ព័ត៌មានជាតិ

ក.អ.ក ប្រមូលចំណូលសេវាបានជាង១លាន៤សែនដុល្លារបន្ទាប់ពីដាក់ដំណើរប្រព័ន្ធ cdcOSP

បានផុស

១ year មុន

នៅ

ថ្ងៃអង្គារ ២០ ឧសភា ២០២៥

ដោយ

ក្រុមប្រឹក្សាអភិវឌ្ឍន៍កម្ពុជា ហៅកាត់ថា ក.អ.ក បានឱ្យដឹងថាក្នុងរយៈពេល៩ខែចាប់តាំងបានដាក់ឱ្យប្រើប្រាស់ប្រព័ន្ធទូទាត់ប្រាក់រួម cdcOSP មកស្ថាប័នមួយនេះទទួលបានចំនួនសេវាសាធារណៈបានប្រមាណ ៥,៧ពាន់លានរៀល ដែលស្មើនឹងប្រមាណ ១លាន៤សែនដុល្លារអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្ដីប្រកាសព័ត៌មានស្ដីពីការចុះ MOU ជាមួយធនាគារ អេស៊ីលីដា ថ្ងៃទី២០ ខែឧសភា ឆ្នាំ២០២៥នេះ ក្រុមប្រឹក្សាអភិវឌ្ឍន៍កម្ពុជាឱ្យដឹងថាទឹកប្រាក់ដែលប្រមូលបានពីប្រព័ន្ធទូទាងប្រាក់រួម cdcOSP ចំនួន៥,៧ពាន់លានរៀលនេះស្មើនឹងប្រមាណ ៣៥%នៃចំណូលពីសេវាសាធារណៈរបស់ក្រុមប្រឹក្សាអភិវឌ្ឍន៍កម្ពុជា។

ប្រព័ន្ធទូទាត់ cdcOSP ត្រូវបានដាក់ឱ្យដំណើរការចាប់តាំងពីថ្ងៃទី៣១ ខែកក្កដា ឆ្នាំ២០២៤ ដើម្បី សម្រួលដល់អ្នកវិនិយោគទាំងអស់ក្នុងការបង់សេវាសេវាផ្សេងៗរបស់ ក.អ.ក ធ្វើការទូទាត់ប្រាក់ក្នុង និងឆ្លងធនាគារតាមរយៈ Bakong KHQR របស់ធនាគារជាតិ និងតាមរយៈកម្មវិធីទូរស័ព្ទចល័ត Mobil Banking ព្រមទាំងផ្ដល់លទ្ធភាពធ្វើការទូទាងប្រាក់តាមប្រព័ន្ធអន្តរជាតិដូចជា VISA និង MasterCard ផងដែរ។

កាលពីព្រឹកថ្ងៃទី២០ ខែឧសភានេះ ក.អ.ក ទើបបានចុះអនុស្សារណដើម្បីតភ្ជាប់ប្រព័ន្ធ cdcOSP ជាមួយធនាគារអេស៊ីលីដាផងដែរ ដែលបានបង្ហាញពីការគាំទ្រដល់ការអភិវឌ្ឍសេដ្ឋកិច្ចជាតិ និងឆ្លុះបញ្ចាំងពីការប្តេជ្ញាចិត្តរួមគ្នាក្នុងការបន្តពង្រឹងអភិបាលកិច្ច បង្កើនល្បឿននៃការធ្វើឌីជីថលូបនីយកម្ម លើកកម្ពស់បរិយាកាសវិនិយោគនៅកម្ពុជា ព្រមទាំងផ្តល់ជម្រើសដ៏សំបូរបែបដល់អ្នកស្នើសុំសេវាសាធារណៈរបស់ ក.អ.ក. ក្នុងការទូទាត់ប្រាក់កម្រៃសេវា។

ការប្រមូលចំណូលបានល្អប្រសើររបស់ ក.អ.ក. ក៏ស្របគ្នានឹងការវិនិយោគពីបរទេសមកកម្ពុជាកើនឡើងផងដែរ ដោយក្នុងរយៈពេល៤ខែក្នុងឆ្នាំ២០២៥នេះ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន២៣១ ដែលមានទុនសរុបជាង៣,៤ពាន់លានដុល្លារ៕