ក្រុមប្រឹក្សាខេត្តក្រចេះ ឲ្យ​មន្រ្តី​អប់រំ​ចុះពិនិត្យកែលម្អ​ទីតាំង​អន្តេវាសិកដ្ឋាន​សិស្ស​ ខណៈ​ទូទាំង​ខេត្ត​មាន​សិស្ស​ជាប់​និទ្ទេស A ​កើន​ឡើងជាងឆ្នាំមុន​

លោក ហឿ ស៊ីយ៉ែម ប្រធានក្រុមប្រឹក្សាខេត្តក្រចេះ បាន​កោតសរសើរនិងវាយតម្លៃខ្ពស់ចំពោះលោកគ្រូអ្នកគ្រូ ពិសេសសិស្សានុសិស្ស ដែលទើបនឹងបញ្ចប់ការប្រឡងសញ្ញាបត្រមធ្យសិក្សាទុតិយភូមិ នាសម័យប្រឡងឆ្នាំសិក្សា ២០២៣-​២០២៤ ដោយទទួលបានលទ្ធផលល្អគួរជាទីមោទនៈ។

លោកមានប្រសាសន៍បែបនេះ ក្នុងឱកាសបើកកិច្ចប្រជុំសាមញ្ញលើកទី ៦ អាណត្តិទី ៤ ឆ្នាំ ២០២៤ របស់ក្រុមប្រឹក្សាខេត្តក្រចេះ នៅថ្ងៃទី ០៧ ខែ វិច្ឆិកា ឆ្នាំ ២០២៤។

ប្រធានក្រុមប្រឹក្សាខេត្តក្រចេះ លោក ហឿ ស៊ីយ៉ែម បាន​បញ្ជាក់ថា សិស្សជាប់និទ្ទេស A ឆ្នាំនេះ មានការកើនឡើង បើ​បៀប​នឹងឆ្នាំ២០២៣ ដែលទាំងអស់នេះសបញ្ជាក់ឲ្យឃើញ ពីការប្តេជ្ញាចិត្តរបស់លោកគ្រូអ្នកគ្រូ និងសិស្សានុសិស្ស ក្នុងការបង្រៀននិងរៀន ដែលបានរួមចំណែកលើកមុខមាត់ខេត្ត លើកកម្ពស់នូវវិស័យអប់រំនៅកម្ពុជា។

ទន្ទឹមនឹងនោះដែរ លោក ហឿ ស៊ីយ៉ែម ក៏បានស្នើរដល់មន្ទីរអប់រំចុះពិនិត្យទីតាំង​អន្តេវាសិកដ្ឋាន នៅតាមសាលាមួយចំនួន ដែលទុកចោល សូមធ្វើការបោសសម្អាតជាប្រចាំ និងថែទាំរក្សាកែលម្អសោភ័ណ្ឌភាព ដើម្បីប្រយោជន៍យូរអង្វែងដល់ក្មួយសិស្សានុសិស្ស។

នាសម័យប្រឡងសញ្ញាបត្រ​មធ្យមសិក្សាទុតិយភូមិ​ឆ្នាំ ២០២៤ ខេត្ត​​ក្រចេះមាន​​សិស្សប្រឡងជាប់និទ្ទេស A សរុប​មាន​ចំនួន ៥៦ នាក់។ បើប្រៀបធៀបនឹងសម័យប្រឡងមធ្យមសិក្សាទុតិយភូមិឆ្នាំ២០២៣ បេក្ខជនដែលបានប្រឡងជាប់និទ្ទេស A ឆ្នាំ២០២៣ មានចំនួនសរុប ៣៥នាក់ ក្នុងនោះស្រី ២៦នាក់ ប្រៀបធៀបឆ្នាំ២០២៤នេះ មានការកើនឡើង ២១ នាក់ ក្នុងនោះស្រី ៧នាក់៕

អត្ថបទ៖ ប្រុញ វិធិន