ព័ត៌មានជាតិ

កម្ពុជា រៀបចំចាក់ផ្សាយកម្មវិធី “ប្រយោគបុរាណចិនដែលលោក ស៊ី ជីនពីង ចូលចិត្ត”

បានផុស

១ year មុន

នៅ

ថ្ងៃសុក្រ ១៨ មេសា ២០២៥

ដោយ

ស្របដែលប្រធានាធិបតីចិន លោក ស៊ី ជីនពីង អញ្ជើញមកទស្សនកិច្ចផ្លូវរដ្ឋនៅកម្ពុជា ភាគីកម្ពុជាតាមរយៈក្រសួងពាក់ព័ន្ធ បានរៀបចំពិធីសម្ពោធការចាក់ផ្សាយកម្មវិធី “ប្រយោគបុរាណចិនដែលលោក Xi Jinping ចូលចិត្ត” ។

ពិធីសម្ពោធនេះ ត្រូវបានរៀបចំឡើងនៅថ្ងៃទី ១៧ ខែមេសា ឆ្នាំ ២០២៥ ដោយមានការចូលរួមពីថ្នាក់ដឹកនាំកម្ពុជា-ចិន ជាច្រើនរូប ចូលរួមចុចបង្គោលពន្លឺភ្លើង ដើម្បីសម្ពោធការចាក់ផ្សាយកម្មវិធីនេះនៅតាមប្រព័ន្ធផ្សព្វផ្សាយធំៗនៅកម្ពុជា។ ថ្នាក់ដឹកនាំកម្ពុជាដែលចូលរួមក្នុងកម្មវិធីនោះរួមមាន ប្រធានរាជបណ្ឌិត្យសភាកម្ពុជាលោក សុខ ទូច រដ្ឋមន្ត្រីក្រសួងទេសចរណ៍លោក ហួត ហាក់ រដ្ឋមន្ត្រីក្រសួងព័ត៌មាន នេត្រ ភក្ត្រា និងរដ្ឋមន្ត្រីក្រសួងវប្បធម៌ និង វិចិត្រសិល្បៈលោកស្រី ភឿង សកុណា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែកភាគីចិន មានការអញ្ជើញចូលរួមពីលោក Shen Haixiong អនុរដ្ឋមន្ត្រីក្រសួងឃោសនាការចិន និងជាអគ្គនាយកអគ្គស្ថានីយវិទ្យុនិងទូរទស្សន៍មជ្ឈិមចិន និងមានការចាក់វីដេអូសន្ទរកថារបស់លោក Wang Wenbin ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋប្រជាមានិតចិន ប្រចាំនៅកម្ពុជា។

លោក Shen Haixiong អនុរដ្ឋមន្ត្រីក្រសួងឃោសនាការចិន មានប្រសាសន៍ថា កម្មវិធីនេះយកសម្រង់កំណាព្យ និងសុភាសិតបុរាណចិន ដែលដកស្រង់ចេញពីសន្ទរកថា អត្ថបទ និងកិច្ចការសំខាន់ៗរបស់លោក ស៊ី ជីនពីង ដែលផ្តោតសំខាន់លើប្រធានបទដូចជា ការការពារបរិស្ថាន ការបន្តស្នង និងការច្នៃប្រឌិតវប្បធម៌ ការផ្លាស់ប្តូរ និងការរៀនសូត្រពីគ្នាខាងអរិយធម៌ ជាដើម។

ក្នុងនាមប្រធានរាជបណ្ឌិតសភាកម្ពុជា លោក សុខ ទូច មានប្រសាសន៍ថា ការចាក់ផ្សាយ ប្រយោគបុរាណចិនដែលលោក ស៊ី ជីនពីង ចូលចិត្ត” គឺជាចលករមួយដ៏សំខាន់ក្នុងការជំរុញទំនាក់ទំនងទ្វេភាគីកាន់តែរឹងមាំ និងការផ្លាស់ប្តូរវប្បធមធ៌រវាងប្រទេសទាំងពីរ។ លោកមានប្រសាសន៍ថា៖«កម្ពុជា និងចិន បានធ្វើការផ្លាស់ប្តូរវប្បធម៌កាន់តែស៊ីជម្រៅ ហើយការជំរុញការផ្លាស់ប្តូររវាងប្រជាជន និងប្រជាជន កម្ពុជា និងចិន ឱ្យដល់កម្រិតខ្ពស់ជាទំព័រប្រវត្តិសាស្រ្តថ្មីរវាងប្រជាជាតិទាំងពីរកាន់តែរឹងមាំ»។

ក្រសួងការបរទេសកម្ពុជា ចាត់ទុកថា ទស្សនកិច្ចផ្លូវរដ្ឋនេះ ជាព្រឹត្តិការណ៍ដ៏សំខាន់ដែលនឹងធ្វើឱ្យកាន់តែរឹងមាំថែមទៀតនូវចំណងមិត្តភាពជាប្រពៃណីដែលត្រូវបានកសាងឡើងដោយថ្នាក់ដឹកនាំជាបន្តបន្ទាប់នៃប្រទេសទាំងពីរ។ ទស្សនកិច្ចនេះ ក៏នឹងបង្កើនសារៈសំខាន់បន្ថែមទៀតដល់ចំណងមិត្តភាពដែកថែប និងភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រជាជាតិទាំងពីរ៕