ស្ងប់ស្ងាត់មួយ​ថ្ងៃ ឃុំ​សំពៅពូន​ផ្ទុះ​​រាលដាល​ជា​ថ្មី រកឃើញអ្នកឆ្លងកូវីដ ២៣ នាក់

បុរស​ស្រ្តី ២៣ នាក់ មានទាំង​ជនជាតិ​ចិន និង​ខ្មែរ បាន​ឆ្លង​កូវីដ​ស្ថិត​នៅ​ក្នុង​ឃុំ​សំពៅពូន ស្រុក​កោះធំ​ខេត្ត​កណ្តាល។ ឃុំ​ដែល​អាជ្ញាធរ​ប្រកាស​អាសន្ន​បិទ​ការ​ចេញចូល កាល​ពី​ម្សិលមិញ​មិន​មាន​ករណីឆ្លង​ថ្មី តែ​ថ្ងៃ​នេះ​ឃុំ​មួយ​នេះបាន​ផ្ទុះ​អ្នក​ឆ្លង​រហូត​ដល់ ២៣ នាក់។ ជនរងគ្រោះទាំង ២៣ នាក់​មាន​ចិន ២០ នាក់ និង​ខ្មែរ ០៣ នាក់។

ក្រសួង​សុខាភិបាល​បាន​ប្រកាសរក​ឃើញ​ករណី​ឆ្លងកូវីដ១៩ ចំនួ​ន ៥៤ នាក់នៅថ្ងៃ​នេះ ខណៈករណីជាសះស្បើយមានចំនួន ១៨នាក់។ ចំនួនអ្នកឆ្លងសរុបមានចំនួន ១៦៣២នាក់ អ្នក​ពាក់ព័ន្ធព្រឹត្តិការណ៍សហគមន៍ ២០កុម្ភៈ ១១១៥នាក់ និងអ្នកជាសះស្បើយសរុបមាន ៩៣៥នាក់។

អាជ្ញាធរ​ខេត្ត​កណ្តាល​បានសម្រេច​បិទ​ភូមិ​ចំនួន​៣​នៅ​ក្នុង​ឃុំ​សំពៅ​ពូន ដើម្បី​ទប់ស្កាត់​ការឆ្លង​រីក​រាលដាល​ជំងឺ​កូ​វីដ​១៩​ចូល​សហគមន៍​ទ្រង់ទ្រាយ​ធំ​។ ភូមិ​ទាំង ៣ មាន​ភូមិ​ព្រែក​សឹង្គ ភូមិ​ព្រែក​ជ្រៃ​និង​ភូមិ​ព្រែក​ស្បូវ​។ ភូមិ​ទាំង ៣ ជា​មូលដ្ឋាន​នៃ​កាស៊ីណូ​ទាំង ៦ ជាប់​ព្រំដែន​វៀតណាម ហើយ​អាជ្ញាធរ​ចុះ​បិទ​ការចេញចូល​​របស់​ប្រជាពលរដ្ឋ។

គិតត្រឹមថ្ងៃទី២០ ខែមីនាឆ្នាំ២០២១នេះ ខេត្តកណ្តាលមានអ្នកឆ្លងកូវីដ១៩ក្នុងព្រឹត្តិការណ៍សហគមន៍២០កុម្ភៈកើនឡើងដល់២៩៥នាក់ហើយ និងមានអ្នកជាសះស្បើយចំនួន១៤នាក់។

ក្នុងចំណោមអ្នកឆ្លងសរុបចំនួន២៩៥នាក់ នៅក្នុងស្រុកកោះធំមានអ្នកឆ្លងជិត២០០នាក់ក្នុងនោះនៅក្នុងភូមិព្រែកសឹង្គមួយមានអ្នកឆ្លងចំនួន១០៤នាក់៕