ព្រះអង្គម្ចាស់ ចក្រាវុធ នឹងចុះទៅមូលដ្ឋាន ដើម្បីប្រមែប្រមូល កម្លាំងគាំទ្រគណបក្សហ៊្វុនស៊ិនប៉ិច

គណបក្សហ៊្វុនស៊ិនប៉ិច នៅរសៀលថ្ងៃទី ៣០ ខែធ្នូ ឆ្នាំ ២០២១ បានប្រាព្ធពិធីជួបជុំ បូកសរុបលទ្ធផលការងារប្រចាំឆ្នាំរបស់ខ្លួន ក្រោមព្រះអធិបតីភាព ព្រះអង្គម្ចាស់ នរោត្តម ចក្រាវុធ ព្រះប្រធានស្តីទី គណបក្សហ៊្វុនស៊ិនប៉ិច នៅឯព្រះរាជដំណាក់វាលស្បូវ។ នៅក្នុងកិច្ចប្រជុំនេះ មានការអញ្ជើញចូលរួមពីសមា​ជិក-សមាជិកា របស់គណបក្សហ៊្វុនស៊ិនប៉ិចជាច្រើនរូប មកពី ២៥រាជធានី-ខេត្ត។

លោក ញឿន រ៉ាដែន​ អ្នកនាំពាក្យ នៃគណបក្សហ៊្វុនស៊ិនប៉ិច មានប្រសាសន៍ប្រាប់កម្ពុជាថ្មីថា នៅក្នុងកិច្ចប្រជុំនោះ ព្រះអង្គម្ចាស់ នរោត្តម ចក្រាវុធ បានព្រះបន្ទូលទៅកាន់ថ្នាក់ដឹកនាំ ប្រធានក្រុមការងារបោះឆ្នោត ប្រធានគណកម្មាធិការប្រតិបត្តិ ទាំង២៥ រាជធានី-ខេត្ត នូវក្តីកោតសរសើរ ដែលបានធ្វើការងារជូនគណបក្ស ប្រកបដោយប្រសិទ្ធិភាព ក្នុងរយៈពេល ១ឆ្នាំកន្លងមកនេះ។

ជាមួយគ្នានេះ ព្រះអង្គ ក៏បានសម្តែងនូវអំណរគុណ ចំពោះការចូលរួមនូវមរណៈទុក្ខ របស់សហជីវិន- សហជីវិនី និងសមាជិក-សមាជិកាទាំងអស់ ថ្វាយដល់ដួងព្រះវិញ្ញាណក្ខន្ធ សម្តេចក្រុមព្រះ នរោត្តម រណឫទ្ធិ ដែលព្រះអង្គបានយាងចូលព្រះទិវង្គត កាលពីពេលកន្លងមកនេះ។

បើតាមលោក ញឿន រ៉ាដែន គឺនៅក្នុងឱកាសនោះដែរ ព្រះអង្គម្ចាស់ នរោត្តម ចក្រាវុធ បានប្រកាសជាឱឡាឬកថា ព្រះអង្គ នឹងដឹកនាំគណបក្សហ៊្វុនស៊ិនប៉ិច ឲ្យទទួលបានជោគជ័យជាអតិបរិមា ហើយនឹងបន្តមាគ៌ា តាមព្រះលំអាន និងគោលនយោបាយ សីហនុនិយម រណឫទ្ធិនិយម ផងដែរ។

លើសពីនេះទៀត ព្រះអង្គម្ចាស់ ចក្រាវុធ ក៏នឹងចុះទៅមូលដ្ឋាន ដើម្បីប្រមែប្រមូល អ្នករាជានិយម កម្លាំងគាំទ្រជាម្ចាស់ឆ្នោត ដើម្បីរួមគ្នា ធ្វើឲ្យគណបក្សហ៊្វុនស៊ិនប៉ិច ជាកម្លាំងជាតិដ៏រឹងមាំ ហើយនិងបន្តចូលរួមថែរក្សា ការពារសន្តិភាព ស្ថេរភាព នយោបាយ និងការអភិវឌ្ឃន៍ ដែលជាសេចក្តីត្រូវការរបស់ប្រជារាស្ត្រ៕

អត្ថបទ៖ ឃួន សុភ័ក្រ