អភិបាលខេត្តកំពង់ចាម ក្រើនរម្លឹកដល់ថ្នាក់ដឹកនាំមន្ទីរ អង្គភាព ពង្រឹងសមត្ថភាពក្នុងការគ្រប់គ្រងគ្រោះមហន្តរាយ

អភិបាលខេត្តកំពង់ចាម លោក អ៊ុន ចាន់ដា បានក្រើនរម្លឹកដល់ថ្នាក់ដឹកនាំ មន្ទីរ អង្គភាព គ្រប់ថ្នាក់ គ្រប់ផ្នែក ឱ្យពង្រឹងសមត្ថភាព ក្នុងការងារគ្រប់គ្រងគ្រោះមហន្តរាយ ដោយរៀបចំធានាទាំងធនធានមនុស្ស មធ្យោបាយ សម្ភារ ថវិកា សម្រាប់ដំណើរការការងារ និងត្រៀមឆ្លើយតបគ្រោះមហន្តរាយ។

ការក្រើនរម្លឹកនេះ ធ្វើឡើងក្នុងទិវាជាតិគ្រប់គ្រងគ្រោះមហន្តរាយ ឆ្នាំ២០២៤ ក្រោមប្រធានបទ ការគ្រប់គ្រងគ្រោះមហន្តរាយ សំដៅការពារ ការអភិវឌ្ឍន៍ និងសុខមាលភាពរបស់ប្រជាជន នាថ្ងៃទី២២ ខែតុលា ឆ្នាំ២០២៤ នៅសាលសន្និសីទសាលាខេត្តកំពង់ចាម។ ទិវានេះប្រារព្ធឡើង ក្រោមអធិបតីភាព លោកស្រី ម៉ែន នារីសោភ័គ អគ្គលេខាធិការរងទី១ និងជាតំណាងដ៏ខ្ពង់ខ្ពស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងលោក អ៊ុន ចាន់ដា ប្រធានគណៈកម្មាធិការសាខា និងជាប្រធានគណៈកម្មាធិការគ្រប់គ្រងគ្រោះមហន្តរាយ ខេត្តកំពង់ចាម។

លោក អ៊ុន ចាន់ដា បានបញ្ជាក់ថា ការគ្រប់គ្រងគ្រោះមហន្តរាយ គឺជាការងារពហុវិស័យ ជាការងារប្រទាក់ក្រឡាពាក់ព័ន្ធគ្នា ស្ទើរគ្រប់ទិដ្ឋភាព សេដ្ឋកិច្ចសង្គម ដែលធ្វើឡើងប្រកបដោយបរិយាបន្ន។ ហេតុនេះ គ្រប់វិស័យ គ្រប់ផ្នែក សុទ្ធតែ មានការជាប់ពាក់ព័ន្ធ និងត្រូវចូលរួម ដោយផ្ទាល់ ឬ ដោយប្រយោល ក្នុងគ្រប់សកម្មភាពនៃការកាត់បន្ថយហានិភ័យ គ្រោះមហន្តរាយនេះ។ បន្ថែមពីលើនេះ ការរួមចំណែកឧបត្ថម្ភគាំទ្រ ជាធនធាន សម្ភារ មធ្យោបាយ ថវិកា ដល់អាជ្ញាធរ ក្នុងការឆ្លើយតបគ្រោះមហន្តរាយ ពីសំណាក់ប្រជាពលរដ្ឋ ដៃគូរអភិវឌ្ឍន៍ សប្បុរសជន នៅតែជាភាព ចាំបាច់ ដែលមិនអាចកាត់ផ្តាច់បាន ហើយមិនមែនត្រឹមតែជា កិច្ចការមនុស្សធម៌ប៉ុណ្ណោះទេ ប៉ុន្តែវាជាចំណែកមួយ ដើម្បីរួមគ្នាការពារសុខសន្តិភាព និងសេដ្ឋកិច្ចសង្គម របស់ជាតិទាំងមូល។

ចំណែក លោកស្រី ម៉ែន នារីសោភ័គ បានមានប្រសាសន៍ថា គ្រោះមហន្តរាយកើតឡើងមិនរើសអើងនោះទេ មិនថាប្រទេសក្រីក្រ ឬប្រទេសអ្នកមាន សុទ្ធតែកើតមានឡើងនូវគ្រោះមហន្តរាយដូចៗគ្នា។ ដូច្នេះ ត្រូវធ្វើយ៉ាងណា ដើម្បីបង្ការ ទប់ស្កាត់ ពីផលប៉ះពាល់ដែលកើតឡើងពីក្រុមហន្តរាយផ្សេងៗនោះ។ លោកស្រីថា ការប្រារព្ធទិវានេះឡើង គឺដើម្បីធ្វើការផ្សព្វផ្សាយ ដល់ប្រជាពលរដ្ឋឱ្យយល់ដឹងអំពីសារៈសំខាន់ និងចូលរួមក្នុងការទប់ស្កាត់បញ្ជៀស និងបង្ការ ព្រោះការឆ្លើយតបមានការចំណាយច្រើនជាងការទប់ស្កាត់ និងការបង្ការ ហើយក៏មានការប៉ះពាល់ដល់ទ្រព្យសម្បត្តិ និងអាយុជីវិត ប្រជាពលរដ្ឋផងដែរប្រសិនបើមានគ្រោះមហន្តរាយកើតឡើង៕