សំរាមជាច្រើនកន្លែងក្នុងខេត្តមណ្ឌលគិរី ត្រូវបានសម្អាត ដើម្បីលើកកម្ពស់សោភណភាព ស្របពេលបុណ្យចូលឆ្នាំថ្មីខិតចូលមកដល់

រថយន្តដឹកសំរាម និងមនុស្សជាច្រើនក្រុម បាននាំគ្នាទៅសម្អាតបរិស្ថានសំរាមតូចធំតាមដងផ្លូវសាធារណៈដើម្បីលើកកម្ពស់សោភណភាពនៅក្នុងក្រុង និងអនាម័យស្អាត ស្របពេលដែលពិធីបុណ្យចូលឆ្នាំប្រពៃណីជាតិខ្មែរ ខិតកៀកចូលមកដល់នៅពេលប៉ុន្មានសប្ដាហ៍ទៀតខាងមុខ។

នៅថ្ងៃទី១៩ ខែមីនា ឆ្នាំ២០២៥ អាជ្ញាធរខេត្ត មន្ត្រីរាជការ សិស្សានុសិស្ស បាននាំគ្នាបើកយុទ្ធនាការសម្អាតបរិស្ថានជាច្រើនកន្លែង ក្នុងក្រុងសែនមនោរម្យ ដោយមានការគាំទ្រពីអង្គការបូដាកម្ពុជា ដែលធ្វើឡើងស្ថិតនៅលើសួនដំរីដែកក្រុងសែនមនោរម្យ។ ក្នុងនោះអង្គការបូដាកម្ពុជា បានជំរុញ និងបំផុសបំផុលដល់យុវជន គ្រប់ស្រទាប់ឱ្យចូលរួមស្រលាញ់បរិស្ថាន «ថ្ងៃនេះខ្ញុំមិនប្រើថង់ប្លាស្ទិក ទីក្រុងគ្មានសំរាម» ដើម្បីចូលរួមចំណែក ឆ្លើយតបផែនការចក្ខុវិស័យ និងផែនការតាមវិស័យក្រុងសែនមនោរម្យនៅឆ្នាំ២០៤០។

ជាមួយគ្នានេះ អាជ្ញាធរខេត្ត បានអំពាវនាវដល់សាធារណជន ក៏ដូចជាអាជីវករទាំងអស់ត្រូវនាំគ្នាស្រឡាញ់បរិស្ថាន កុំបោះសំរាមចោលផ្ដេសផ្ដាស ត្រូវទុកដាក់សំរាមឱ្យបានត្រឹមត្រូវចូលក្នុងធុងសំរាមដែលរដ្ឋបាលខេត្តបានពង្រាយនៅតាមទីធ្លាសាធារណៈក្នុងក្រុងសែនមនោរម្យ ដើម្បីចៀសវាងទុកដាក់សំរាមពាសវាលពាសកាលដែលធ្វើឱ្យប៉ះពាល់ ដល់សោភណភាព និងភ្ញៀវទេសចរដែលបានមកកម្សាន្តនៅក្នុងខេត្តមណ្ឌលគិរី។

ខេត្តមណ្ឌលគិរី ជាខេត្តមួយមានសក្តានុពលខ្លាំងផ្នែកទេសចរណ៍ធម្មជាតិ ដែលអាចទាក់ទាញភ្ញៀវទេសចរជាតិ និងអន្តរជាតិឱ្យចូលមកទស្សនាកម្សាន្តយ៉ាងច្រើនសន្ធឹកសន្ធាប់ ក្នុងមួយឆ្នាំៗទៅកាន់តំបន់ផ្សេងៗ រួមទាំងក្រុងសែនមនោរម្យផងដែរ៕

អត្ថបទ៖រៀម សុខហេង