សន្តិសុខសង្គម

ស្ពានយោលមួយខ្សែ ក្នុងសង្កាត់បរយ៉ាខា ត្រូវទឹកជំនន់កួចដាច់ទាំងស្រុង បណ្តាលឲ្យពលរដ្ឋជាច្រើនគ្រួសារ ពិបាកក្នុងការធ្វើដំណើរ

បានផុស

៤ years មុន

នៅ

ថ្ងៃសៅរ៍ ៨ តុលា ២០២២

ដោយ

ប៉ៃលិន ៖ ស្ពានយោលដ៏សំខាន់មួយ របស់បងប្អូនប្រជាពលរដ្ឋ រស់នៅក្នុងសង្កាត់បរយាខា ក្រុងប៉ៃលិន ត្រូវទឹកជំនន់ កួចផ្តាច់ទាំងគ្រឹះ ហូរទៅតាមទឹក កាលពីវេលាម៉ោង ៧ យប់ថ្ងៃ ទី៧ ខែតុលា ឆ្នាំ២០២២ ស្ថិតក្នុងភូមិបរហ៊ុយជើង សង្កាត់បរយ៉ាខា ក្រុងប៉ៃលិន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពព័ត៌មានពីប្រជាពលរដ្ឋ បានលើកឡើងថា ចាប់តាំងពីវេលាម៉ោង៦ល្ងាច ថ្ងៃទី៧ ខែតុលា ភ្លៀងបានបង្ហូរធ្លាក់ខ្លាំង នៅផ្នែកខាងលើ មួយសន្ទុះស្រាប់តែមានទឹកជំនន់ ហូរមកយ៉ាងខ្លាំង បណ្តាលឲ្យជន់លិចកន្លែងកម្សាន្តមួយ តាមដងស្ទឹងបរយ៉ាខា ចំណែកស្ពានយោល ដែលប្រជាពលរដ្ឋ ធ្លាប់បើកបរ ឆ្លងកាត់ ក៏ត្រូវទឹកជំនន់ អួសទៅទាំងគ្រឹះធំៗ ចំណែកដែកទប់ ក៏ត្រូវដាច់ចេញពីគ្នាផងដែរ។

ប្រភពព័ត៌មាន បានបន្តទៀតថា មូលហេតុ ដែលធ្វើឲ្យស្ពានយោល ត្រូវទឹកគួចដាច់ទាំងស្រុងនេះ គឺបណ្តាលមកពីភ្លៀងខាងលើខ្លាំង ហើយនាំមកនូវសំរាម ឈើធំៗ មកជាប់និងសំណាញ់ដៃស្ពាន ទើបដាច់ទៅទាំងផ្ទាំងតែម្តង ។

ប្រភពព័ត៌មាន ក៏បានបញ្ជាក់ដែរថា ស្ពានយោលមួយខ្សែនេះ គឺពួកគាត់ ក៏ដូចជាអ្នកក្រៅភូមិ ធ្វើដំណើរទៅចំការ សិស្សសាលាឆ្លងកាត់ទៅរៀនសូត្រ ព្រោះមានតែស្ពាន់នេះទេ ដែលនៅជិត ក្នុងការឆ្លង បើសិនជាដាច់ដូច្នោះ គឺពួកគាត់នៅតំបន់នេះ ពិបាកក្នុងធ្វើដំណើរ ព្រោះមិនមានកន្លែង ដែលឆ្លងនោះទេ ។ ពួកគាត់ ក៏បានស្នើសុំអាជ្ញាធរខេត្ត មេត្តាជួយធ្វើស្ពានបណ្តោះអាសន្ន សម្រាប់ពួកគាត់ឆ្លងទៅមកផងដែរ។

សូមបញ្ជាក់ដែរថា នៅយប់ថ្ងៃទី៧ ខែតុលា ឆ្នាំ២០២២ លោកស្រី បាន ស្រីមុំ អភិបាលខេត្តប៉ៃលិន ក៍បានអំពាវនាវ ដល់បងប្អូនប្រជាពលរដ្ឋ ដែលមានលំនៅឋានជាប់ស្ទឹងបរយ៉ាខា បរតាំងស៊ូ ស្ទឹងតារាប សូមប្រុងប្រយ័ត្នឲ្យបានខ្ពស់ ព្រោះទឹកតាមដងស្ទឹង ដងអូរ មានការជន់ខ្លាំង ។ក្នុងលោកស្រីអភិបាលខេត្ត ក៏បានបញ្ជាឱ្យកម្លាំង និងអាជ្ញាធរចុះអន្តរាគមន៍ ទាំងយប់ ផងដែរ។ ទន្ទឹមនឹងនោះកម្លាំងអាជ្ញាធរ និងពិនិត្យអន្តរាគមន៍នៅកន្លែងផ្សេងៗ ទៀតដើម្បីដោះស្រាយបញ្ហានេះ ហើយប្រជាពលរដ្ឋត្រូវបង្កើន ការប្រុងប្រយ័ត្ន ជាពិសេសអ្នកមានកូនតូចៗមិនត្រូវបណ្តោយ លេងទឹកជាដាច់ខាត និងត្រូវការពារអនាម័យសុខភាព ព្រោះពេល នេះអាជ្ញាធរកំពុងចាត់វិធានការជួយសង្គ្រោះ ជាបណ្តើរហើយដែរ៕

អត្ថបទ ៖ សេង សុវណ្ណារិទ្ធ