ព័ត៌មានជាតិ

តម្លៃស្រូវក្នុងស្រុកបវេលហក់ឡើងវិញ ខណៈមានឈ្មួញវៀតណាមចុះមកទិញមិនគិតគុណភាព

បានផុស

៦ ខែ មុន

នៅ

ថ្ងៃពុធ ៩ តុលា ២០២៤

ដោយ

ប្រជាកសិករ ដែលរស់នៅក្នុងឃុំខ្នាចរមាស ស្រុកបវេល នៃខេត្តបាត់ដំបងបានឲ្យដឹងថា ក្រោយពីប្រឈមបញ្ហាមួយរយៈ ពេលនេះលែងបារម្ភទៀតហើយចំពោះស្រូវដែលមានគុណភាពមិនល្អ ក្រោយមានឈ្មួញវៀតណាមចុះមកប្រមូលទិញយកទាំងអស់ដោយមិនគិតពីគុណភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយបារម្ភពីបញ្ហាទឹកជំនន់ ខណៈដែលមានភ្លៀងធ្លាក់ផ្ទួនៗប៉ុន្មានថ្ងៃ បានធ្វើឲ្យប្រជាកសិករក្នុងឃុំខ្នាចរមាស ស្រុកបវេល នៃខេត្តបាត់ដំបង បង្ខំចិត្តប្រមូលផលស្រូវទាំងមិនទាន់មានគុណភាពល្អ ព្រោះខ្លាចខាតបង់ទាំងស្រុង។ ផ្ទុយទៅវិញស្ថានភាពអាកាសធាតុបានប្រសើរឡើងវិញ ដែលបង្កឲ្យកសិករខកចិត្តក្នុងការប្រញ៉ាប់ប្រមូលផលស្រូវទាំងបង្ខំ ហើយបានប្រឈមនិងទីផ្សារ ព្រោះតែគុណភាពស្រូវធ្លាក់ចុះ។

ប៉ុន្តែ គិតពីថ្ងៃទី០៧ ខែតុលា ឈ្មួញវៀតណាមបានចុះប្រមូលទិញទាំងអស់ដោយមិនគិតពីគុណភាព លើកលែងតែស្រូវមិនទាន់ស្ងួត ទើបឈ្មួញខាងវៀតណាមមិនទាន់ប្រមូលទិញ ទើបធ្វើឱ្យកសិករមានក្តីសង្ឃឹមឡើងវិញ។

កសិករឈ្មោះ ឌឿន រស់នៅភូមិខ្នាចរមាស ស្រុកបវេល បា្រប់ថា «ខ្ញុំបង្ខំចិត្តប្រមូលផលស្រូវ ព្រោះបារម្ភថានឹងខាតបង់ច្រើន ដោយសារមានជំនន់ទឹកភ្លៀងទាំងស្រូវរបស់ខ្ញុំ និងកសិករជាច្រើនទៀត នៅមិនទាន់មានគុណភាពល្អនៅឡើយ ហើយខ្ញុំក៏ប្រឈមនិងទីផ្សារ។ ខ្ញុំគិតថា ទំនងមិនមានឈ្មួញណាទិញទេ តែពេលនេះខ្ញុំក៏ដូចកសិករក្នុងភូមិ បានសប្បាយចិត្តវិញ និងមានដើមទុនបន្តទៀត តាមរយៈឈ្មួញខាងវៀតណាមចុះមកប្រមូលទិញយកទាំងអស់ ដោយមិនគិតពីគុណភាព ជៀសវាងស្រូវមិនទាន់ស្ងួត ហើយតម្លៃក៏អាចទទួលយកបាន គឺមិនក្រោម ១ លានរៀលទេ ក្នុងមួយតោន សម្រាប់ស្រូវស្រង៉ែ»។

មន្ទីរពាណិជ្ជកម្មខេត្តបាត់ដំបងបានឲ្យដឹងថា បញ្ហាប្រឈមរបស់កសិករ ត្រូវបានដោះស្រាយរួចរាល់ ក្រោយពីមានកិច្ចប្រជុំពិភាក្សាស្ដីពីបញ្ហាប្រឈម និងស្វែងរកដំណោះស្រាយលើតម្លៃស្រូវនៅក្នុងខេត្តបាត់ដំបង ក្រោមអធិបតីភាព លោក សុខ លូ អភិបាលនៃគណៈអភិបាលខេត្តបាត់ដំបង។

ប្រភពដដែលបន្តថា ក្រុមហ៊ុនបៃតងកម្ពុជា (រោងម៉ាស៊ីនកិនស្រូវ បៃតង) របស់លោក ភួ ពុយ និងក្រុមហ៊ុន ស៊ីធីរ៉ាយស៍ (រោងម៉ាស៊ីន ឡាយ សែ) និងក្រុមហ៊ុន រោងម៉ាស៊ីនកិនស្រូវមួយចំនួនទៀត បានប្រកាសទទួលទិញស្រូវគុណភាពល្អ តម្លៃមិនឱ្យក្រោម ១ លានរៀល/តោន ពីកសិករ។

តាមលទ្ធផលក្នុងកិច្ចប្រជុំគិតត្រឹមថ្ងៃទី០៧ ខែតុលា ឆ្នាំ២០២៤ តម្លៃស្រូវក្នុងខេត្តបាត់ដំបង មានភាពល្អប្រសើរឡើងវិញ។ ក្នុងនោះតម្លៃស្រូវនៅទីវាល ដោយស្រូវស្រង៉ែ តម្លៃ ១,០១៣រៀល/គីឡូក្រាម (គុណភាពល្អ) តម្លៃស្រូវដឹកដល់រោងម៉ាស៊ីន ស្រូវស្រង៉ែតម្លៃ ១,០៩៨រៀល/គីឡូក្រាម(គុណភាពល្អ)។

ឈ្មួញវៀតណាមដែលបានចុះប្រមូលទិញស្រូវក្នុងឃុំខ្នាចរមាស ស្រុកបវេលក្នុងនោះស្រូវស្រង៉ែ តម្លៃ ១,០១៣រៀល/គីឡូក្រាម ហើយតម្លៃនេះ គឺឈ្មួញវៀតណាមទិញមិនគិតពីគុណភាពនោះឡើយ (វាយអួរយកតែម្ដង) ឲ្យតែស្រូវស្ងួតមិនសើម ហើយមិនសូវស្រអាប់ ប្រមូលយកទាំងអស់ដោយមិនគិតពីគុណភាព៕

អត្ថបទ៖ សៅ សារិទ្ធ

Related Topics:ខេត្តបាត់ដំបង