សាកលវិទ្យាល័យន័រតុន រៀបចំពិធីប្រគល់រង្វាន់ដល់និស្សិតជ័យលាភីផ្នែកសរសេរ និងនិយាយភាសាអង់គ្លេស

នៅព្រឹកថ្ងៃទី២២ ខែវិច្ឆិកា ឆ្នាំ២០២៤ នេះ សាកលវិទ្យាល័យន័រតុន (NU) បានរៀបចំពិធីប្រគល់រង្វាន់ដល់និស្សិតជ័យលាភីផ្នែកសរសេរ និងនិយាយភាសាអង់គ្លេស។ ពិធីប្រគល់នេះ ប្រព្រឹត្តទៅក្រោមអធិបតីភាព លោក ដូមីនីក វីលៀមស៍ (Dominic Williams) ឯកអគ្គរាដ្ឋទូតអង់គ្លេសប្រចាំដកម្ពុជា លោក Robert Wightman ប្រធានផ្នែក នៃមហាវិទ្យាល័យអក្សរសាស្រ្ត មនុស្សសាស្ត្រ និងភាសា នៃសាកលវិទ្យាល័យន័រតុន និងមានការចូលរួមពីម្ចាស់ជ័យលាភី និងនិស្សិតសរុបប្រមាណ ៣២០ នាក់។

នាពិធីនេះ លោក Robert Wightman មានប្រសាសន៍ថា ការរៀបចំពិធីផ្តល់រង្វាន់នេះ  គឺដើម្បីទទួលស្គាល់នូវកិច្ចខិតខំប្រឹងប្រែងរបស់និស្សិតដែលបានចូលរួមប្រកួតប្រជែងផ្នែកសរសេរ និងនិយាយភាសាអង់គ្លេសបានយ៉ាងស្ទាត់ជំនាញ។ លោកបញ្ជាក់ថា៖«ក្នុងនាមជាគ្រូបង្រៀន និងអ្នកបង្ហាត់បង្រៀន​ យើងទាំងអស់គ្នាសង្ឃឹមថា កម្មវីធីទាំងអស់នេះ​នឹងលើកទឹកចិត្តនិស្សិតរបស់យើងឱ្យដើរតាមគន្លង​នៃអ្នកដែលទទួលបានជោគជ័យនាពេលបច្ចុប្បន្ននេះ ហើយត្រូវបានបំផុសគំនិតគំរូដ៏ល្អរបស់គេ ដើម្បីធ្វើការសិក្សាឱ្យកាន់តែខ្លាំង និងខិតខំឱ្យកាន់តែល្អ»។

លោកបានឱ្យដឹងថា ភាសាអង់គ្លេសត្រូវបានមនុស្សរាប់លាននាក់នៅជុំវិញពិភពបានប្រើប្រាស់សម្រាប់ការប្រើប្រាស់ប្រចាំថ្ងៃ ប្រើប្រាស់សម្រាប់វិស័យការទូត សេដ្ឋកិច្ច និងនៅក្នុងកិច្ចប្រជុំអន្តរជាតិនានា។ ក្នុងន័យនេះ ទោះបីជានិន្នាការបច្ចុប្បន្នមានការកើនឡើងនូវបញ្ញាសិប្បនិម្មិត (AI) និងឧបករណ៍ជំនួយដល់ការសិក្សាក៏ដោយ លោកថា ការប្រើប្រាស់ភាសាអង់គ្លេសនៅតែមានសារៈសំខាន់។

ជាមួយគ្នានេះ លោក ដូមីនីក វីលៀមស៍ បានលើកឡើងថា ការរៀនភាសាអង់គ្លេសមានសារៈសំខាន់ណាស់ ព្រោះភាសាអង់គ្លេសជួយឱ្យសិស្សមានចំណេះដឹងទូលំទូលាយសម្រាប់សិក្សាស្រាវជ្រាវ ទាំងផ្នែកការទូត បច្ចេកវិទ្យា និងសេដ្ឋកិច្ច។ បើតាមលោក វីលៀមស៍ បច្ចុប្បន្នឯកសាជាច្រើនបានរក្សាទុកជាភាសាអង់គ្លេស ដូច្នេះប្រសិនជាសិស្សចង់ដឹងពីប្រធានបទណាមួយ គឺត្រូវមានចំណេះដឹងផ្នែកភាសាអង់គ្លេស។ លោកបញ្ជាក់ថា៖«លើសនេះ នៅក្នុងពិភពលោក ភាសាអង់គ្លេស ត្រូវបានគេប្រើប្រាស់ជាអន្តរជាតិ ហេតុនេះលោកគិតថា សិស្សានុសិស្សនៅកម្ពុជាគួរតែសិក្សាភាសាអង់គ្លេស ដើម្បីមានឱកាសច្រើនជាងមុន»៕