អាជ្ញាធរខណ្ឌច្បារអំពៅ ណែនាំអ្នកលក់ដូរត្រូវបញ្ឈប់ការរំលោភចិញ្ចើមផ្លូវ

លោក ហ៊ត គឹមនី អភិបាលរងខណ្ឌច្បារអំពៅ ដោយទទួលបានបញ្ជាពីលោកអភិបាលខណ្ឌឲ្យដឹកនាំកម្លាំងចម្រុះចុះរៀបចំសណ្តាប់ធ្នាប់របៀបរៀបរយក្នុងមូលដ្ឋានខណ្ឌច្បារអំពៅ ខណៈដែលបងប្អូនប្រជាពលរដ្ឋមួយចំនួននៅតែបន្តរំលោភយកចិញ្ចើមផ្លូវដាក់លក់ឥវ៉ាន់។

តាមប្រភពពីលោក យី ធីរ៉ាត់ នាយករងរដ្ឋបាលសាលាខណ្ឌច្បារអំពៅ បានដឹងនៅព្រឹកថ្ងៃទី១៨ ខែតុលា នេះថា ខណៈដែលកម្លាំងចម្រុះកំពុងរៀបចំសណ្តាប់ធ្នាប់តាមបណ្តោយផ្លូវ៣៦៩ ក្នុងភូមិកណ្តាល សង្កាត់ច្បារអំពៅទី២ ខណ្ឌច្បារអំពៅរាជធានីភ្នំពេញ ថាមកដល់ថ្ងៃនេះ គឺអាជ្ញាធរបានចុះមកអនុវត្តន៍នូវលិខិតជូនដំណឹងដល់អ្នកលក់ដូរលើចិញ្ចើមផ្លូវដែលពុំគោរពតាមការជូនដំណឹងពីសាលាខណ្ឌ។

លោក យី ធីរ៉ាត់ បានបន្តថា អាជ្ញាធរមិនបានប្រើអំពើហិង្សាឡើយ គឺទុកពេលឲ្យបងប្អូនលោកស្មក្រ័ចិត្តរុះរើ ឬលើកឥវ៉ាន់ចូលលក់ខាងក្នុងចៀសវាងយកមកដាក់លក់លើចិញ្ចើមផ្លូវបង្កឲ្យប៉ះពាល់ដល់ការធ្វើដំណើរ។ ប្រជាពលរដ្ឋបាន សំដែង​នូវក្តីត្រេកអរពេលអាជ្ញាធរខណ្ឌច្បារអំពៅ ដែលចុះរៀបចំសណ្តាប់ធ្នាប់តាមបណ្តាសង្កាត់ទាំង៨ក្នុងមូលដ្ឋានខណ្ឌ ខណៈដែលកំណើនយានយន្តកើនឡើងដូចរាល់ថ្ងៃនេះ៕

អត្ថបទ៖ នរា