ប្រទះឃើញសពបុរសម្នាក់នៅក្នុងលូ ខណៈដែលពលរដ្ឋដើរកាត់ធុំក្លិនស្អុយ

សពបុរសម្នាក់ត្រូវបានគេប្រទះឃើញស្លាប់នៅក្នុងលូ រហូតមានក្លិនស្អុយទៅហើយ ខណ:ដែលប្រជាពលរដ្ឋដើរកាត់ហើយមានការសង្ស័យដោយសារតែក្លិននេះ។

បើតាមសាក្សីឈ្មោះ ណាន ភេទប្រុស អាយុ៤៧ឆ្នាំ រស់នៅភូមិអូរគគីរ ឃុំសិរីមានជ័យ ស្រុកសំពៅលូន ខេត្តបាត់ដំបង មានមុខរបរធ្វើចម្ការបាននិយាយថា កាលពីថ្ងៃទី១៦ ខែមីនា ឆ្នាំ២០២២ វេលាម៉ោង៥ និង២០នាទី ល្ងាចខ្លួនបានធ្វើដំណើរឆ្លងកាត់ទីតាំងខាងលើដែលមានលូបង្កប់កាតផ្លូវ ហើយបានធុំក្លិនស្អុយចេញពីក្នុងលូ ដោយមានការសង្ស័យថាមានអ្វីស្លាប់ក្នុងនោះ ក៏បាននាំគ្នាយកពិលចុចមើល ក៏បាន​ប្រទះឃើញសពមនុស្សម្នាក់នៅក្នុងលូនោះ ទើបមានការភ្ញាក់ផ្អើលតែម្តង។

ក្រោយពីទទួលដំណឹងនេះរួច នៅថ្ងៃទី១៧ ខែមីនា ឆ្នាំ២០២២ កម្លាំងជំនាញនៃអធិការរដ្ឋាននគរបាលស្រុកសហការជាមួយកម្លាំងជំនាញការិយាល័យបច្ចេកទេសចុះទៅធ្វើការពិនិត្យដល់កន្លែងកើតហេតុ។​ពេលទាញសពចេញមកដើម្បីពិនិត្យទើបដឹងថា សពមានឈ្មោះ ហាន វង់ ភេទប្រុស អាយុ៥១ឆ្នាំ មានទីលំនៅចំណុចកើតហេតុខាងលើ មុខរបរធ្វើចម្ការ បានដេកស្លាប់នៅក្នុងលូនោះ ដោយសារតែ ជនរងគ្រោះលូនចូលចាប់ត្រីបណ្តាលអោយឈ្លក់ទឹកស្លាប់ ម៉្យាងទៀតជនរងគ្រោះមានសតិមិនគ្រប់ធ្លាប់ផឹកស្រាស្រវឹងជាប្រចាំ ។ បច្ចុប្បន្នសពត្រូវបានសមត្ថកិច្ចប្រគល់ទៅអោយក្រុមគ្រួសារនាំយកទៅធ្វើបុណ្យតាមប្រពៃណីហើយ៕

អត្ថបទ៖ សោ និយមរ័ត្ន