សម្តេចធិបតី៖​ ការបាត់បង់ជីវិតដោយគ្រោះថ្នាក់ចរាចរណ៍ ជាឃាតករសម្លាប់មនុស្សច្រើនជាងគេនៅកម្ពុជា

អញ្ជើញជាអធិបតីភាពសម្ពោធផ្លូវជាតិ ៣ខ្សែតម្លៃ ១៨៨ លានដុល្លារ នៅថ្ងៃទី ២៩ ខែមេសានេះ នាយករដ្ឋមន្រ្តី សម្តេចធិបតី ហ៊ុន ម៉ាណែត បានលើកឡើងថា ការបាត់បង់ជីវិតដោយគ្រោះថ្នាក់ចរាចរណ៍ ជាឃាតករសម្លាប់មនុស្សច្រើនជាងគេនៅកម្ពុជាប៉ុន្មានឆ្នាំនេះ ក្រោយពីសង្គ្រាម។

ជាមួយគ្នានេះ សម្តេចធិបតី អំពាវនាវឱ្យប្រជាពលរដ្ឋប្រើប្រាស់ផ្លូវគោរពច្បាប់ចរាចរណ៍ និងស្នើឱម្ចាស់សត្វពាហនៈដូចជា គោ ក្របី និងឆ្កែជាដើម គ្រប់គ្រងឱ្យបានត្រឹមត្រូវ។ សម្តេចថ្លែងថា៖«ល្បឿនប្រើប្រាស់កុំលឿនពេក ជាពិសេស ម៉ូតូរថយន្តនៅកន្លែងភូមិ ព្រោះប្រជាពលរដ្ឋឆ្លងកាត់។ គ្រោះថ្នាក់ការបាត់បង់ជីវិតដោយគ្រោះថ្នាក់ចរាចរណ៍ ជាឃាតករសម្លាប់មនុស្សច្រើនជាងនៅកម្ពុជាប៉ុន្មានឆ្នាំនេះ  ក្រោយពីសង្គ្រាម»។

សម្តេចធិបតី បន្ថែមថា កាលពីមុន កម្ពុជាមានសង្គ្រាម មានកាំភ្លើង បាញ់គ្នាបង្កឱ្យមានមនុស្សស្លាប់ច្រើន ប៉ុន្តែបច្ចុប្បន្ននេះ គ្រោះថ្នាក់ចរាចរណ៍ដែលជាឃាតករលាក់មុខ បានសម្លាប់មនុស្សច្រើនជាងគេក្នុងមួយឆ្នាំៗ។ សម្តេចថា៖«កាលមុនវៃគ្នាមានគ្រាប់កាំភ្លើង បាញ់គ្នា​ចប់សង្គ្រាមមានគ្រាប់មីន សម្លាប់ច្រើននាក់ តែគ្រោះថ្នាក់ចរាចរណ៍ច្រើនជាង»។

ជាមួយគ្នានេះ សម្តេចធិបតី ស្នើឱ្យពលរដ្ឋចូលរួមប្រើប្រាស់ផ្លូវឱ្យបានត្រឹមត្រូវ និងចូលរួមថែរក្សាប្រព័ន្ធហេដ្ឋារចនាសម្ព័ន្ធរបស់យើង​ ផ្លូវដែក ផ្លូវថ្នល់ ទាំងអស់គ្នា។ សម្តេចធិបតីសង្កត់ធ្ងន់ថា៖«កុំឱ្យផ្លូវកាន់តែរលងគ្រោះថ្នាក់កាន់តែច្រើន ទាំងការជិះ ការធ្វើដំណើរ ទាំងអ្នកបើកបររថយន្ត ទាំងអ្នកជិះម៉ូតូ និងអ្នករត់កាត់ផ្លូវ គោរពច្បាប់»។

គួរជម្រាបថា ក្នុងឆ្នាំ២០២៤ ករណីគ្រោះថ្នាក់ចរាចរណ៍ផ្លូវគោកមានចំនួន ២ ៨៤៤ លើក ដែលបានបង្កឱ្យមានមនុស្សស្លាប់ចំនួន ១ ៥០៩នាក់ ដែលចំនួនគ្រោះថ្នាក់ចររាចរណ៍ផ្លូវគោកក្នុងឆ្នាំ២០២៤ បានថយចុះចំនួន ១៤% បើធៀបនឹងឆ្នាំ ២០២៣។ នេះបើតាមរបាយការណ៍ប្រចាំឆ្នាំ២០២៤ របស់ក្រសួងសាធារណការ និងដឹកជញ្ចូន៕