រដ្ឋមន្ត្រីសុខាភិបាលណែនាំឲ្យបង្កើនការយកចិត្តទុកដាក់បន្ថែមចំពោះសុខុមាលភាពប្រជាពលរដ្ឋក្នុងមូលដ្ឋាន

លោកសាស្ត្រាចារ្យរដ្ឋមន្ត្រីក្រសួងសុខាភិបាល បានធ្វើការណែនាំដល់ថ្នាក់ដឹកនាំទទួលបន្ទុកគ្រប់ឋានុក្រម ជាពិសេសថ្នាក់ដឹកនាំនៅតាមបណ្តារាជធានី ខេត្តបន្តបង្កើនការយកចិត្តទុកបន្ថែមទៀតចំពោះសុខុមាលភាពប្រជាពលរដ្ឋនៅក្នុងមូលដ្ឋានរបស់ខ្លួនដោយចាត់តាំងក្រុមការងារ ក្នុងការពិនិត្យវាយតម្លៃ និងទទួលព័ត៌មានត្រឡប់វិញពីប្រជាពលរដ្ឋឱ្យបានជាប់ជាប្រចាំ។

ក្នុងឱកាសដឹកនាំកិច្ចប្រជុំកម្រិតថ្នាក់ដឹកនាំលើកទី២ នៃខែតុលា ពិនិត្យវឌ្ឍនភាពការងារ និងលើកទិសដៅកិច្ចការបន្តកាលពីរសៀលថ្ងៃទី២៨តុលា នៅទិស្តីការក្រសួង លោករដ្ឋមន្ត្រីក៏បានណែនាំឱ្យចុះពិនិត្យ និងគាំទ្រមូលដ្ឋានសុខាភិបាល ត្រូវបន្តពិនិត្យ និងរៀបចំបច្ចុប្បន្នភាពគោលការណ៍ឱ្យបានកាន់តែសមស្របទៅនឹងស្ថានការ ទាំងផ្នែកបច្ចេកទេស និងផ្នែកគ្រប់គ្រងដូចជា ហេដ្ឋារចនាសម្ព័ន្ធ អនាម័យបរិស្ថាន ការធ្វើបដិសណ្ឋារកិច្ច ប្រព័ន្ធទំនាក់ទំនង
ធនធានមនុស្ស ការគ្រប់គ្រងឱសថ និងជាពិសេសក្រមសីលធម៌វិជ្ជាជីវៈគ្រូពេទ្យ។

ជាមួយគ្នានេះដែរលោករដ្ឋមន្រ្តី បានណែនាំថ្នាក់ដឹកនាំគ្រប់កម្រិតយកចិត្តទុកដាក់លើជំងឺមិនឆ្លងដោយផ្តោតទៅលើអាហារូបត្ថម្ភនៅតាមសហគមន៍ជាពិសេសសាលារៀន ដោយរៀបចំចងក្រងជាស្តង់ដានៃរបបអាហារក៏ដូចទម្លាប់នៃការរស់នៅប្រកបដោយសុខុមាលភាពដោយត្រូវបង្កើតជាសារអប់រំសុខភាពជូនប្រជាពលរដ្ឋ ឱ្យកាន់តែយល់ដឹងបន្ថែមទៀត
ក្នុងការថែរក្សាសុខភាព។

នៅក្នុងកិច្ចប្រជុំនេះផងដែរ លោករដ្ឋមន្រ្តី បានជម្រាបជូនដល់អង្គប្រជុំ ពីវឌ្ឍនភាព និងលទ្ធផលនៃការចូលរួមកិច្ចប្រជុំលើកទី ៧៥ របស់អង្គការសុខភាពពិភពលោកសម្រាប់តំន់ប៉ាស៊ីហ្វិកខាងលិចដែលនឹងប្រព្រឹត្តទៅចាប់ពីថ្ងៃទី២១ ដល់ថ្ងៃទី២៥ ខែតុលា ឆ្នាំ២០២៤ នៅទីក្រុងទីក្រុងម៉ានីល សាធារណរដ្ឋហ្វីលីពីន ដែលបានពិភាក្សាក្នុងការពង្រឹងប្រព័ន្ធសុខាភិបាលប្រកបដោយភាពធន់និងឆ្លើយតបទៅនឹងបញ្ហាប្រឈមផ្នែកសុខភាពដែលកំពុងកើតមានឱ្យបានឆាប់រហ័ស៕

អត្ថបទ៖ សំអឿន