មន្រ្តីជាន់ខ្ពស់សុខាភិបាល ណែនាំឲ្យមន្ទីរសុខាភិ​បាល​ខេត្តតាកែវ ពិនិត្យគ្លីនិកឯកជនត្រូវមានច្បាប់អនុញ្ញាតត្រឹមត្រូវ

មន្រ្តីជាន់ខ្ពស់ក្រសួងសុខាភិបាល បានធ្វើការណែនាំដល់ថ្នាក់ដឹកនាំមន្ទីរសុខាភិបាលខេត្តតាកែវត្រូវចុះពិនិត្យតាមគ្លីនិកឯកជនដែលបើកដំណើរការ ត្រូវមានច្បាប់អនុញ្ញាតត្រឹមត្រូវ តែបើគ្មានច្បាប់អនុញ្ញាត គឺមិនត្រូវឲ្យបន្តបើកដំណើរការតទៅទៀតនោះទេ។

ថ្លែងនៅក្នុងឱកាសអញ្ជើញប្រកាសចូលកាន់តំណែងប្រធានមន្ទីរសុខាភិបាលខេត្តតាកែវថ្មី នាព្រឹកថ្ងៃព្រហស្បតិ៍ ទី១៧ ខែតុលា ឆ្នាំ២០២៤នេះ លោក ម៉ី សំបូរ រដ្ឋលេខាធិការប្រចាំការក្រសួងសុខាភិបាល បានមានប្រសាសន៍បន្តថា មុននឹងអនុញ្ញាតឱ្យគ្លីនិកឯកជនបើកដំណើរការ ថ្នាក់ដឹកនាំមន្ទីរត្រូវពិនិត្យលក្ខណៈសម្បត្តិមុន ថាតើម្ចាស់គ្លីនិកជាគ្រូពេទ្យដែលមានសញ្ញាបត្រត្រឹមត្រូវ ហើយបានចុះឈ្មោះពីគណៈវិជ្ជាជីវៈមានអាជ្ញាប័ណ្ណប្រកបវិជ្ជាជីវៈហើយឬនៅ? ហើយប្រសិនជាគាត់ធ្វើការងាររដ្ឋ គឺច្បាប់មិនអនុញ្ញាតបាននោះទេ ឬទាល់តែមានការបញ្ជាក់លិខិតពីភាពទំនេរដែលមិនស្ថិតនៅក្រោមការងាររដ្ឋ ឬមិនបានធ្វើការនៅក្នុងមន្ទីរពេទ្យរដ្ឋណាមួយ ទើបច្បាប់អនុញ្ញាតឱ្យគាត់ទទួលខុសត្រូវ ក្នុងការបើកគ្លីនិកព្យាបាលជំងឺបាន។

លោក ម៉ី សំបូរ បានបន្តថា កន្លងមកក្រសួងសុខាភិបាលបានបញ្ជាក់យ៉ាងច្បាស់ថា គ្មានគ្លីនិកឯកជនណាមួយដែលព្យាបាលជំងឺជូនប្រជាពលរដ្ឋ គ្មានច្បាប់អនុញ្ញាតនោះទេ គឺត្រូវតែមានច្បាប់អនុញ្ញាត និងមានសញ្ញាបត្រត្រឹមត្រូវផងដែរ ទើបយើងអាចអនុញ្ញាតឱ្យបង្កើតគ្លីនិកមួយដែលមានទំនួសខុសត្រូវខ្ពស់លើការពិនិត្យ ព្យាបាលជំងឺជូនប្រជាពលរដ្ឋ ដោយមិនមានបញ្ហាអ្វីកើតមានចំពោះអ្នកជំងឺ។

លោក វ៉ី សំណាង អភិបាលខេត្តតាកែវ ក៏បានផ្តាំផ្ញើដល់លោក ផាន់ វ៉ាន់ ដែលទើបប្រកាសចូលកាន់តំណែងជាប្រធានមន្ទីរសុខាភិបាលថ្មី ត្រូវចូលរួមសហការពង្រឹងការសាមគ្គីភាព ឯកភាពផ្ទៃក្នុង និងពង្រឹងរបៀបរបបធ្វើការងារ ទំនាក់ ទំនងការងារឱ្យបានល្អនៅក្នុងអង្គភាពរបស់ខ្លួនដោយឈរលើមូលដ្ឋាននៃការលើកកម្ពស់ប្រសិទ្ធភាព និងធានានិរន្តភាពការងាររបស់ខ្លួនឱ្យកាន់តែមានភាពល្អប្រសើរ ត្រូវចូលរួមលើកកម្ពស់ការផ្តល់សេវាសាធារណៈជូនប្រជាពលរដ្ឋឱ្យបានល្អប្រសើរ មានប្រសិទ្ធភាព និងមិនរើសអើង ដើម្បីឆ្លើយតបតាមតម្រូវការរបស់មូលដ្ឋាន៕​

អត្ថបទ៖ វីរ: