ទីក្រុងហាណូយ ជួបគ្រោះរញ្ជួយដីកម្រិត ៤រ៉ិចទ័រ

វិទ្យាស្ថានភូគព្ភសាស្ត្រ បានឲ្យដឹងថា គ្រោះរញ្ជួយដីកម្រិត ៤រ៉ិចទ័រ បានវាយប្រហារសង្កាត់ My Duc ជាងក្រុងហាណូយ កាលពីព្រឹកថ្ងៃចន្ទទី២៥ខែមីនា បង្កការភិតភ័យដល់ប្រជាពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ VN Express, ការរញ្ជួយដីនេះ កើតឡើងនៅម៉ោង៨:០៥ព្រឹក និងមានជម្រៅប្រហែល១៦គីឡូម៉ែត្រ ហើយនាំឲ្យមានការរំញ័រជិត៥វិនាទី។

ទោះបីជាយ៉ាងណាក៏ដោយ គ្រោះរញ្ជួយដីនេះ មិនបង្កហានិភ័យនៃគ្រោះមហន្តរាយអ្វីទេ ហើយក្រុមមន្ត្រី ក៏បានចុះទៅពិនិត្យមើលតាមទីតាំង ដើម្បីវាយតម្លៃការខូចខាតផងដែរ។

នេះមិនមែនជារឿងថ្មីឡើយ ដែលប្រទេសវៀតណាម ជួបប្រទះការរញ្ជួយដី។ កាលពីថ្ងៃទី១៣ខែមករា គ្រោះរញ្ជួយដីកម្រិត២.៨រ៉ិចទ័រជាមួយជម្រៅ១០គីឡូម៉ែត្រ ក៏បានវាយប្រហារស្រុក Luong Son ក្នុងខេត្ត Hoa Binh ភាគខាងជើងផងដែរ។

សូមបញ្ជាក់ នៅប្រទេសវៀតណាម ការរញ្ជួយដីត្រឹមកម្រិតពី៤ទៅ៤.៩រ៉ិចទ័រ ត្រូវបានចាត់ថ្នាក់ថាជាការរញ្ជួយតូចតាច ដែលបង្កគ្រោះថ្នាក់តិចតួចបំផុតទាំងចំពោះសំណង់អគារនិងជីវិតមនុស្ស៕

អត្ថបទ៖ សុខ សុវណ្ណ

ចុចអាន៖ ទីក្រុងហាណូយ និងបាងកក សុទ្ធតែរង្គើ ដោយការរញ្ជួយដី