GMAC ណែនាំឲ្យរោងចក្រធ្វើរឿងទាំងនេះ ក្រោយផ្ទុះកូវីដ១៩

សមាគមរោងចក្រកាត់ដេរនៅកម្ពុជា ដែលហៅកាត់ថា GMAC នៅថ្ងៃទី ១០ ខែមីនា ឆ្នាំ ២០២១ នេះ បានផ្ញើរសារណែនាំឲ្យសមាជិករបស់សមាគមរោងចក្រកាត់ដេរទាំងអស់អនុវត្តវិធានការទប់ស្កាត់ការឆ្លងរីករាលដាលនៃជំងឺកូវីដ១៩។

ការណែនាំនេះ កើតមានឡើង បន្ទាប់ពីការផ្ទុះឡើងនៃវីរុសកូវីដ១៩ នៅតែបន្តជាក្តីបារម្ភនៅក្នុងឧស្សាហកម្មរោងចក្រកាត់ដេរ ស្បែកជើង និងសម្លៀកបំពាក់។

សមាគមរោងចក្រកាត់ដេរនៅកម្ពុជា ណែនាំរោងចក្រ ដែលមាននិយោជិតទើបតែត្រឡប់មកពីក្រៅប្រទេស ត្រូវចូលរួមសហការជាមួយអាជ្ញាធរមានសមត្ថកិច្ច និងអនុវត្តឲ្យបានខ្ជាប់ខ្ជួននូវវិធានការការពារដែលដាក់ចេញដោយក្រសួងសុខាភិបាល និងត្រូវរៀបចំឲ្យមានឧបករណ៍វ៉ាស់កំដៅ និងធ្វើការវ៉ាស់កំដៅរបស់កម្មករនិយោជិតនៅតាមច្រកចេញ-ចូល ឲ្យបានទៀងទាត់ និងមានប្រសិទ្ធភាព។

ក្រៅពីនេះ ត្រូវរៀបចំផ្តល់ម៉ាស់សុវត្ថិភាព និងត្រូវមានទឹកអាកុលឬសាប៊ូសម្រាប់លាងដៃ សម្រាប់កម្មករនិយោជិត និងភ្ញៀវដែលចេញចូលនៅក្នុងបរិវេណរោងចក្រ។

បើតាមGMAC តាមរោងចក្រគួ កាត់បន្ថយការមកទស្សនកិច្ចពីសំណាក់ភ្ញៀវខាងក្រៅនៅក្នុងបរិវេណរោងចក្រ ហើយត្រូវធ្វើការផ្សព្វផ្សាយ និងណែនាំដល់កម្មករនិយោជិតនូវរបៀបប្រើប្រាស់សម្ភារៈការពារសុវត្ថិភាព (PPE) និងវិធានការសុវត្ថិភាព ក៏ដូចជាលើកទឹកចិត្តដល់កម្មករនិយោជិតធ្វើការលាងដៃជាមួយនឹងសាប៊ូឲ្យបានញឹកញាប់ រៀងរាល់ពេលដែលចូលក្នុងរោងចក្រនៅពេលព្រឹក និងក្រោយពេលបរិភោគបាយថ្ងៃត្រង់។

នៅរោងចក្រមិនមានការឆ្លងរាលដាលនោះទេ បន្ទាប់ពីមានករណីកម្មការិនីបម្រើការងារនៅរោងចក្រ វាយ​ & ដាប់បែលយូ នៅអគារ D8 បានឆ្លងកូវីដ១៩ ពីកូនប្រុសរបស់ខ្លួនដែលបើកឡានឲ្យជនជាតិចិន កាលពីថ្ងៃទី ២ ដើមខែមីនានេះ។

ក្រុមគ្រូពេទ្យនៃក្រសួងសុខាភិបាល បានចុះយកសំណាកកម្មករជាង ៧០០ នាក់ ដែលធ្វើការក្នុងអគារ D8 ហើយទទួលបានលទ្ធផលអវិជ្ជមានទាំងអស់៕

អត្ថបទ៖ ឡេង ដេត