នគរបាលខណ្ឌមានជ័យ មានចំណាត់ការភ្លាមៗ ក្រោយក្មេងទំនើង ១៣នាក់បង្ហោះម៉ូតូ នៅទីសាធារណៈ

ក្រុមក្មេងទំនើងចំនួន១៣នាក់ ប្រើប្រាស់ម៉ូតូចំនួន០៦គ្រឿង បង្ហោះម៉ូតូតាមផ្លូវសាធារណៈ កាលពីយប់ទាបភ្លឺ ថ្ងៃទី១៣ ខែឧសភា ឆ្នាំ២០២៣ ត្រូវបានកម្លាំងនៃអធិការដ្ឋាននគរបាលខណ្ឌមានជ័យ បានធ្វើការបង្រ្កាប និងឃាត់ខ្លួន។

កម្លាំងនៃអធិការដ្ឋាននគរបាលខណ្ឌមានជ័យ បានធ្វើការបង្រ្កាបក្រុមក្មេងទំនើងបង្ហោះម៉ូតូតាមផ្លូវសាធារណៈ នៅចំណុចភូមិទួលរកា៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ បានចំនួន១៣នាក់ និងឃាត់ម៉ូតូចំនួន០៦គ្រឿង ដែលបង្កភាពអនាធិបតេយ្យ តាមដងផ្លូវសាធារណៈ ហើយធ្វើឲ្យមានការរំខាន និងគ្រោះថ្នាក់ដល់អ្នកដទៃជាយថាហេតុ។ ចំណាត់ការភ្លាមៗនេះ ធ្វើឡើងតាមបទបញ្ជា និងការណែនាំរបស់លោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ។

ក្រោយឃាត់ខ្លួន ក្រុមក្មេងទំនើងទាំងនេះ ត្រូវបានសមត្ថកិច្ចយកមកធ្វើ​ការណែនាំអប់រំ ធ្វើកិច្ចសន្យា បន្ទាប់មកក៏ប្រគល់ជូនអាណាព្យាបាលយកទៅធ្វើការណែនាំអប់រំបន្ថែមទៀត ក្រោយពីសមត្ថកិច្ចអប់រំរួចបានប្រគល់ម៉ូតូឲ្យវិញ។

ករណីក្មេងទំនើងបង្ហោះម៉ូតូពេលរាត្រីនេះ កើតឡើងជាហូរហែនៅក្នុងរាជធានីភ្នំពេញ។ ប៉ុន្តែសមត្ថកិច្ច ក៏បានធ្វើការបង្ក្រាបជាបន្តបន្ទាប់ដូចភ្លៀងរលឹម ដើម្បីរក្សាសណ្តាប់ធ្នាប់សាធារណៈ និងសន្តិសុខសុវត្ថិភាពជូនដល់ប្រជាពលរដ្ឋ៕