បើកទូកដឹកប្រពន្ធនិងកូនតូចទៅទិញឥវ៉ាន់​បុក​បង្គោលថ្មក្រឡាប់លិចបាត់កូនក្នុងទឹក

កុមារីអាយុ១ឆ្នាំកន្លះម្នាក់បានលង់ទឹកបឹងស្លាប់បន្ទាប់ពីជួបគ្រោះថ្នាក់ទូកបាឡាស្មាច់មួយគ្រឿងរបស់ឪពុក និងម្ដាយបានបើកបុកបង្គោលថ្មដីឡូត៍ដែលលិចទឹកក្នុងរដូវវស្សានៅចំណុចបឹងបួនមុំ ស្ថិតនៅក្នុងភូមិឧទុម្ពរ ឃុំគ្រាំងដីមាស ស្រុករលាប្អៀរ ។ ហេតុការណ៍គ្រោះថ្នាក់ខាងលើនេះបានកើតឡើងនៅម៉ោងប្រមាណ៩ព្រឹក ថ្ងៃទី១៨ ខែតុលា ឆ្នាំ២០២២ ។

លោក យី ភួន មេឃុំក្រាំងដីមាស បានឲ្យដឹងថា មុនពេលកើតហេតុគ្រួសារមួយដែលមានសមាជិក៣នាក់ឪពុក ម្ដាយ និងកុមារីជាកូនអាយុ១ខួបកន្លះ បានធ្វើដំណើរតាមទូកបាឡាស្មាច់១គ្រឿងចេញពីផ្ទះភូមិឧទ្ទុម្ពរ ឃុំក្រាំងដីមាស ដើម្បី​រកទិញឥវ៉ាន់នៅផ្សារ ។ លុះពេលត្រឡប់ទៅវិញ កំពុងធ្វើដំណើរតាមផ្លូវទឹកសុខៗស្រាប់តែទូកបាឡាស្មាច់បានទៅបុកជាមួយនឹងបង្គោលថ្មដីឡូត៍ពេញទំហឹង ធ្វើឲ្យទូកក្រឡាប់លិចទៅក្នុងទឹកទាំងអស់គ្នា ជាអកុសលម្ដាយក្មេងស្រីរងគ្រោះមិនចេះហែលទឹកក៏បានលែងកូនចោល ហេីយស្រវេស្រវាដើម្បីសង្គ្រោះខ្លួនឯង។ ពេលនោះឪពុកដែលជាអ្នកចេះហែលទឹកឃើញប្រពន្ធដូច្នេះក៏សម្រេចចិត្តទៅជួយសង្គ្រោះបានតែប្រពន្ធ ចំណែកកូនស្រីក៏បានលិចទៅក្នុងទឹកបាត់ ទម្រាំរាវរកឃើញកុមារីរងគ្រោះក៏បានស្លាប់បាត់ទៅហើយ។

ក្រោយពីទទួលបានព័ត៌មាននេះ ឯកឧត្តម ប៉ា សុខុម ប្រធានក្រុមការងារចុះមូលដ្ឋានឃុំក្រាំងដីមាស និងលោក យី ភួន មេឃុំក្រាំងដីមាស ព្រមទាំងសហការី បានចុះទៅជួបក្រុមគ្រួសារសព និងសម្ដែងនៅការអាណិតអាសូរ សោកស្ដាយយ៉ាងខ្លាំងចំពោះហេតុការណ៍ដ៏គួរឱ្យរន្ធត់នេះ និងបាននាំយកជាគ្រឿងឧបភោគបរិភោគ និងថវិកាចំនួន៥០ម៉ឺនរៀល ជាអំណោយរបស់ឯកឧត្តមបណ្ឌិតសភាចារ្យ អ៊ុក រ៉ាប៊ុន ប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង ជូនដល់គ្រួសារសព៕

អត្ថបទ៖ ឈៀងថារិទ្ធ