ក្រសួង​បរិស្ថាន​ ចាត់​មន្ត្រី​ជំនាញ​ចុះ​ពិនិត្យ​​បន្ទាន់ ខណៈមានវិដេអូទឹក​កខ្វក់​ហូរចូល​ទន្លេ​ក្បែរ​ស្ថានីយ​ទឹកស្អាតជ្រោយចង្វារ

ភ្នំពេញ ៖ បន្ទាប់ពី​មាន​វិដេអូ​មួយ​ បានបង្ហាញ​ពី​ការ​បង្ហូរ​ទឹក​កខ្វក់​ចូលទៅក្នុងទន្លេមេគង្គ​ក្បែរ​ស្ថានីយទឹកស្អាតជ្រោយ​ចង្វារ កាល​ថ្ងៃទី០២ ខែមេសា ឆ្នាំ២០២៥ លោក អ៊ាង សុផល្លែត រដ្ឋមន្ត្រីក្រសួងបរិស្ថាន បានចាត់ឱ្យមន្ត្រី​ជំនាញឱ្យចុះពិនិត្យទីតាំងជាក់ស្ដែង និងចុះសិក្សាពីមូលហេតុជាបន្ទាន់។

ក្រោយ​ចុះសិក្សា និងពិនិត្យដល់ទីតាំង ក្រុមការងារនាយកដ្ឋានគ្រប់​គ្រង​គុណភាពទឹក នៃ​ក្រសួងបរិស្ថាន​ បានរកឃើញថា ទឹកកខ្វក់នេះ មានប្រភពចេញពីលំនៅឋាន ភោជនីយដ្ឋាន និងអគារពាណិជ្ជកម្មក្នុងភូមិសាស្ត្រភូមិ៣ សង្កាត់ជ្រោយ​ចង្វារ ខណ្ឌជ្រោយចង្វារ។ ហើយ​ប្រព័ន្ធលូ​នៅទីតាំង​ខាងលើនេះ ជា​ប្រភេទលូរួមជាមួយលូទឹកភ្លៀងនឹងលូទឹកកខ្វក់ តែមិនមាន​ប្រព័ន្ធ​ប្រព្រឹត្តិកម្ម​ទឹក​កខ្វក់​ សម្រាប់ចម្រោះទឹកនោះទេ។

ទឹកកខ្វក់ពីលំនៅដ្ឋាន អាហារដ្ឋាន អគារពាណិជ្ជកម្ម ក៏ដូចជារោងចក្រ​សហ​គ្រាសនានា ជាប្រភពដែលបង្កផលប៉ះពាល់ដល់ទឹកសាធារណៈ ប៉ះពាល់​ការ​​​រស់​នៅ​​របស់ប្រជាពលរដ្ឋ និងជីវៈចម្រុះនៅក្នុងទឹក។

លោក អ៊ាង សុផល្លែត រដ្ឋមន្ត្រីក្រសួងបរិស្ថាន បាននឹងកំពុងពង្រឹងការគ្រប់គ្រង​ទឹក​កខ្វក់នៅតាមរោងចក្រសហគ្រាសនានា តាមរយៈការកសាងអាងប្រព្រឹត្ត​កម្មទឹកកខ្វក់ បន្ទាប់មកលោកនឹងបន្តការកសាងអាងប្រព្រឹត្តកម្មទឹកកខ្វក់ ដែលមានប្រភពចេញពីលំនៅឋាន អាហារដ្ឋាន និងអគារពាណិជ្ជកម្មផ្សេង​នៅ​តាម​ទីប្រជុំជន និងតាមទីជនបទនានា។

លោកបានបង្ហាញការប្តេជ្ញាចិត្តខ្ពស់​ក្នុង​ការរក្សាបរិស្ថានកម្ពុជាឱ្យល្អស្អាត។ លោករដ្ឋមន្ត្រី ក៏បានដាក់ចេញ​នូវ​យុទ្ធ​នា​ការជាច្រើន ដើម្បីថែរក្សាការពារបរិស្ថាន និងការពារគុណភាពទឹក​សាធារ​ណៈ​តាមទន្លេ ស្ទឹង បឹងបួរ។

សូម​បញ្ជាក់​ថា ការ​គ្រប់គ្រងទឹកកខ្វក់ ធានារក្សាឱ្យបានគុណភាពទឹកទន្លេ ស្ទឹង បឹងបួរ ត្រូវ​បាន​គិតគូរខ្ពស់ពីសំណាក់រាជរដ្ឋាភិបាល និងក្រសួងបរិស្ថាន ដែលជា​សេនា​ធិការ។ ការរក្សាបានគុណភាពទឹក គឺ​ទាមទារ​ឱ្យមានការរៀបចំប្រព័ន្ធលូ ប្រព័ន្ធ​បង្ហូរ​ទឹកកខ្វក់ចេញពីរោងចក្រ សហគ្រាស លំនៅឋាន អាហារដ្ឋាន និងអគារពាណិជ្ជកម្មនានា​ឱ្យ​បានត្រឹម បន្ទាប់​មក​សាងសង់​អាង​ប្រព្រឹត្តិកម្ម​ទឹក​កខ្វក់ ដើម្បី​ចម្រោះទឹកកខ្វក់ទាំងនោះ​មុនបង្ហូរចេញទៅទីសាធារណៈ៕

កែសម្រួលដោយ ៖ នាគព័ន្ធ