បទល្មើស​បម្រាម​គោចរ ត្រូវ​ពិន័យ​ជា​ប្រាក់​រហូត​ដល់​ជាប់​ពន្ធនាគារ

អ្នកដែលល្មើសបម្រាមគោចរ នឹងត្រូវពិន័យជាប្រាក់ រហូតទៅដល់ជាប់ពន្ធនាគារ។ នេះបើតាម លោក គឹម សន្តិភាព អ្នកនាំពាក្យក្រសួងយុត្តិធម៌បានឲ្យដឹងនៅថ្ងៃទី ០១ មេសានេះ។

លោក គឹម សន្តិភាព បានឲ្យដឹងថា ការមិនគោរពវិធានការរដ្ឋបាល នឹងប្រឈមការទទួល ទណ្ឌកម្មព្រហ្មទណ្ឌតាមមាត្រា១០ និងមាត្រា១១ ព្រមទាំងទណ្ឌកម្មរដ្ឋបាលបន្ថែមទៀតរួមមានការព្យួរឬដកហូតអាជ្ញាប័ណ្ណ វិញ្ញាបនបត្រ ឬលិខិតអនុញ្ញាតប្រកបអាជីវកម្ម ឬការបិទអាជីវកម្ម ដែលមានកំណត់ក្នុងច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត។

យោងតាមមាត្រា១០ នៃបទមិនគោរពវិធានការរដ្ឋបាលបានចែងថា មិនគិតដល់បទល្មើសព្រហ្មទណ្ឌដទៃទៀត អំពើដោយចេតនាមិនគោរពវិធានការរដ្ឋបាល ដែលបានដាក់ចេញស្របតាមច្បាប់នេះ ត្រូវទទួលពិន័យអន្តរការណ៍ ពី១​លាន​រៀល (១.០០០.០០០) ទៅ លានរៀល (៥.០០០.០០០) ប៉ុន្តែប្រសិនបើការមិនគោរពវិធានការរដ្ឋបាល ហើយបណ្តាលឲ្យចម្លងជំងឺកូវីដ១៩ ដល់អ្នកដ៍ទៃ នឹងត្រូវពិន័យ ជាប្រាក់ពី២លានរៀល (២.០០០.០០០) ទៅ ១០លានរៀល (១០.០០០.០០០)។

លោក គឹម សន្តិភាពឲ្យដឹងទៀតថា ប្រសិនបើអំពើនេះ ធ្វើឱ្យប៉ះពាល់ធ្ងន់ធ្ងរដល់សុខភាពសាធារណៈ នឹងត្រូវផ្តន្ទាទោសដាក់ពន្ធនាគារពី២ឆ្នាំ ទៅ ៥ឆ្នាំ និងពិន័យជាប្រាក់ពី ៥ លានរៀល(៥.០០០.០០០) រៀល ទៅ ២០លានរៀល​(២០.០០០.០០០)។

មាត្រា១១ នៃបទរារាំងដល់ការអនុវត្តវិធានការចែងថា អំពើរារាំងឬបង្កឧបសគ្គដោយចេតនាដល់​ ការអនុវត្តវិធានការដែលបានដាក់ចេញស្របតាមច្បាប់នេះ ត្រូវ ផ្តន្ទាទោស ដាក់ពន្ធនាគារពី៦ខែ ទៅ៣ឆ្នាំ និងពិន័យជាប្រាក់ពី២​លាន​រៀល(២.០០០.០០០)រៀលទៅ ១០លានរៀល​(១០.០០០.០០០)។

កាលបើអំពើខាងលើនេះបណ្តាល ឱ្យមានការចម្លងជំងឺ កូវីដ-១៩ ដល់អ្នកដទៃឬប៉ះពាល់ធ្ងន់ធ្ងរដល់សុខភាពសាធារ​ណៈនោះនឹងត្រូវ ផ្តន្ទាទោសដាក់ពន្ធនាគារពី២ឆ្នាំ ទៅ ៥(ប្រាំ)ឆ្នាំ និងពិន័យជាប្រាក់ពី៥លានរៀល (៥.០០០.០០០)​រៀល ទៅ ២០លានរៀល (២០.០០០.០០០)៕