ព័ត៌មានជាតិ

ភរិយានាយករដ្ឋមន្ត្រី អំពាវនាវគាំទ្រយុទ្ធនាការ «១ ម៉ឺនរៀល ១ ម៉ឺននាក់» របស់មូលនិធិគន្ធបុប្ផាកម្ពុជា

បានផុស

១២ ខែ មុន

នៅ

ថ្ងៃអង្គារ ២០ ឧសភា ២០២៥

ដោយ

លោកជំទាវបណ្ឌិត ពេជ ចន្ទមុនី្ន ឧត្តមភរិយា សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានអំពាវនាវដល់ប្រជាពលរដ្ឋខ្មែរ និងសប្បុរសជន គាំទ្រយុទ្ធនាការ «១ ម៉ឺនរៀល ១ ម៉ឺននាក់» របស់មូលនិធិគន្ធបុប្ផាកម្ពុជា ដែលក្នុងមួយថ្ងៃៗ បានជួយអាយុជីវិតកុមារកម្ពុជាជាច្រើននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«កុមារទាំងអស់នេះ កំពុងតស៊ូជាមួយនឹងជំងឺកាចសាហាវ ក្រុមគ្រូពេទ្យ បានប្រឹងប្រែងជារៀងរាល់ថ្ងៃ ដើម្បីជួយសង្គ្រោះជីវិតកុមារទាំងអស់នេះ។ ពួកគាត់រង់ចាំការផ្តល់កម្លាំងចិត្ត និងការស្រលាញ់ពីលោកតា លោកយាយ អ៊ំ ពូ មីង ទាំងអស់។ សូមរួមគ្នា ដើម្បីផ្តល់ការស្រលាញ់ ផ្តល់ក្តីសង្ឃឹមដល់ចៅៗ និងក្មួយៗ ទាំងអស់គ្នាផង»។ ទាំងនេះគឺជាខ្លឹមសារលើដែលលោកជំទាវបណ្ឌិតសរសេរនៅលើបណ្ដាញសង្គមហ្វេសប៊ុកផ្ទាល់ខ្លួន។

លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ប្រធានកិត្តិយស នៃមូលនិធិគន្ធបុប្ផាកម្ពុជា បានផ្ដួចផ្ដើមបង្កើតមូលនិធិនេះឡើង ខណៈយុទ្ធនាការ «១ ម៉ឺនរៀល ១ ម៉ឺននាក់» ឆ្នាំ ២០២៥ មានរយៈពេល ១ ខែពេញ ដែលនឹងចាប់ផ្ដើមពីថ្ងៃទី ១ ដល់ថ្ងៃទី ៣០ ខែមិថុនា ឆ្នាំ ២០២៥ ដោយលោកជំទាវបណ្ឌិត នឹងផ្តល់កិត្តិយសអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីបើកយុទ្ធនាការនេះ នៅព្រឹកថ្ងៃទី ១ ខែមិថុនា ឆ្នាំ ២០២៥ នារាជធានីភ្នំពេញ។

យុទ្ធនាការ «១ ម៉ឺនរៀល ១ ម៉ឺននាក់» ជាយុទ្ធនាការប្រចាំឆ្នាំដ៏សំខាន់មួយរបស់មូលនិធិគន្ធបុប្ផាកម្ពុជា រៀបចំឡើងដើម្បីចូលរួមអបអរសាទរ ទិវាកុមារអន្តរជាតិ ១ មិថុនា និងបំផុសស្មារតី «ខ្មែរជួយខ្មែរ» ក៏ដូចជាការរម្លឹកឱ្យមានការចូលរួមបរិច្ចាគជូនមូលនិធិគន្ធបុប្ផាកម្ពុជា ព្រមទាំងដើម្បីផ្សារភ្ជាប់ ក៏ដូចជាបង្កើនសកម្មភាពកាន់តែជិតស្និទ្ធជាមួយក្រសួង-ស្ថាប័ន និងរដ្ឋបាលរាជធានី-ខេត្ត ដែលបានបង្កើតគណៈកម្មការទ្រទ្រង់មូលនិធិគន្ធបុប្ផាកម្ពុជា , ក្រុមហ៊ុន-សហគ្រាស ដែលបានចុះអនុស្សរណៈយោគយល់គ្នាជាមួយមូលនិធិគន្ធបុប្ផាកម្ពុជា , ព្រមទាំងភាគីពាក់ព័ន្ធនានា ក្នុងគោលបំណងនាំភាពញញឹម និងក្តីសង្ឃឹមដល់ទារក និងកុមារនៅកម្ពុជា។

តាមរយៈសេចក្ដីជូនដំណឹង មូលនិធិគន្ធបុប្ផាកម្ពុជា សូមអំពាវនាវដល់សាធារណជន , សប្បុរសជន , ក្រសួង-ស្ថាប័ន , ក្រុមហ៊ុន-សហគ្រាស , គ្រឹះស្ថានហិរញ្ញវត្ថុដៃគូ , តារាសម្តែង និងបុគ្គលមានប្រជាប្រិយ ព្រមទាំងអង្គភាព សារព័ត៌មានទាំងអស់ ជ្រាបជាព័ត៌មាន និងចូលរួមគាំទ្រផ្សព្វផ្សាយអំពីយុទ្ធនាការ «១ ម៉ឺនរៀល ១ ម៉ឺននាក់» ឆ្នាំ ២០២៥ នេះ ឱ្យបានទូលំទូលាយ , កាន់តែសកម្ម និងផុសផុល ដើម្បីរួមគ្នានាំភាពញញឹម និងក្តីសង្ឃឹមដល់ទារក និងកុមារ ព្រមទាំងស្ត្រីមានផ្ទៃពោះ នៅកម្ពុជា ក្នុងស្មារតី «ខ្មែរជួយខ្មែរ»។

ដើម្បីចូលរួមគាំទ្រ យុទ្ធនាការ «១ ម៉ឺនរៀល ១ ម៉ឺននាក់» ឆ្នាំ ២០២៥ សូមបរិច្ចាគតាមរយៈលេខគណនីរបស់មូលនិធិនៅគ្រឹះស្ថានហិរញ្ញវត្ថុទាំង ១៦ ដែលជាដៃគូ (ដូចមានក្នុងរូបភាពជូនភ្ជាប់) ឬតាមរយៈគណនីរបស់ មូលនិធិគន្ធបុប្ផាកម្ពុជា នៅធនាគារអេស៊ីលីដា លេខ ០០០១-០៣៤១២៧៣៨១៣ សម្រាប់ប្រាក់រៀល និង ០០០១-០៣៤១២៧៣៨២៤ សម្រាប់ប្រាក់ដុល្លារអាមេរិក ឬ តាមរយៈ QR Code ខាងក្រោមនេះ ៖