អ៊ុយក្រែន ថា រុស្ស៊ី កំពុងត្រៀមកម្លាំងទ័ព ១០ ម៉ឺននាក់សម្រាប់ការវាយ​លុកថ្មី

មេបញ្ជាការកងទ័ពជើងគោកអ៊ុយក្រែនបាននិយាយថា ប្រទេសរុស្ស៊ីកំពុងរៀបចំកម្លាំងទ័ពចំនួន ១០ ម៉ឺននាក់ដើម្បីប្រើសម្រាប់ការវាយលុកថ្មីទៅលើប្រទេសអ៊ុយក្រែននៅខែមិថុនានេះ ឬដើម្បីបំពេញបន្ថែមក្នុងអង្គភាពដែលបាត់បង់កងទ័ព ។ នេះបើយោងតាមការចេញផ្សាយរបស់សារពត៌មាន CNA កាលពីថ្ងៃទី២៤ ខែមីនាកន្លងទៅ ។

យោងតាមឧត្តមសេនីយឯក Oleksandr Pavliuk បានធ្វើអត្ថាធិប្បាយបែបនេះនៅលើកញ្ចក់ទូរទស្សន៍អ៊ុយក្រែន បន្ទាប់ពីការធ្វើបច្ចុប្បន្នភាពនាពេលថ្មីៗនេះលើចំនួនកងទ័ពរុស្ស៊ីនៅភាគខាងកើតអ៊ុយក្រែនជាង ២ ឆ្នាំមកនេះ ។​

លោកបន្ថែមថា ប្រទេសរុស្ស៊ីកំពុងរៀបចំកងទ័ពចំនួន ១០ ម៉ឺននាក់ដែលអាចត្រូវបានប្រើសម្រាប់ការវាយលុកថ្មីដែលអាចកើតមាននៅក្នុងប្រទេសអ៊ុយក្រែននារដូវក្តៅនេះ ឬដើម្បីបំពេញបន្ថែមក្នុងអង្គភាពដែលបាត់បង់កងទ័ព ។

ចំណែករដ្ឋមន្ត្រីការពារជាតិរុស្ស៊ីក៏បាននិយាយក្នុងសប្តាហ៍នេះផងដែរថា ទីក្រុងមូស្គូនឹងពង្រឹងផ្នែកយោធារបស់ខ្លួនដោយបន្ថែមទីបញ្ជាការកងទ័ពថ្មីចំនួន ២ អង្គភាព និងការបង្កើតថ្មីសរុបចំនួន ៣០ បន្ថែមទៀតនៅចុងឆ្នាំនេះ ។

គួរបញ្ជាក់ថា អ៊ុយក្រែនកំពុងប្រឈមមុខនឹងការខ្វះខាតគ្រាប់រំសេវកាន់តែធ្ងន់ធ្ងរឡើង ដោយសារការជាប់គាំងកញ្ចប់ជំនួយថ្មីនៅក្នុងសភាអាមេរិក បើទោះបីជាទីក្រុងកៀវសង្ឃឹមថា នឹងមានគ្រាប់រំសេវគ្រប់គ្រាន់នៅក្នុងខែមេសាក៏ដោយ ជាពិសេសគឺគំនិតផ្តួចផ្តើមដឹកនាំដោយប្រទេសឆេកដែលជាប្រភពគ្រាប់កាំភ្លើងធំ ៕

អត្ថបទ ៖ ប៊ុន សុភាព