អ្នកជំនាញ៖ ការបង្កើតមន្ទីរពេទ្យតម្លៃ ៣០០លានដុល្លារ របស់វិស័យឯកជន នឹងរួមចំណែកលើកស្ទួយវិស័យសុខាភិបាលនៅកម្ពុជា

ថ្មីៗនេះវិស័យឯកជន បានបោះទុនវិនិយោគរួមគ្នាចំនួន ៣០០លានដុល្លារ សាងសង់មន្ទីរពេទ្យថ្មី (មន្ទីរពេទ្យកម្ពុជា) ដើម្បីផ្តល់សេវាវេជ្ជសាស្ត្រលំដាប់ស្តង់ដាពិភពលោក នៅក្នុងស្រុក ដោយគ្រោងនឹងចាប់ផ្ដើមការសាងសង់នៅក្នុងឆ្នាំ២០២៦។ ក្នុងនាជាអ្នកជំនាញទស្សនវិជ្ជា និងកិច្ចការសង្គមនៃរាជបណ្ឌិត្យសភាកម្ពុជា លោកបណ្ឌិត ឈត​ ប៊ុនថង យល់ថា ការបង្កើតមន្ទីរពេទ្យថ្មីនេះ នឹងរួមចំណែកយ៉ាងសំខាន់ ក្នុងការលើកស្ទួយវិស័យសុខាភិបាលនៅកម្ពុជា។

តាមរយៈកិច្ចសម្ភាសជាមួយ «កម្ពុជាថ្មី» នាថ្ងៃទី២៩ ខែមេសា ឆ្នាំ២០២៥ លោកបណ្ឌិត ឈត​ ប៊ុនថង បានបញ្ជាក់ថា ការដែលវិស័យឯកជនរួមគ្នាបោះទុនវិនិយោគចំនួន ៣០០លានដុល្លារ ដើម្បីសាងសង់មន្ទីរពេទ្យស្តង់ដាពិភពលោកនេះ គឺជារឿងដែលល្អ ហើយជាការវិនិយោគដែលធំជាងគេបំផុតលើកដំបូងលើវិស័យសុខាភិបាល របស់វិស័យឯកជន។

ចំពោះការបោះទុនវិនិយោគមន្ទីរពេទ្យថ្មី របស់វិស័យឯកជនក្នុងទំហំទឹកប្រាក់ដ៏ច្រើននេះ លោកបណ្ឌិតសង្ឃឹមថា ពេលដែលមន្ទីរពេទ្យសាងសង់រួច ប្រជាពលរដ្ឋខ្មែរ នឹងទទួលបានសេវាសុខាភិបាលគ្រប់គ្រាន់ទាំងកម្រិតធម្មតា មធ្យម និងស្តង់ដាខ្ពស់បំផុត ហើយលែងខ្វះមន្ទីរពេទ្យ គ្រូពេទ្យ និងសេវាសុខាភិបាលទៀត។

លោកបណ្ឌិតបន្តថា កន្លងមកស្ថាប័នរដ្ឋ បានធ្វើទំនើបកម្មទៅលើមន្ទីរពេទ្យ សម្ភារៈបរិក្ខារបស់ពេទ្យ និងការផ្តល់សេវាកម្មជាបណ្តើរៗ ដោយគិតមកដល់ពេលនេះមន្ទីរពេទ្យរដ្ឋមួយចំនួនត្រូវបានកែលម្អរ និងសាងសង់អគារថ្មីៗជាច្រើន ចំណែកវិស័យឯកជន ក៏បានបង្កើតមន្ទីរពេទ្យជាច្រើន ទាំងកម្រិតក្នុងស្រុក និងការវិនិយោគពីបរទេសផងដែរ។

ស្របពេលដែលវិស័យសុខាភិបាលសាធារណៈបាន និងកំពុងកែលម្អរខ្លួនជាបណ្តើរៗ ហើយមានវិស័យឯកជនចូលរួម បង្កើនគ្រូពេទ្យ បរិក្ខាពេទ្យ សេវាកម្មល្អប្រសើរនៅក្នុងការបង្កើតមន្ទីរពេទ្យថ្មីទៀតនោះ លោកបណ្ឌិតថា ការណ៍នេះនឹងរួមចំណែកយ៉ាងសំខាន់ក្នុងការលើកស្ទួយដល់វិស័យសុខាភិបាលនៅកម្ពុជា។ ម្យ៉ាងវិញទៀត ជួយលើកម្ពស់ដល់សុខមាលភាព ការថែទាំសុខភាព ការព្យាបាល និងការសង្រ្គោះប្រជាពលរដ្ឋបានកាន់តែល្អប្រសើរឡើង។

ជាងនេះទៅទៀត លោកបណ្ឌិតសង្ឈឹមថា​ ការសាងសង់មន្ទីរពេទ្យតម្លៃ ៣០០លានដុល្លារនេះ នឹងមានការសិក្សាច្បាស់លាស់ ជាពិសេសការសិក្សាពីបទពិសោធល្អ គំរូល្អ របៀបផ្តល់សេវាល្អៗរបស់ពិភពលោក។ ព្រមទាំងការពិនិត្យមើលទៅលើសមត្ថភាពគ្រូពេទ្យ សសម្ភារៈបច្ចេកទេសបរិក្ខា សីលធម៌ គុណធម៌របស់គ្រូពេទ្យ រួមទាំងចមណុចខ្វះខាតផ្សេងៗទៀត ដើម្បីធានាបានថា ការបោះទុនវិនិយោគនេះ បានផ្តល់នូវសេវាគ្រប់គ្រាន់ផង ផ្តល់នូវសមត្ថភាពក្នុងការព្យាបាល ការសង្គ្រោះ ក៏ដូចជាការជួយទៅដល់ការថែទាំសុខភាពពលរដ្ឋផង និងលើកកម្ពស់ការផ្តល់សេវានៅក្នុងប្រទេសផងដែរ។

ពាក់ព័ន្ធនឹងការសាងសង់មន្ទីរពេទ្យឯកជនតម្លៃ ៣០០លានដុល្លារ នេះដែរ កម្ពុជាថ្មី បានទាក់ទងទៅ លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល ដើម្បីសុំការបញ្ជាក់បន្ថែម ប៉ុន្តែលោកស្រីថា ខ្លួនមិនមានព័ត៌មាននេះទេ៕

អត្ថបទ៖ គេន ម៉ាលិះ