កម្លាំងនគរបាល នៃអធិការដ្ឋាននគរបាលខណ្ឌដង្កោ បានសហការជាមួយកម្លាំងការិយាល័យព្រហ្មទណ្ឌកំរិតធ្ងន់ នៃស្នងការដ្ឋាននគរបាលរាជធានីភ្នំពេញ កម្លាំងនាយកដ្ឋានព្រហ្មទណ្ឌក្រសួងមហាផ្ទៃ និងអធិការដ្ឋាននគរបាលស្រុកពញាឮ ខេត្តកណ្តាល បានធ្វើការស្រាវជ្រាវឃាត់ខ្លួនបានជនដៃដល់ដែលសម្លាប់ប្រពន្ធខ្លួនឯងបានហើយ បន្ទាប់ពីគេចខ្លួនបាន៣ថ្ងៃ។

សមត្ថកិច្ចបានឲ្យដឹងថា ជនដៃដល់មានឈ្មោះ គឹម សំអាន ភេទប្រុស អាយុ៥៤ឆ្នាំ មុខរបរកម្មករសំណង់ ស្នាក់នៅបន្ទប់ជួល ភូមិព្រៃវែងកើត សង្កាត់ព្រៃវែង ខណ្ឌដង្កោ រាជធានីភ្នំពេញ។ និងចាប់ខ្លួនបានត្រង់ចំណុចផ្លូវជាតិ​លេខ៥ ភូមិប្រក់ក្តារ ឃុំវិហារលួង ស្រុកពញាឮ ខេត្តកណ្តាល យកមកធ្វើការសាកសួរនាំនៅថ្ងៃទី៩ ខែធ្នូ ឆ្នាំ២០២២​នេះ។

សូមបញ្ជាក់ថា កាលពីថ្ងៃទី០៦ ខែធ្នូ ឆ្នាំ២០២២ វេលាម៉ោង១០និង៥០នាទី មានករណីប្រទះឃើញសពស្ត្រីម្នាក់ដេកស្លាប់ក្នុងបន្ទប់ជួលលេខ១ ភូមិព្រៃវែងខាងកើត សង្កាត់ព្រៃវែង ខណ្ឌដង្កោ រាជធានីភ្នំពេញ ដោយមានសភាពហើមស្អុយ និងមានចាក់សោខាងក្រៅ។

សមត្ថកិច្ចខណ្ឌដង្កាបានឲ្យដឹងថា ជនរងគ្រោះ(សព)ឈ្មោះ កង គា ហៅ អាឈី ភេទស្រី អាយុ៣៥ឆ្នាំ ជនជាតិខ្មែរមុខ​របរ​កម្មកររោងចក្រ មានស្រុកកំណើត ភូមិចុងអំពិល ឃុំចុងអំពិល ស្រុកកញ្ចៀច ខេត្តព្រៃវែង ស្នាក់នៅបន្ទប់ជួល ភូមិព្រៃវែងខាងកើត សង្កាត់ព្រៃវែង ខណ្ឌដង្កោ រាជធានីភ្នំពេញ។

ក្រោយពីពិនិត្យកោសល្យវិច័យលើសពជនរងគ្រោះ សមត្ថកិច្ចជំនាញបានបញ្ជាក់ថា ជនរងគ្រោះគឺស្លាប់ដោយសារថប់ដង្ហើម (ខ្ទប់មាត់ និងច្រមុះ)៕

អត្ថបទ៖ សុខា