តម្រូវការកសិផលកសិករក្នុងខេត្តបាត់ដំបងកើនឡើង ក្រោយបិទច្រកព្រំដែន

បណ្តាអាជីវករនៅ​ទីផ្សារ​នានា​ក្នុង​ក្រុង​បាត់ដំបង ការលក់ដូរបន្លែ ត្រី សាច់ចម្រុះ ដែលបាន​ដាក់តាំងលក់​ដើម្បី​បម្រើ​ដល់​ពលរដ្ឋ ដោយគ្មានការប្រឈម និង​ការខ្វះខាត ក្រោយ​មិនមាន​ការ​នាំ​ចូលពីប្រទេសថៃអស់រយៈជាង១ខែមកនេះ។

អ្នកស្រី ជិន បុប្ផា ជាអាជីវករបានលើកឡើងថា ការបិទច្រកព្រំដែនថៃ ដោយគ្មានការនាំចូល បន្លែ ត្រី សាច់ផ្សេងៗ គឺជាឱកាស​របស់​ប្រជាកសិករខ្មែរ​ដ៏​ប្រសើរបំផុត​សម្រាប់រកប្រាក់ចំណូល​ពីការលក់បន្លែចម្រុះ និងត្រី សាច់ បានយ៉ាងល្អប្រសើរ។ អ្នក ស្រីបន្តថា តម្លៃ​ក៏លក់មិនឡើងថ្លៃនោះដែរ មាន​តែការ​បន្ធូរបន្ថយ​លើ​តម្លៃ​ថែម​ទៀត ព្រោះ​កសិករម្នាក់​ៗ​សុទ្ធ​តែ​មាន​ដាំដំណាំ និង​បន្លែ​ស្ទើរ​គ្រប់​តាម​ដីលំនៅដ្ឋាន។

អ្នកស្រីបន្តថា”លើដីលំនៅដ្ឋានខ្ញុំ ក្នុងមួយថ្ងៃយ៉ាងហោច រកចំណូលបានចន្លោះពី ៥ទៅ ៧ម៉ឺនរៀល ក្នុងនោះ​ខ្ញុំប្រមូល​ផ្លែត្រប់ខ្លះ ត្រកួនខ្លះ ផ្លែក្រូចឆ្មាខ្លះ ត្រសក់ និងស្អំ​ជាដើម ហើយ​លក់ឆាប់​អស់ ព្រោះខ្ញុំលក់មិន ថ្លៃទេ ហើយ​បន្លែ​ទាំង​នោះ​ក៏ខ្ញុំមិន​ចំណាយ​ដើមទុនដែរ យើងត្រូវជួយសម្រួលជីវិភាពគ្នាទៅវិញទៅមក គឺ​ខ្ញុំ​សប្បាយ​ចិត្ត​ហើយ”។

សម្រាប់អ្នកស្រី បុប្ផា អ្នកស្រី​រីករាយសម្រាប់ជីវិតភាពប្រចាំថ្ងៃ តាមរយៈ​ការប្រមូលបន្លែ​​នៅលើដី​លំនៅដ្ឋាន​លក់ប្រចាំថ្ងៃ ដែលអាចរកចំណូលបានដោយមិននឹកស្មានដល់ ក្រោយការបិទនាំចូលពីប្រទេសថៃ។

អ្នកស្រីបន្តដោយរីករាយថា “បើសិន​ជាគ្មានការនាំចូលបន្លែ ត្រី សាច់ ពីប្រទេសថៃ ខ្ញុំគឹតថា ជីវិភាព​​អ្នកស្រុកយើង​បានប្រសើរ ជាងការបើក​ឱ្យមានការចូល ហើយ​ក្រុមគ្រួសារកូនៗខ្ញុំ ក៏ពួកគាត់​សប្បាយ​និងការលក់​ដូរបន្លែគ្រប់គ្នាដែរ ហើយដាក់លក់ក៏មិនយូរទេ គឺលក់អស់ៗតែម្តង”។

ងាកមកអ្នកស្រី ចាន់រ៉ា វិញ បាន​ឱ្យ​ដឹង​ថា ក្នុងរយៈ​ពេលប្រហែលជាជិត ២ខែ មកនេះ មាន​អាជីវករ​មក​ឱ្យអ្នកស្រីប្រមូលបេះផ្លែក្រូចឆ្មារាល់ថ្ងៃ ហើយប្រាក់កម្រៃក៏បានចូលរាល់ថ្ងៃសម្រាប់ចាយវាយប្រចាំថ្ងៃដែរ។

អ្នក​ស្រី បាន​អះអាង​ថា “បើគិតពីចំណូល ក្នុងមួយថ្ងៃៗបានច្រើនគួរសម កន្លងមកផ្លែក្រូច​ឆ្មា​ខ្ញុំ​ទុំជ្រុះចោលពាសពេញដី តែ​ក្រោយពីមានបញ្ហាព្រំដែន​មានគេមក​ឱ្យខ្ញុំបេះលក់ច្រើន ក្នុងមួយថ្ងៃៗ ដែល​ធ្វើ​ឱ្យ​ខ្ញុំដូចមានអារម្មណ៍សប្បាយចិត្ត ហើយ​បើថៃ​បាន​បិទរហូត​កាន់តែសប្បាយចិត្ត”។

បើតាមមន្ត្រីកសិកម្មខេត្ត ផលិតផលកសិកម្ម បន្លែ ផ្លែឈើ សម្រាប់ខេត្តបាត់ដំបង មិនមានការព្រួយបារម្ភនោះទេ ការ​ផ្គត់ផ្គង់​បានគ្រប់គ្រាន់ មានទាំងសហគមន៍ ទាំងនៅ​តាមលំនៅដ្ឋានរបស់ប្រជាពលរដ្ឋតាមភូមិនីមួយៗ ហើយ​សុទ្ធសឹងតែ​ជាបន្លែ​សរីរាង្គ​គ្មាន​សាធាតុគីមីទៀតផង។

ក្នុង​នោះ​ប្រជានេសាទ ជាលក្ខណៈ​គ្រួសារ ក៏ពួក​គាត់​រកត្រីសាច់​លក់លើទីផ្សារងាយ និង​រក​ចំណូល​បាន​ប្រសើរ ក្រោយ​ត្រី សាច់ គ្មាន​ការ​លួច​នាំ​ចូល​ដោយ​ឈ្មួញមួយ​ចំនួន កត្តា​ទាំងនេះ​អាច​ធ្វើ​ឱ្យសេដ្ឋកិច្ចរបស់​កសិករបានកើនឡើងគួរ​ឱ្យ​កត់សម្គាល់ តាមរយៈ​ការលក់​ផលិតផល​កសិម្ម ដូចជា​បន្លែ ត្រី សាច់ ក្នុងស្រុកដោយមិនប្រឈម និងការខ្វះខាតនោះទេ៕

អត្ថបទ÷សៅ សារិទ្ធ