ក្រុមការងារ​គ្រូពេទ្យ​ស្ម័គចិត្ត ​ឯកឧត្តម ហ៊ុន ម៉ានី​ ចុះ​ពិនិត្យ​ព្យាបាល​ជំងឺ និង​ចែក​ជូន​ឱសថ​ដល់​ជនភៀសសឹក​៥៤២នាក់

នា​ព្រឹក ថ្ងៃទី ៩ ខែ សីហា ឆ្នាំ ២០២៥នេះ មានក្រុម​គ្រូពេទ្យ​ស្ម័គចិត្ត របស់​ឯកឧត្តម ហ៊ុន ម៉ានី ១ក្រុម ក្នុងនោះមានវេជ្ជបណ្ឌិតនិងក្រុមគ្រូពេទ្យស្ម័គ្រចិត្ត បានចុះ​មកសហការជាមួយ​ក្រុមគ្រូពេទ្យមន្ទីរសុខាភិបាលខេត្តបន្ទាយមានជ័យ និងមន្ត្រីអាជ្ញាធរមូលដ្ឋាន យុវជនស្ម័គ្រចិត្ត ស. ស.យ.ក.ក បានចុះមកពិនិត្យព្យាបាលជំងឺ និងចែកជូនឱសថ ដល់ប្រជាពលរដ្ឋជាជនភៀសសឹក មកថ្នាក់នៅវត្តរលំជ្រៃ ក្នុង ស្រុក ថ្មពួក បាន ចំនួន ៥៤២នាក់ ស្រី៤៨៤នាក់ ការផ្តលសេវាទាំងអស់នេះដោយមិនគិតថ្លៃ។

លោកវេជ្ជបណ្ឌិត លេង ផាលី ប្រធានប្រតិបត្តិ ជ.ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានីបានប្រាប់អ្នកយកព័ត៌មានឲ្យដឹងថា ក្រុមការងារគ្រូពេទ្យស្ម័គចិត្ត របស់ឯកឧត្តម ហ៊ុន ម៉ានីចុះមកពិនិត្យព្យាបាលជំងឺ និងចែកជូនឱសថដល់ជនភៀសសឹកនេះ ដោយឥតគិតថ្លៃចាប់ពី ថ្ងៃទី០៨ ដល់ ថ្ងៃទី ១២ ខែសីហា ឆ្នាំ២០២៥ ក្នុងនោះមានពិនិត្យជំងឺទូទៅ និងចែកជូនឱសថទៅតាមអ្នកជំងឺដែលឈឺបានពិនិត្យរួច។

លោកវេជ្ជបណ្ឌិត លេង ផាលី បានប្រាប់អ្នកយកព័ត៌មាន​ឱ្យ​ដឹង​បន្ត​ទៀតថា​ ក្រុម​ការងារគ្រូពេទ្យស្ម័គចិត្ត របស់ឯកឧត្តម ហ៊ុន ម៉ានីចុះ ពិនិត្យព្យាបាលជំងឺ និងចែកជូនឱសថដល់ជនភៀសសឹកចំនួន ៥៤២នាក់​នៅ​វត្ត​រលំជ្រៃ​យ៉ាងសប្បាយរីករាយក្រៃលែង ហើយក្នុងនោះលោកបានមានប្រសាសន៍សំណេះ សំណាល និងនាំយក​នូវ​ការផ្តាំផ្ញើសាកសួរសុខទុក្ខពីសំណាក់ សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្ដេចមហាបវរធិបតី ហ៊ុន ម៉ាណែតនាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវ បណ្ឌិត ពេជ ចន្ទមុន្នី ហ៊ុន ម៉ាណែត  ជូនកងទ័ព គ្រួសារទ័ព និង​បង​ប្អូន​ប្រជាពលរដ្ឋ​ជា​ជនភៀសសឹក ក្នុងកម្មវិធីនោះផងដែរ។

លោកវេជ្ជបណ្ឌិត លេង ផាលី បានមានប្រសាសន៍​ឱ្យ​ដឹង​បន្ត​ទៀត​ថា ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ តែងតែ​គិតគូរ​យក​ចិត្ត​ទុក​ដាក់​ជា​មួយ​ប្រជាពលរដ្ឋគ្រប់ទីកន្លែង និងគ្រប់ ពេលវេលា និងបានថ្លែងអំណរគុណ​ដល់​អាជ្ញាធរ​គ្រប់លំដាប់ ថ្នាក់​នៃ​ស្រុកថ្ម​ពួកដែល​បាន​សម្របសម្រួលជូនពុកម៉ែ បងប្អូនប្រជាពលរដ្ឋ ជាជនភាសឹកមកស្នាក់នៅវត្តរលំជ្រៃនេះ បានមកពិនិត្យនិងព្យាបាលជំងឺទូទៅនិងផ្ដល់ឱសថជូនពួកគាត់ ពិនិត្យ ពិគ្រោះ និងព្យាបាលជំងឺដោយឥតគិតថ្លៃនេះ។

ពុកម៉ែ បងប្អូនប្រជាពលរដ្ឋជា​ជន​ភៀសសឹក កងទ័ព និង​គ្រួសារកងទ័ព  ដែល​បាន​អញ្ជើញមកទទួលការពិនិត្យ និងព្យាបាលជំងឺ នា​ពេលនេះ​សុទ្ធ​តែ​បាន​បង្ហាញ​នូវភាពសប្បាយរីករាយ កម្មវិធី​ក្រុម​ការងារ​គ្រូពេទ្យស្ម័គចិត្ត របស់ឯកឧត្តម ហ៊ុន ម៉ានីបានចុះពិនិត្យ ពិគ្រោះ​ព្យាបាលជំងឺដោយឥតគិតថ្លៃនៅតាមបណ្តោយព្រំដែន និង​តំបន់​ដាច់ស្រយាល ជាច្រើនគោលដៅរួចមកហើយ នេះ​គឺ​ជា​ការរួមចំណែកកាត់បន្ថយលើ​ការចំណាយរបស់បងប្អូនប្រជាពលរដ្ឋ​ជន​ភៀសសឹក និង​គ្រួសារ​កងទ័ព បានច្រើនសម្រាប់ការ​ថែទាំសុខភាពប្រចាំថ្ងៃផងដែរ។

គួរ​បញ្ជាក់​ផងដែរ​ថា ឱសថទាំងនេះដែលយកមកពិនិត្យ​និង​ព្យាបាល​ចែក​ជូន ដល់​ជនភៀសសឹកចំនួន ៥៤២នាក់នៅវត្តរលំជ្រៃនេះបាន​មក​ពីសប្បុរសជនចូលរួមឧបត្ថម្ភ​ជាប្រាក់ទិញឱសថទាំងអស់នេះ៕

ដោយ ៖ វ៉ាន់ ណាង