លោក ឃួង ស្រេង ណែនាំ​ឱ្យ​អាជ្ញាធរ​និង​កងកម្លាំង បន្តរក្សាសន្តិសុខ ជា​មួយ​នឹង​ការ​លុប​បំបាត់ក្មេងទំនើង

លោក ឃួង ស្រេង សមា ជិក គណៈកម្មាធិការកណ្តាល គណបក្សប្រជាជនកម្ពុជា​និងជាប្រធានគណៈកម្មាធិការគណបក្សរាជធានីភ្នំពេញបានណែនាំឱ្យអាជ្ញាធរនិងកងកម្លាំងចំណុះឱ្យគណៈបញ្ជាការឯកភាពខណ្ឌ បន្តរក្សាសន្តិសុខ សុវត្ថិភាពជូនប្រជាពលរដ្ឋឱ្យកាន់តែល្អថែមទៀត ជាមួយនិងការលុបបំបាត់ក្មេងទំនើងនៅក្នុងមូលដ្ឋាន ដើម្បីជាជំនឿទុកចិត្តពីភ្ញៀវជាតិ អន្តរជាតិ បានមកទេសចរណ៍នៅស្រុកយើងកាន់តែច្រើនថែមទៀត។

ការ​ណែនាំ​របស់លោក ឃួង ស្រេង បែបនេះបានធ្វើឡើង នាវេលាម៉ោង៥និង៣០នាទីល្ងាចថ្ងៃទី១៨ សីហាឆ្នាំ២០២៥នេះ ក្នុង​ពិធី​សំណេះសំណាលជាមួយសមាជិក សមាជិកា​គណបក្សប្រជាជនកម្ពុជា សង្កាត់ផ្សារថ្មីទី១ ខណ្ឌដូនពេញ នៅទីស្នាក់ការគណបក្សប្រជាជនកម្ពុជាខណ្ឌដូនពេញ ដោយមានការចូលរួមពី លោកជា ខេមា ប្រធានគណៈកម្មាធិការ គណបក្សប្រជាជនកម្ពុជាខណ្ឌដូនពេញ។

លោក ឃួង ស្រេង បានលើកឡើង​ថា បញ្ហា​សន្តិសុខ សុវត្ថិភាព វាជា​រឿង​សំខាន់​សម្រាប់​មនុស្ស​គ្រប់​រូប ដូច្នេះទេ លោកស្នើឱ្យអាជ្ញាធរនិងកងកម្លាំងចំណុះឱ្យគណៈបញ្ជាការឯកភាពខណ្ឌ បន្តរក្សាសន្តិសុខ ឱ្យកាន់តែល្អបន្ថែមទៀត ជា​មួយ​និង​ការ​លុប​បំបាត់​ក្មេងទំនើងឱ្យអស់ពីក្នុងមូលដ្ឋាន។ ដោយសារតែ នៅរាជធានីភ្នំពេញមានសន្តិសុខ សុវត្ថិភាពល្អប្រសើរនេះហើយ ទើបបានធ្វើឱ្យផ្លូវថ្មើរជើងចតុមុខ (Walk Street) ទទួលបានការពេញនិយម ពីភ្ញៀវជាតិនិងអន្តរជាតិមកដើរលេងកំសាន្តយ៉ាងច្រើនកុះករ។ បើ​ប្រទេសយើងអសន្តិសុខ ភ្ញៀវបរទេស គេមិនមកលេងប្រទេសយើងទេ។

លោកឃួង ស្រេងបានបន្តទៀតថា ចាប់ពីថ្ងៃទី២៤ដល់២៨ កក្កដាកន្លងមកនេះ សម្តេច​អគ្គមហាសេនាបតីតេជោ ហ៊ុន សែន ប្រធាន​គណបក្សប្រជាជនកម្ពុជា​និង​បន្តមកសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី មិនបានដេកពួនទេ គឺ​អង្គុយនៅចាំបញ្ជាកងទ័ពជួរមុខនិងរិះរកគ្រប់មធ្យោបាយ ដើម្បីឈានទៅបញ្ចប់សង្រ្កាមជាមួយចោរឈ្លានពានថៃ។

លោកឃួង ស្រេង បានបន្តទៀតថា ក្នុងការប៉ះទង្គិចគ្នារយៈពេល៥ថ្ងៃជាមួយទាហានឈ្លានពាន បើទោះបីកម្ពុជាយើងទន់ខ្សោយជាងថៃ ទាំងកម្លាំងទ័ព ទាំងអាវុធនិងសេដ្ឋកិច្ចយ៉ាងណាក៏ដោយ តែកងទ័ពកម្ពុជាយើង មានទឹកចិត្តយ៉ាងមុះមុត អង់អាចក្លាហាន ដោយឈរការពារបូរណភាពទឹកដីរបស់យើង បានយ៉ាងរឹងមាំ មិនបានបាត់បង់ឡើយ។ ភាពអង់អាចក្លាហានរបស់កងទ័ពជួរមុខ គឺបានកើតឡើង ដោយបងប្អូនប្រជាពលរដ្ឋជួរក្រោយរួមគ្នាជាធ្លុងមួយ ជួយដល់កង់ទ័ពជួរមុខតាមរយៈការលើកទឹកចិត្ត តាមរយៈការផ្តល់ជំនួយយ៉ាងច្រើនសន្ធឹកសន្ធាប់ទៅជួរមុខ គឺស្មារតីជាតិខ្មែរតែមួយ។

លោក ឃួង ស្រេង បានបន្តទៀតថា គណបក្សប្រជាជនកម្ពុជាមានថ្នាក់ដឹកនាំដ៏ឆ្នើមនោះ គឺសម្តេចអគ្គមហាសេនាបតីតេជោ ហ៊ុន សែន និងបន្តមកសម្តេចមហាបវរធិបតី ហ៊ុន ម៉ាណែត ។ប្រទេសជាតិមិនទាន់មានសង្ក្រាម មិនទាន់ដឹងច្បាស់ទេ តែនៅពេលប្រទេសមានសង្គ្រាមជាមួយថៃទើប ដឹងច្បាស់ថា ប្រទេសកម្ពុជាយើង មិនអាចខ្វះបានសម្តេចទាំងទ្វេជាដាច់ខាត់។

លោកឃួង ស្រេង បន្តទៀតថា ដើម្បីឱ្យកម្ពុជាសម្រេចបាននូវចក្ខុវិស័យ ក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ ២០៣០ និងក្លាយជាប្រទេសមានចំណូលខ្ពស់ នៅឆ្នាំ ២០៥០ យើងត្រូវពង្រឹងខ្លួនឯងឱ្យបានរឹងមាំ ដោយចោរឈ្លានពានសៀម វាមិនចង់ឱ្យយើងដើរទៅដល់ចំណុចនេះទេ សមាជិក សមាជិកាយើងទាំងអស់ត្រូវដឹងឱ្យច្បាស់ពីរឿងនេះ។

ជា​មួយ​គ្នា​នោះ លោក ឃួង ស្រេង ក៏បានថ្លែងនូវការអរគុណចំពោះ គណបក្ស ខណ្ឌ សង្កាត់ ដែលបានរួមចំណែក ធ្វើឱ្យគ្រប់នៃការបោះឆ្នោតទទួល​ជ័យជំនះ​។ជាក់ស្តែង នៅឆ្នាំ២០២២, ២០២៣,ការបោះឆ្នោតព្រឹទ្ធសភា និងការបោះឆ្នោតក្រុមប្រឹក្សាខណ្ឌ រាជធានី គណបក្សប្រជាជនកម្ពុជាទទួលបានជ័យជំនៈរហូតផ្លូកទឹកផ្លូកដី។

ក្នុង​ឱកាស​នោះ លោក លោកស្រី ប្រធានភូមិនិងលោកចៅសង្កាត់ផ្សារថ្មីទី១ បាន​រាយការណ៍​ពី​សមិទ្ធផល​ការងារនិងកិច្ចការពារសន្តិសុខ សុវត្ថិភាពជូនប្រជាពលរដ្ឋ ជា​មួយ​និង​ការ​លើក​ឡើង​ពី​បញ្ហា​ប្រឈម​មួយចំនួនផងដែរ ដើម្បីរកគន្លឹះក្នុងការដោះស្រាយ ឈានទៅយកជ័យជំនៈក្នុងការបោះឆ្នោយនាឆ្នាំ២០២៧-២០២៨ខាងមុខនេះ។

លោកចៅសង្កាត់ផ្សារថ្មីទី១ បានលើកឡើងថា នៅសង្កាត់ផ្សារថ្មីទី១ មិនមានចលនាបក្សប្រឆាំងនោះទេ គឺមានតែក្នុងបណ្តាញសង្គមប៉ុណ្ណោះ។ ជាទិសដៅ របស់គណបក្សសង្កាត់ផ្សារថ្មីទី១ គឺខិតខំបំពេញចំណុចខ្វះខាត ចលនាបក្សផ្សេងៗ ឱ្យ​ចូល​មក​រួម​រស់​ជាមួយបក្សប្រជាជនកម្ពុជា បន្តការពារសន្តិសុខ សុវត្ថិភាពនិងបន្តការផ្តល់សេវាជូនប្រជាពលរដ្ឋឱ្យបានកាន់តែល្អជាងមុនថែមទៀត៕

ដោយ ៖ ស្រីរ័ត្ន