ព័ត៌មានអន្ដរជាតិ

ចិន-ឥណ្ឌូណេស៊ី រួមបេសកកម្មជ្រមុជនាវាមុជទឹកបានជ្រៅបំផុតក្នុងកំណត់ត្រា

បានផុស

២ years មុន

នៅ

ថ្ងៃចន្ទ ២៥ មីនា ២០២៤

ដោយ

បេសកកម្មវិទ្យាសាស្រ្តរួមគ្នារវាងសភាវិទ្យាសាស្រ្តចិន CAS និងទីភ្នាក់ងារស្រាវជ្រាវ និងនវានុវត្តន៍ជាតិឥណ្ឌូណេស៊ី បានសម្រេចភាពជោគជ័យលើការជ្រមុជនាវាមុជទឹកបានជម្រៅ ៧,១៧៨ ម៉ែត្រនៅក្នុងតំបន់អន្លង់ Java នៃមហាសមុទ្រឥណ្ឌា ដែលនេះជាកំណត់ត្រាពិសោធវិទ្យាសាស្រ្តមុជទឹកជ្រៅជាងគេក្នុងប្រវត្តិសាស្រ្តឥណ្ឌូណេស៊ី ។ នេះបើតាមការចុះផ្សាយរបស់សារព័ត៌មានចិន ស៊ីនហួរ។

ដោយផ្អែកតាមការឲ្យដឹងពីក្រុមការងារស្រាវជ្រាវ បេសកកម្មរួមគ្នានេះបានប្រតិបត្តិការចាប់ពីថ្ងៃទី២៣ ខែកុម្ភៈ មកដល់ថ្ងៃទី២៣ ខែមីនា ឆ្នាំ២០២៤ ជាមួយនាវាមុជទឹកឈ្មោះ Fendouzhe របស់វិទ្យាស្ថានវិទ្យាសាស្រ្តមុជទឹក និងវិស្វកម្មនៃសភាវិទ្យាសាស្រ្តចិន ។

ក្រុមការងារក៏បានបន្ថែមដែរថា នាវាមុជទឹក Fendouzhe នេះគឺជាការសម្រេចបានសមិទ្ធិផលដំបូងគេ ដែលអាចផ្ទុកមនុស្ស និងបញ្ជាដោយមនុស្ស ទៅកាន់ទឹកជ្រៅប្រមាណជិត ១០,០០០ ម៉ែត្រនាបាតសមុទ្រ ។

ថ្លែងក្នុងព្រឹត្តិការណ៍ស្វាគមន៍បេសកកម្មខាងលើ លោកឯករដ្ឋទូតចិនប្រចាំនៅឥណ្ឌូណេស៊ី Lu Kang បានឲ្យដឹងថា “ចិន និងឥណ្ឌូណេស៊ី បានចូលរួមពង្រឹងសហការក្នុងការស្រាវជ្រាវវិស័យបាតសមុទ្រក្នុងប៉ុន្មានឆ្នាំចុងក្រោយនេះ ។ ខ្ញុំសង្ឃឹមថា ក្រុមអ្នកវិទ្យាសាស្រ្តទាំងពីរប្រទេសអាចសម្រេចបានលទ្ធផលស្រាវជ្រាវប្រកបដោយផ្លែផ្កា និងគុណភាពនាអនាគត ក៏ដូចជារួមចំណែកក្នុងសេដ្ឋកិច្ច និងការអភិវឌ្ឍដោយចីរភាព” ។

ចំណែកលោក Luhut Binsar Pandjaitan រដ្ឋមន្រ្តីទទួលបន្ទុកសម្របសម្រួលកិច្ចការសមុទ្រ និងការវិនិយោគ បានឲ្យដឹងដែរថា បេសកកម្មរួមគ្នានេះជាទំព័រថ្មីមួយសម្រាប់ប្រទេសទាំងពីរ ដើម្បីពង្រឹងកិច្ចសហការផ្នែកវិស័យសមុទ្រ ហើយសង្ឃឹមថា ប្រទេសទាំងពីរនឹងពង្រីកបន្ថែមកិច្ចសហការផ្នែកវិទ្យាសាស្រ្ត និងបណ្តុះបណ្តាលបង្កើតអ្នកវិទ្យាសាស្រ្ត និងវិស្វករជាច្រើនទៀត ពិសេសនៅឥណ្ឌូណេស៊ីតែម្ដង ៕

ដោយ៖ មាន រតនា