​ប្រើប្រាស់​ស្លាកលេខ​យានយន្ត​ ម៉ូតូ​ក្លែងក្លាយ​មានទោស​កម្រិតណា​?

ការក្លែងបន្លំ កើតមានឡើងច្រើនរូបភាព ដើម្បីទទួលបានផលប្រយោជន៍ មានបុគ្គលខិលខូចមួយចំនួន ហ៊ានប្រើមធ្យោបាយគ្រប់បែបយ៉ាង​ធ្វើ​រឿង​ខុសច្បាប់​ក្លែងបន្លំ​ឯកសារសាធារណៈ​។

ក្នុងចំណោមបទល្មើសក្លែងបន្លំឯកសារជាច្រើន ការក្លែងស្លាកលេខរថយន្ត ម៉ូតូ ក៏ត្រូវបានចាត់ចូលក្នុងបទក្លែងបន្លំឯកសារសាធារណៈ។

តើបុគ្គលដែលបានប្រើប្រាស់ឯកសារសាធារណៈក្លែងត្រូវទទួលទោសយ៉ាងណា?

តាមមាត្រា ៦២៩ នៃក្រមព្រហ្មទណ្ឌ បានឲ្យនិយមន័យថា «បទក្លែងបន្លំឯកសារសាធារណៈ»ថា គឺជាការក្លែងបន្លំដែលប្រព្រឹត្តនៅក្នុងលិខិតយថាភូត ឬការក្លែងបន្លំប្រព្រឹត្តនៅក្នុង​ឯកសារដែល​ចេញឱ្យ​ដោយរាជការសាធារណៈ ដើម្បីធ្វើការកត់សម្គាល់សិទ្ធិ អត្តសញ្ញាណ ឬឋានៈ ឬដើម្បីយល់​ព្រមផ្តល់ការអនុញ្ញាត នឹងត្រូវផ្ដន្ទាទោសដាក់ពន្ធនាគារពី ៥ (ប្រាំ) ឆ្នាំ ទៅ ១០ (ដប់) ឆ្នាំ។

ដោយឡែកចំពោះបុគ្គលដែលបានប្រើប្រាស់ឯកសារក្លែងដូចមានចែងក្នុងមាត្រា ៦២៩ ខាងលើ នឹងត្រូវផ្តន្ទាទោសដាក់ពន្ធនាគារពី ២ ឆ្នាំ ទៅ ៥ ឆ្នាំ និងពិន័យជាប្រាក់ពី ៤.០០០.០០០ (បួនលាន) រៀល ទៅ ១០.០០០.០០០ (ដប់លាន) រៀល ដោយស្របតាមមាត្រា ៦៣០ នៃក្រមព្រហ្មទណ្ឌពី «បទប្រើប្រាស់ឯកសារសាធារណៈក្លែង»។

បុគ្គលដែលបានដឹងរួចហើយថា ស្លាកលេខរថយន្តក្លែងក្លាយ ប៉ុន្តែនៅតែមាន​ចេតនាប្រើប្រាស់​ឯកសារសា​ធារណៈក្លែង​ទាំងនោះ ដើម្បីទទួលបាននូវប្រយោជន៍ណាមួយ ដោយមិនស្របច្បាប់ ដូច្នេះបុគ្គល​នោះនឹងត្រូវ​ផ្តន្ទាទោសទៅតាមមាត្រា ៦៣០ ខាងលើ ដែលមានចែងនៅក្នុងក្រមព្រហ្មទណ្ឌ នៃព្រះរាជាណាចក្រកម្ពុជា។

ដោយឡែកប្រសិនបើបុគ្គលនោះមិនបានដឹងថា ឯកសារទាំងនោះជាឯកសារសាធារណៈក្លែងទេ នោះជននោះមិនត្រូវបានផ្តន្ទាទោសឡើយ ដោយហេតុថា ជននោះមិនមានចេតនាក្នុង ការប្រព្រឹត្ត​បទ​ល្មើស ឬប្រើប្រាស់ឯកសារសាធារណៈក្លែងនោះទេ៕