ក្នុង​ខែ​មិថុនា ផ្ទុះ​​ឃាតកម្មគូស្នេហ៍ ២ ករណី បណ្តាល​ឲ្យ​ជនរងគ្រោះ​ស្លាប់ ២ នាក់

ក្នុង​ខែ​មិថុនា​នេះ មាន​សំណុំ​រឿង​ឃាតកម្ម​ពីរ​ករណី​កើត​ឡើង​​ផ្សេង​គ្នា​ដោយសារ​ភ្លើង​ប្រចណ្ឌ បង្ក​ឲ្យ​មាន​ការ​ភ្ញាក់ផ្អើល​និង​ការ​ចាប់អារម្មណ៍​ពី​សំណាក់​ប្រជាពលរដ្ឋ​។

ករណី​ទី​មួយ​កើត​ឡើង​បុរស​ម្នាក់​ដែលប្រភព​បញ្ជាក់​ថា​ជាមន្ដ្រីយោធា បាន​យក​កាំភ្លើង​បាញ់​ប្រហារ​ប្រពន្ធ បណ្ដាល​ឲ្យ​ស្លាប់​​ភ្លាមៗក្នុងថ្លុកឈាម។

ឃាតកម្ម​នេះ​កើត​ឡើង​នៅរសៀលថ្ងៃទី១០ ខែមិថុនា ឆ្នាំ២០២២នេះ ស្ថិតក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។ ខ្មាន់កាំភ្លើង​ត្រូវ​បាន​គេ​ស្គាល់​មាន​​ឈ្មោះ ជា អូន ខណៈជនរងគ្រោះជាប្រពន្ធឈ្មោះ នូ សុខនីតា។

បើ​តាម​ប្រភពបាន​បញ្ជាក់ថា ប្តី​ប្រពន្ធ​វ័យ​ក្មេង​ទាំង​ពីរ​​បានលែងលះបាន ៣ ខែ តែមិនទាន់ដាច់ស្រេច។ ​នៅ​ថ្ងៃ​កើត​ហេតុ អតីតប្តីបានទៅផ្ទះរបស់ប្រពន្ធ ហើយក៏បានកើត​ជាទំនាស់ពាក្យសម្តីឈ្លោះប្រកែកគ្នាខ្លាំង ដោយសារប្រចណ្ឌរឿង​អតីតប្រពន្ធមានសាហាយស្មន់ ដែលនាំឱ្យលែងលះ។

មុនឈានទៅ​សម្លាប់​ភរិយា អ្វី​គួរ​ឲ្យ​សង្វេគ​បុរស​ជា​ប្តី​បាន​ថត​វីដេអូ​ប្រពន្ធ​និង​កូន​នៅ​ក្នុង​បន្ទប់ទាំង​ទឹកមុខ​ភិតភ័យ​ ខណៈ​ប្រពន្ធ​បាន​ត្រឹម​អោប​កូន​ដែល​មាន​អាយុ​មិន​ដល់​ពីរ​ឆ្នាំ​ផងនោះ​។

បើតាមសេចក្តីរាយការណ៍ពី​សមត្ថកិច្ច​បាន​ឲ្យ​ដឹង​ថា ក្រោយបាញ់សម្លាប់ប្រពន្ធរបស់ខ្លួន ជន​សង្ស័យ​មានបំណងបាញ់សម្លាប់ខ្លួនឯង​ប៉ុន្តែគ្រាប់មិនផ្ទុះ។ ក្រោយ​កើត​ហេតុ​ សមត្ថកិច្ច​បានចុះ​ទៅ​ឃាត់​ខ្លួន​បុរស​ជា​ប្តី​​​ដើម្បី​សាកសួរ​និង​បន្ត​នីតិវិធី។

ដោយ​ឡែក​ករណី​ឃាតកម្ម​ទី​ពីរ​ដែល​ទើប​កើត​ឡើង​ប៉ុន្មានថ្ងៃ​មុន​នេះ គឺ​បុរសម្នាក់ដែលគេដឹងថាមានប្រពន្ធរួចទៅហើយ បាន​ទៅ​លួចបង្កាត់ភ្លើងស្នេហ៍ជាមួយស្រ្តី​ជា​អ្នកសាឡន ហើយដោយសារភ្លើងប្រចណ្ឌក៏រឹតកសម្លាប់នារីជាសង្សារ និងដេកឱបសពក្នុងបន្ទប់ជួល រហូតជះក្លិនស្អុយទៅខាងក្រៅទើបបែកការដល់អ្នកជិតខាងរាយការណ៍ប្រាប់សមត្ថកិច្ច។

ករណីនេះបានបង្កការភ្ញាក់ផ្អើលកាលវេលាម៉ោង១៩និង៣០នាទី ថ្ងៃទី២៣ ខែមិថុនា ឆ្នាំ២០២២ នៅចំណុចបន្ទប់ជួល ស្ថិតក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្ដសៀមរាប។

ការបែកធ្លាយករណីឃាតកម្មនេះ បន្ទាប់ពីប្រជាពលរដ្ឋរស់នៅក្បែរទីតាំងកើតហេតុ​បានរាយការណ៍ថា មានក្លិនស្អុយចេញពីបន្ទប់ជួលកើតហេតុ ទើបកម្លាំងសមត្ថកិច្ច​ចុះទៅដល់ទីតាំងបន្ទប់ជួល និងទម្លុះទ្វារបន្ទប់ចូលពិនិត្យ (បន្ទប់ចាក់សោរពីក្រៅ) ក៏ប្រទះឃើញសាកសពនារីរងគ្រោះគ្របភួយ និងជនសង្ស័យដេកក្បែរសាកសពតែម្ដង។

សមត្ថកិច្ចបានបញ្ជាក់ថា នារីរងគ្រោះមានឈ្មោះ ផា រដ្ឋា ភេទស្រី អាយុ២៦ឆ្នាំ មុខរបរអ្នកសាឡន មានស្រុកកំណើតនៅភូមិទ័ពជ័យ ឃុំបឹងមាលា ស្រុកស្វាយលើ ខេត្ដសៀមរាប។ ចំណែកជនសង្ស័យឈ្មោះ សេង គឹមហួរ ភេទប្រុស អាយុ២៧ឆ្នាំ ស្រុកកំណើត នៅភូមិអញ្ចាញ សង្កាត់នគរធំ ក្រុងសៀមរាប ខេត្ដសៀមរាប ទីលំនៅបច្ចុប្បន្ន ភូមិរលួសកើត ឃុំរលួស ស្រុកប្រាសាទបាគង ខេត្ដសៀមរាប (ត្រូវជាសង្សារជនរងគ្រោះ)។

តាមចម្លើយសារភាពរបស់ជនសង្ស័យបានប្រាប់ថា ខ្លួនពិតជាបានសម្លាប់ជនរងគ្រោះពិតប្រាកដមែន ដោយបានយកខ្សែរីដូវាំងនន រឹតក ជនរងគ្រោះបណ្ដាលឱ្យស្លាប់ដោយសារភ្លើងប្រចណ្ឌ៕