ព័ត៌មានជាតិ

ឆមាសទី១ ឆ្នាំនេះ ខេត្តបាត់ដំបង ទទួលបានភ្ញៀវទេសចរសរុបជាង ៣៤ ម៉ឺននាក់

បានផុស

៩ ខែ មុន

នៅ

ថ្ងៃអង្គារ ២២ កក្កដា ២០២៥

ដោយ

អនុប្រធានមន្ទីរទេសចរណ៍ខេត្តបាត់ដំបង លោក ហម អរុណ បានគូសបញ្ជាក់ឱ្យដឹងថា នៅឆមាសទី១ ឆ្នាំ២០២៥ នេះ ខេត្តបាត់ដំបងទទួលបានភ្ញៀវទេសចរជាតិ និងអន្តរជាតិសរុបជាង ៣៤ ម៉ឺននាក់ ដែលចូលមកលេងកម្សាន្តនៅក្នុងខេត្តតាមរមណីយដ្ឋានទេសចរណ៍នានា។

ថ្លែងប្រាប់«កម្ពុជាថ្មី» នៅព្រឹកថ្ងៃទី២២ ខែកក្កដា ឆ្នាំ២០២៥ នេះ លោក ហម អរុណ បានឱ្យដឹងថា នៅឆមាសទី១ នេះ ខេត្តបាត់ដំបងទទួលបានភ្ញៀវទេសចរសរុបជាង ៣៤ ម៉ឺននាក់( ៣៤០ ៣៦១នាក់) កើនឡើង ៧,៧៣% បើធៀបទៅនិងរយៈពេលដូចគ្នានៅឆមាសទី១ ឆ្នាំ២០២៤ ដែលមានចំនួនជាង ៣១ ម៉ឺននាក់(៣១៥ ៩២៦នាក់)។ ក្នុងនោះភ្ញៀវទេសចរជាតិមានចំនួនជាង ៣២ ម៉ឺននាក់ (៣២២ ៣០៨នាក់) កើនឡើង ៧,៤៩% បើធៀបទៅនិងរយៈពេលដូចគ្នាកាលពីឆមាសទី១ ឆ្នាំ២០២៤ ដោយឡែកភ្ញៀវទេសចរអន្តរជាតិ មានចំនួនជាង ១ ម៉ឺននាក់ (១៨ ០៥៣នាក់) កើនឡើង ១២,៣៣% ធៀបទៅនិងរយៈពេលដូចគ្នាកាលពីឆ្នាំ២០២៤។

ទន្ទឹមនេះ លោក ហម អរុណ ក៏បានបញ្ជាក់ដែរថា ពាក់ព័ន្ធបញ្ហាព្រំដែនកម្ពុជា-ថៃ នៅតាមបន្ទាត់ព្រំដែន យើងឃើញថា បញ្ហាប្រឈមដែលប្រឈមខ្លាំងនៅខាងភូមិភាគ២ របស់ប្រទេសថៃ ដោយសារតែខេត្តបាត់ដំបង ពោធិ៍សាត់ កោះកុង ស្ថិតនៅព្រំប្រទល់ភូមិភាគ៣ ដូច្នេះបញ្ហាប្រឈមខ្លាំងមិនប៉ះពាល់ដល់ខេត្តបាត់ដំបងនោះទេ។

លើសពីនេះទៀត អ្វីដែលសំខាន់នៅឆ្នាំនេះ ទុរេនប្រមូលបានល្អ ច្រើនលើសពីឆ្នាំមុន ដូច្នេះយើងថា នៅពេលចុងសប្តាហ៍ឃើញថា មានភ្ញៀវទេសចរជាច្រើននៅតែទៅលេងចម្ការទុរេនជាប្រក្រតី ឬអាចនិយាយបានថា មានការកើនឡើងជាមុន ព្រោះនៅមួយរយៈចុងក្រោយនេះមានការរៀបចំសិក្ខាសាលានៅបាត់ដំបងច្រើនជាងឆ្នាំមុន និងមានខ្សែទស្សនកិច្ចរបស់និស្សិតចូលមកខេត្តបាត់ដំបងមានច្រើនផងដែរ។

ហេតុដូចនេះ អាចនិយាយថា បើទោះបីជាមានបញ្ហាព្រំដែនរវាង កម្ពុជា និងថៃ ក៏ពិតមែន ប៉ុន្តែសម្រាប់ខេត្តបាត់ដំបងមិនមានការប្រឈមខ្លាំង ដូចខេត្តជាប់និងភូមិភាគ២ នៃប្រទេសថៃទេ។ មួយវិញទៀត ព្រំដែនរបស់ខេត្តបាត់ដំបង ទៅកាន់ព្រំដែនមានរយៈចម្ងាយឆ្ងាយ ដូច្នេះវាមិនមានជាបញ្ហាប្រឈមនោះទេ ហើយសូម្បីតែភ្ញៀវទេសចរដែលមកលេងខេត្តបាត់ដំបងផ្ទាល់ ក៏មិនព្រួយបារម្ភរឿងបញ្ហាសង្រ្គាមដូចគ្នាដែរ នៅតែបន្តមកទស្សនកិច្ចនៅក្នុងខេត្តបាត់ដំបងដដែល ថ្វីត្បិតតែមិនមានភាពអ៊ូអរដូចរដូវកាលគ្មានភ្លៀងក្តី ប៉ុន្តែនៅតែមានភាពអ៊ូអរនៅក្នុងក្រុងបាត់ដំបង។

លោកថា ប្រសិនយើងធ្វើការប្រៀបធៀបទៅនិងឆ្នាំមុន ឆ្នាំ២០២៥នេះ នៅតែជាឆ្នាំដែលមានសញ្ញាវិជ្ជមានសម្រាប់កំណើនភ្ញៀវទេសចរ ហើយក៏មានអាជីវកម្មថ្មីៗមួយចំនួនដែលបានបើកដំណើរការនៅក្នុងខេត្តដើម្បីស្វាគមន៍កំណើនទេសចរផងដែរ។

សូមជម្រាបថា នៅក្នុងខេត្តបាត់ដំបងគិតមកដល់ពេលបច្ចុប្បន្ននេះ មានសណ្ឋាគារសរុបចំនួន ៤៩កន្លែង, ផ្ទះសំណាក់សរុបចំនួន ១១២ ទីតាំង ភោជនីយដ្ឋានសរុបចំនួន ២០៩ កន្លែង នៅទូទាំងខេត្ត ព្រមទាំងមានអាជីវកម្មខ្នាតតូចជាច្រើនកន្លែងទៀតផងដែរ៕

ដោយ៖ ឌិន ថារី