ព័ត៌មានជាតិ

អ្នកនាំពាក្យពន្យល់មូលហេតុដែលលោក ទេព នីថា នៅតែជាអគ្គលេខាធិការ គ.ជ.ប ដដែលបើទោះបីដាក់ឱ្យចូលនិវត្តន៍ក្ដី

បានផុស

១៦ វិនាទី មុន

នៅ

ថ្ងៃអង្គារ ៣០ មិថុនា ២០២៦

ដោយ

អ្នកនាំពាក្យគណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប លោក ហង្ស ពុទ្ធា បានបញ្ជាក់ថាលោក ទេព នីថា នៅតែបំពេញតួនាទីជាអគ្គលេខាធិការ គ.ជ.ប ដដែល បើទោះបីត្រូវបានព្រះមហាក្សត្រដាក់ឱ្យចូលនិវត្តន៍ហើយក្ដី។ លោកថាការដាក់ឱ្យចូលនិវត្តន៍គឺធ្វើតាមច្បាប់ស្តីពីសហលក្ខន្តិកៈមន្ត្រីរាជការស៊ីវិល តែគាត់នៅតែអាចបន្តជាមន្ត្រីជាប់កិច្ចសន្យានៃស្ថាប័ននេះបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហង្ស ពុទ្ធា បានបញ្ជាក់មកកម្ពុជាថ្មីថា ការបន្តការងាររបស់លោក ទេព នីថា និងមន្ត្រីមួយចំនួនទៀតដែលដាក់ឱ្យចូលនិវត្តន៍គឺដោយផ្អែកលើតម្រូវការចាំបាច់របស់ស្ថាប័ន។

លោកថា៖ «បន្ទាប់ពីចូលនិវត្តន៍គឺអ្នកចូលនិវត្តន៍នោះនៅមានតួនាទីនៅឡើយក្នុងនាមជាមន្ត្រីជាប់កិច្ចសន្យានៅក្នុងពេលខ្លីឬវែងតាមការតម្រូវការចាំបាច់របស់ស្ថាប័ន។ អ៊ីចឹងនៅក្នុងព្រះរាជក្រឹត្យទោះបីដាក់ឱ្យចូលនិវត្តន៍ក៏ដោយ គឺគាត់ផុតទទួលទានប្រាក់បៀវត្សក្នុងនាមជាអ្នករាជការ គ.ជ.ប. ហើយអ្វីដែលឃើញគាត់បន្តការងារគឺក្នុងនាមមន្ត្រីជាប់កិច្ចសន្យាឬក៏ជាសមាជិកនៃគណៈកម្មាធិការជាតិរៀបចំការបោះឆ្នោត»។

ក្រៅពីនេះលោក ហង្ស ពុទ្ធា បានបញ្ជាក់បន្ថែមថា មន្ត្រីគ.ជ.ប ដែលចូលនិវត្តន៍អាចក្លាយទៅជាទីប្រឹក្សា ឬជំនួយការរបស់គ.ជ.ប ដោយផ្អែកទៅលើតម្រូវការនៃការងារ។

គួរឱ្យដឹងផងដែរថា ប្រមុខរដ្ឋស្ដីទីកម្ពុជា សម្ដេចតេជោ ហ៊ុន សែន ក្នុងព្រះបរមនាម និងតាមព្រះរាជត្រាស់បង្គាប់បានសម្រេចដាក់អ្នករាជការ គ.ជ.ប ១០នាក់ ឱ្យចូលនិវត្តន៍ក្នុងឋានន្តរសក្ដិឧត្តមមន្ត្រី វរមន្ត្រី និងអនុមន្ត្រី នៃក្របខណ្ឌមន្ត្រីបោះឆ្នោតជាន់ខ្ពស់ចាប់ពីថ្ងៃទី១ ខែមិថុនា ឆ្នាំ២០២៦តទៅ ដោយក្នុងនោះក៏មានអគ្គលេខាធិការ គ.ជ.ប លោក ទេព នីថា ផងដែរ។

អគ្គលេខាធិការគណៈកម្មាធិការជាតិរៀបចំការបោះឆ្នោតលោក ទេព នីថា កើតនៅឆ្នាំ១៩៥៤ លោកបានកាន់តំណែងជាអគ្គលេខាធិការនៃស្ថាប័នបោះឆ្នោតជាតិនេះតាំងពីឆ្នាំ១៩៩៨មកដល់បច្ចុប្បន្ន៕

អត្ថបទដោយ ហ៊ុន សិរីវឌ្ឍន៍