ក្រសួងសុខាភិបាលនឹងសហការជាមួយវិស័យឯកជនផលិតអុកស៊ីសែនផ្គត់ផ្គង់នៅមន្ទីរពេទ្យសាធារណៈនៅកម្ពុជា

ក្រសួងសុខាភិបាលនឹងសហការជាមួយក្រុមហ៊ុន HENAN TAIYI MEDICAL TECHNOLOGY លើគម្រោងផលិតអុកស៊ីសែននៅមន្ទីរពេទ្យសាធារណៈនៅកម្ពុជា ដើម្បីធានាបាននូវការព្យាបាលជូនអ្នកជំងឺប្រកបដោយប្រសិទ្ធភាព និងស័ក្តិសិទ្ធភាព។

គម្រោងខាងលើនេះត្រូវបានធ្វើឡើងនៅក្នុងកិច្ចពិភាក្សាការងាររវាងលោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ជាមួយលោកជំទាវអ្នកឧកញ៉ា ចាន់ សុទ្ធា តំណាងក្រុមហ៊ុន HENAN TAIYI MEDICAL
TECHNOLOGY កាលពីថ្ងៃទី១៨ ខែវិច្ឆិកា ឆ្នាំ២០២៤ នៅទីស្តីការក្រសួង។

នៅក្នុងជំនួបនេះរៀបចំឡើងក្នុងគោលបំណង ដើម្បីពិនិត្យ និងពិភាក្សាលទ្ធភាពនៃកិច្ចសហប្រតិបត្តិការ និងតម្រូវការរបស់ក្រសួងសុខាភិបាលលើផ្នែកប្រព័ន្ធផ្គត់ផ្គង់អុកស៊ីសែនក្នុងមន្ទីរពេទ្យ និងការពិនិត្យលើតម្រូវការក្នុងការសាងសង់មណ្ឌលចាស់ជរា នៅកម្ពុជា។

លោក LIAN YU LIN, អគ្គនាយកក្រុមហ៊ុន HENAN TAIYI MEDICAL TECHNOLOGY បានបញ្ជាក់ជំហរយ៉ាងមុតមាំរបស់ក្រុមហ៊ុនក្នុងកិច្ចសហប្រតិបត្តិការជាមួយក្រសួងសុខាភិបាល លើការបំពាក់ប្រព័ន្ធផ្គត់ផ្គង់អុកស៊ីសែននៅតាមមន្ទីរពេទ្យសាធារណៈមួយចំនួនដែលអាចនៅមានតម្រូវការ។ លោកអគ្គនាយកបានប្តេជ្ញាចិត្ត និងផ្តល់ការយកចិត្តទុកដាក់លើក្របខណ្ឌកិច្ចសហប្រតិបត្តិការរវាងក្រុមហ៊ុនជាមួយក្រសួងសុខាភិបាល តាមការណែនាំរបស់លោករដ្ឋមន្ត្រី ដើម្បីធានាបាននូវនវានុវត្តន៍សេវាសុខាភិបាល ប្រកបដោយប្រសិទ្ធភាព និងស័ក្តិសិទ្ធភាព។

លោករដ្ឋមន្ត្រី បានសំដែងនូវការស្វាគមន៍គាំទ្រកិច្ចសហប្រតិបត្តិការពាក់ព័ន្ធនឹងគំនិតផ្តួចផ្តើមរបស់ក្រុមហ៊ុនលើគម្រោងផលិតអុកស៊ីសែន នៅមន្ទីរពេទ្យសាធារណៈនៅកម្ពុជា ដោយលោករដ្ឋមន្ត្រីបានស្នើសុំឱ្យក្រុមហ៊ុនពិភាក្សាការងារជាមួយ
អ្នកជំនាញបច្ចេកទេសរបស់ក្រសួងជាមុនដើម្បីកំណត់ពីមន្ទីរពេទ្យដែលនៅមានតម្រូវការជាក់ស្តែងព្រោះថា គម្រោងនេះចាំបាច់ត្រូវតែយកចិត្តទុកដាក់ខ្ពស់លើភាពសុក្រិតនៃសម្ភារៈបរិក្ខារ ព្រោះថា អុកស៊ីសែនជាឱសថដែលមានប្រសិទ្ធភាព ស័ក្តិសិទ្ធភាព និងគុណភាពខ្ពស់ក្នុងការព្យាបាល និងជួយអាយុជីវិតអ្នកជំងឺ។

លើសពីនេះទៀតលោករដ្ឋមន្ត្រីបានលើកឡើងថា គម្រោងនេះគួរតែមានការអនុវត្តជំហានតូចដើម្បីជាគម្រោងការសាកល្បងគំរូមុននឹងសម្រេចលើគម្រោងបន្ទាប់​ និងសុំឱ្យមានទស្សនៈកិច្ចសិក្សារបស់ក្រុមហ៊ុនទៅមន្ទីរពេទ្យដែលមានម៉ាស៊ីនផលិតអុកស៊ីសែនឈានមុខគេ និងមន្ទីរពេទ្យដែលនៅមានតម្រូវការជំនួយលើការងារនេះផងដែរ៕

អត្ថបទ៖ សំអឿន