រកឃើញហើយ! សាលាបឋមសិក្សា និងអនុវិទ្យាល័យចំនួន ២០ ជាប់ជាអង្គភាពផ្តល់សេវាសាធារណៈគំរូ ឆ្នាំ២០២៥

ក្រសួងមុខងារសាធារណៈ បានប្រកាសជ័យលាភីអង្គភាពផ្តល់សេវាសាធារណៈគំរូ ក្នុងវិស័យអប់រំ ឆ្នាំ២០២៥ ដោយមាន សាលាបឋមសិក្សា ១០ និង អនុវិទ្យាល័យ ១០ ទទួលបានចំណាត់ថ្នាក់ល្អបំផុត បន្ទាប់ពីឆ្លងកាត់ការវាយតម្លៃថ្នាក់ជាតិ។

ពិធីប្រកាស និងប្រគល់ពានរង្វាន់ បានធ្វើឡើងនៅថ្ងៃទី១៤ ខែកក្កដា ឆ្នាំ២០២៦ នៅកោះពេជ្រ ក្រោមអធិបតីភាព ឯកឧត្តម ហ៊ុន ម៉ានីឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការវាយតម្លៃអង្គភាពផ្តល់សេវាសាធារណៈថ្នាក់ជាតិ (គ.វ.ជ.) ដោយមានការចូលរួមពីរដ្ឋមន្រ្តីក្រសួងអប់រំ យុវជន និងកីឡា និងរដ្ឋមន្រ្តីក្រសួងសុខាភិបាល ព្រមទាំងនាយកសាលាមកពីបណ្តារាជធានី-ខេត្ត។

ឯកឧត្តម ហ៊ុន ម៉ានី បានមានប្រសាសន៍ថា ជ័យលាភីដែលទទួលបាន គឺជាមោទនភាពរបស់អង្គភាពនីមួយៗ និងជាលទ្ធផលនៃកិច្ចខិតខំប្រឹងប្រែងរួមរបស់ថ្នាក់ដឹកនាំ លោកគ្រូ អ្នកគ្រូ អាជ្ញាធរមូលដ្ឋាន សហគមន៍ និងប្រជាពលរដ្ឋ ក្នុងការលើកកម្ពស់គុណភាពសេវាសាធារណៈ។

ឯកឧត្តមបានអបអរសាទរចំពោះអង្គភាពដែលទទួលបានជ័យលាភី និងបានលើកទឹកចិត្តដល់អង្គភាពដែលមិនទាន់ទទួលបានចំណាត់ថ្នាក់ល្អ ឱ្យបន្តពង្រឹងគុណភាពការងារ ដើម្បីឆ្ពោះទៅរកការផ្តល់សេវាសាធារណៈប្រកបដោយគុណភាព ប្រសិទ្ធភាព តម្លាភាព និងភាពជឿទុកចិត្តពីប្រជាពលរដ្ឋ។

ឯកឧត្តមបញ្ជាក់ថា៖«សូមឱ្យស្មារតីអង្គភាពគំរូ ក្លាយជាវប្បធម៌រួមរបស់រដ្ឋបាលសាធារណៈទាំងមូល ក្នុងការប្តេជ្ញាផ្តល់សេវាជូនប្រជាពលរដ្ឋប្រកបដោយគុណភាព ប្រសិទ្ធភាព គណនេយ្យភាព និងមនសិការវិជ្ជាជីវៈខ្ពស់»។

ជ័យលាភីសាលាបឋមសិក្សាទាំង ១០

1. សាលាបឋមសិក្សា ហ៊ុន សែន មិត្តភាព (ខេត្តព្រះសីហនុ) – លេខ១
2. សាលាបឋមសិក្សា ស្វាយជ្រំ (ខេត្តស្វាយរៀង) – លេខ២
3. សាលាបឋមសិក្សា សម្តេច ជា ស៊ីម (ខេត្តបាត់ដំបង) – លេខ៣
4. សាលាបឋមសិក្សា ក្រវ៉ាន់ (ខេត្តសៀមរាប) – លេខ៤
5. សាលាបឋមសិក្សា ថ្លុកជ្រៅ (ខេត្តកំពង់ចាម) – លេខ៥
6. សាលាបឋមសិក្សា ពោធិ៍សាត់ (ខេត្តពោធិ៍សាត់) – លេខ៦
7. សាលាបឋមសិក្សា គីរិសុវណ្ណវង្ស (ខេត្តកំពង់ឆ្នាំង) – លេខ៧
8. សាលាបឋមសិក្សាអនុវត្ត ហ៊ុន សែន អាចារ្យលាក់ (ខេត្តកំពង់ធំ) – លេខ៨
9. សាលាបឋមសិក្សា អង្គរជុំ (ខេត្តកំពត) – លេខ៩
10. សាលាបឋមសិក្សា ចតុមុខ (រាជធានីភ្នំពេញ) – លេខ១០

ជ័យលាភីអនុវិទ្យាល័យទាំង ១០

1. អនុវិទ្យាល័យ មិត្តភាពខ្មែរ-ជប៉ុន ព្រះឥន្ទកោសា (ខេត្តសៀមរាប) – លេខ១
2. អនុវិទ្យាល័យ បាក់អំរែក (ខេត្តបាត់ដំបង) – លេខ២
3. អនុវិទ្យាល័យ ភ្នំយ៉ាត (ខេត្តប៉ៃលិន) – លេខ៣
4. អនុវិទ្យាល័យ សម្តេចឪ (ខេត្តព្រះសីហនុ) – លេខ៤
5. អនុវិទ្យាល័យ ឈូកខ្សាច់ (ខេត្តកំពង់ធំ) – លេខ៥
6. អនុវិទ្យាល័យ សង្គមថ្មី (ខេត្តព្រះវិហារ) – លេខ៦
7. អនុវិទ្យាល័យ ទួលថ្ម (ខេត្តកំពង់ចាម) – លេខ៧
8. អនុវិទ្យាល័យ អន្លង់អក (ខេត្តកំពង់ចាម) – លេខ៨
9. អនុវិទ្យាល័យ អរញ្ញរង្សី (ខេត្តសៀមរាប) – លេខ៩
10. អនុវិទ្យាល័យ បរកែវ (ខេត្តរតនគិរី) – លេខ១០

កម្មវិធីជ្រើសរើសអង្គភាពផ្តល់សេវាសាធារណៈគំរូ ត្រូវបានរាជរដ្ឋាភិបាលអនុវត្តក្នុងគោលបំណងជំរុញការប្រកួតប្រជែងប្រកបដោយសុខភាព លើកកម្ពស់គុណភាពសេវាសាធារណៈ និងពង្រឹងប្រសិទ្ធភាពការផ្តល់សេវាជូនប្រជាពលរដ្ឋ ស្របតាមកម្មវិធីកំណែទម្រង់រដ្ឋបាលសាធារណៈ៕