គ.ជ.ប ដោះស្រាយបណ្ដឹងពាក់ព័ន្ធបញ្ជីឈ្មោះបេក្ខជន ឈរឈ្មោះបោះឆ្នោតបានជាង ៣០បណ្ដឹងហើយ

គណៈកម្មាធិការជាតិរៀបចំការបោះឆ្នោត​ (គ.ជ.ប) បានដោះស្រាយពាក្យបណ្ដឹង ពាក់ព័ន្ធនឹងបញ្ជីឈ្មោះបេក្ខជនឈរឈ្មោះបោះឆ្នោតបានជាង ៣០បណ្ដឹងហើយ ដែលបានមកកាន់ គ.ជ.ប។ បណ្ដឹងភាគច្រើន គឺស្នើសុំឲ្យដកបេក្ខជនឈរឈ្មោះបោះឆ្នោត ដែលមិនចេះអាន និងសរសេរអក្សរខ្មែរ។

លោកបណ្ឌិត ហង្ស ពុទ្ធា សមាជិក និងជាអ្នកនាំពាក្យ គ.ជ.ប មានប្រសាសន៍ប្រាប់អ្នកសារព័ត៌មានកម្ពុជាថ្មី នៅថ្ងៃទី ២២ ខែមីនានេះថា មកដល់ពេលនេះ គ.ជ.ប បានដោះស្រាយបណ្ដឹងពាក់ព័ន្ធនឹង បញ្ជីឈ្មោះបេក្ខជនឈរឈ្មោះបោះ ឆ្នោតបានជាង ៣០បណ្ដឹងហើយ ដែលបានដាក់មក គ.ជ.ប។ ចំពោះបណ្ដឹងដែលនៅសល់នឹងត្រូវដោះស្រាយ ឲ្យបានរួចរាល់ក្នុងពេលឆាប់ៗនេះ។

តាមលោកបណ្ឌិត ហង្ស ពុទ្ធា បណ្ដឹងមានដាក់នៅគណៈកម្មការឃុំ-សង្កាត់, គណៈកម្មការរាជធានី-ខេត្ត, និងនៅគណៈ កម្មាធិការជាតិរៀបចំការបោះឆ្នោត (គ.ជ.ប)។ លោកថា «បណ្ដឹងមាននៅថ្នាក់ឃុំ-សង្កាត់ នៅថ្នាក់គណៈកម្មការរៀបចំការបោះឆ្នោត និងនៅថ្នាក់ គ.ជ.ប ដោយឡែកនៅថ្នាក់ គ.ជ.ប គឺបណ្ដឹងជាង ៣០បណ្ដឹង គឺបានមកដល់ ហើយ គ.ជ.ប កំពុងតែដោះស្រាយ និងគោរពទៅតាមប្រតិទិន នៃការដោះស្រាយពាក្យបណ្ដឹង»។

អ្នកនាំពាក្យ គ.ជ.ប បានបញ្ជាក់ថា បណ្ដឹងភាគច្រើនដែលមកដល់ គ.ជ.ប គឺប្ដឹងស្នើសុំឲ្យដកបេក្ខជនឈរឈ្មោះបោះ ឆ្នោត ដែលមិនចេះអាន និងសរសេរអក្សរខ្មែរ។ លោកបន្ថែមថា «បាទ! គឺបណ្ដឹងពាក់ព័ន្ធនឹងការស្នើសុំឲ្យដកឈ្មោះបេក្ខជន ចេញពីបញ្ជីឈ្មោះបោះឆ្នោត ជ្រើសរើសក្រុមប្រឹក្សាឃុំ-សង្កាត់ ដោយហេតុថា បេក្ខជនឈរឈ្មោះ នៃគណបក្សនយោបាយដែលរងបណ្ដឹងនោះ គាត់អត់ចេះអក្សរ អត់ចេះអាន និងសរសេរអក្សរខ្មែរ»។

លោកបណ្ឌិត ហង្ស ពុទ្ធា បានបញ្ជាក់ទៀតថា ប្រសិនបើនៅតែមានអ្នកប្ដឹង ពាក់ព័ន្ធនឹងបញ្ហាបញ្ជីបេក្ខ​ជនឈរឈ្មោះបោះឆ្នោតនោះ គឺការដោះស្រាយរបស់ គ.ជ.ប នឹងនៅតែបន្តធ្វើទៀត។ ប៉ុន្តែយ៉ាងយូរបំផុត បញ្ជីបេក្ខជនឈរឈ្មោះបោះឆ្នោត នឹងប្រកាសជាផ្លូវការនៅថ្ងៃទី ២៤ ខែមេសា ឆ្នាំ ២០២២ ខាងមុខនេះ។

សូមជម្រាបថា ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី ៥ នឹងត្រូវធ្វើឡើងនៅថ្ងៃទី ៥ ខែមិថុនា ឆ្នាំ ២០២២ ខាងមុខនេះ។ មានគណបក្សនយោបាយ ប្រមាណ ១៧គណបក្ស បានដាក់បេក្ខជនឈរឈ្មោះ ដើម្បីចូលរួមការប្រកួតប្រជែងការបោះឆ្នោតនេះ៕

អត្ថបទ៖ ឃួន សុភ័ក្រ