ទឹកភ្លៀងកើតឡើង៕
អត្ថបទ ៖ សំអឿន