ក្រុមអ្នកសង្កេតការណ៍អន្តរជាតិ CAPDI ៖ ការបោះឆ្នោតនៅកម្ពុជា មានភាពស្ងប់ស្ងាត់ សន្តិភាព និងអហិង្សា

ថ្លែងក្នុងសន្និសីទសារព័ត៌មាន នាព្រឹកថ្ងៃទី ៦ ខែមិថុនា លោក Dr Mohd Hatta Md. Ramil តំណាង​ក្រុមអ្នកសង្កេតការណ៍អន្តរជាតិ CAPDI បានលើកឡើង​ថា នៅក្នុងសកម្មភាពនៃការសង្កេតការបោះឆ្នោតក្រុមប្រឹក្សាឃុំ-សង្កាត់អាណត្តិទី ៥ នៅកម្ពុជានេះ ក្រុមការងាររបស់លោកបានជួបជាមួយអ្នកសង្កេតការណ៍ជាតិ តំណាងបេសកកម្មសង្កេតការណ៍របស់អង្គការអន្តរជាតិ និងអ្នកបោះឆ្នោត។ 

លោកថា នៅក្នុងការបោះឆ្នោតនេះ លក្ខខណ្ឌនានាត្រូវបានយកមកប្រើ ដើម្បីតាមដានការបោះឆ្នោត ពិនិត្យមើលភាពបើកចំហ សេរីភាព និងតម្លាភាព នៃដំណើរការបោះឆ្នោត។ បើតាមលោក Dr Mohd Hatta Md. Ramil នៅថ្ងៃបោះឆ្នោតគណៈប្រតិភូ បានទៅមើលនៅការិយាល័យបោះឆ្នោតភ្លាមៗ មុនពេលបើកដំណើរការ និងមើលបុគ្គលិក គ.ជ.ប រៀបចំដើម្បីធានាឲ្យដំណើរការបោះឆ្នោត បានត្រឹមត្រូវស្របតាមការប្ដេជ្ញាចិត្តរបស់អន្តរជាតិ។ 

គណៈប្រតិភូរបស់លោក បានកត់សម្គាល់ឃើញថា អត្រាអ្នកទៅបោះឆ្នោតមានភាពល្អប្រសើរ ហើយបុគ្គលិក គ.ជ.ប ក៏បានធ្វើការដោយភាពត្រឹមត្រូវ និងភាពស្មោះត្រង់ផងដែរ។ លោកថា ដើម្បីទទួលបានការយល់ដឹងច្រើនបំផុត អំពីដំណើរការបោះឆ្នោតនេះ គណៈប្រតិភូបានអនុវត្តសកម្មភាពសង្កេតការណ៍របស់ខ្លួន តាមការិយាល័យបោះឆ្នោតចំនួន ៦ នៅតាមតំបន់ផ្សេងៗ ក្នុងរាជធានីភ្នំពេញ និងស្រុកមុខកំពូល។ 

ជារួមក្រុមអ្នកសង្កេតការណ៍របស់អង្គការ CAPDI បានយល់ឃើញថា បរិកាសនៃការបោះឆ្នោតទាំង​មូលត្រូវបានកំណត់ថា មានភាពស្ងប់ស្ងាត់ សន្តិភាព និងអហិង្សា ហើយគណៈប្រតិភូមិនបានសង្កេតឃើញមានការតវ៉ាណាមួយ ដែលអាចប៉ះពាល់ដល់ដំណើរការ ឬលទ្ធផលនៃការបោះឆ្នោតឆ្នាំ ២០២២នោះទេ៕

អត្ថបទ៖ កោះកែវ