៧ ខែឆ្នាំនេះរន្ទះបាញ់បណ្តាលឱ្យមនុស្សស្លាប់ និងរបួសជាង ១០០ នាក់

នៅក្នុងរយៈពេល ៧ ខែឆ្នាំ២០២៣ បាតុភូតរន្ទះបាញ់បានកើតឡើងចំនួន ១០០ លើកបណ្តាលឱ្យមនុស្សស្លាប់និងរបួសជាង ១០០ នាក់ខូចខាតផ្ទះ ៧ ខ្នងនិងងាប់គោក្របីជិត ៩០ ក្បាល។

លោកសុទ្ធគឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយមានប្រសាសន៍នៅព្រឹកថ្ងៃទី ០២ សីហានេះថា ចាប់ពីខែមករារហូតដល់ខែកក្កដានេះបាតុភូតរន្ទះបាញ់បានបណ្តាលឱ្យមនុស្សស្លាប់ចំនួន ៥៩ នាក់ រងរបួស ៤៥ នាក់ ខូចខាតផ្ទះ ៧ ខ្នងនិងងាប់គោក្របីចំនួន ៨៧ ក្បាល។

លោកបានបន្តថា ក្នុងចំណោមអ្នកស្លាប់និងរបួសជាង ១០០ នាក់នៅខេត្តកំពង់ធំមានច្រើនជាងគេដោយមានមនុស្សស្លាប់ ៨ នាក់របួស ៧ នាក់ បន្ទាប់មកខេត្តបាត់ដំបងស្លាប់ ៧ នាក់របួស ៣ នាក់ ខេត្តក្រចេះស្លាប់ ៧ នាក់របួស ៦ នាក់ខេត្តសៀមរាបស្លាប់ ៦ នាក់របួស ៦ នាក់និងខេត្តកំពង់ឆ្នាំងស្លាប់ ៥ នាក់របួស ១ នាក់។

លោកបានបន្តទៀតថាបាតុភូតរន្ទះបាញ់១០០ លើកក្នុងនោះនៅក្នុងខែកក្កដាឆ្នាំ ២០២៣ កើតឡើងចំនួន ១៨ លើកនៅតាមមូលដ្ឋាន ១១ ខេត្តបណ្តាលឱ្យមនុស្សស្លាប់ ១៣ នាក់ ស្រី ៣ នាក់រងរបួស ៦ នាក់ងាប់គោក្របី ១៦ ក្បាលនិងខូចខាតផ្ទះ ២ ខ្នង។

ចំណែកខែកក្កដាឆ្នាំ២០២២ វិញ បាតុភូតរន្ទះបាញ់កើតឡើងចំនួន ២០ លើកនៅតាមមូលដ្ឋានខេត្តចំនួន ១០ បណ្តាល​ឱ្យ​មនុស្សស្លាប់ចំនួន ១៤ នាក់ស្រី ៧ នាក់ក្មេង ១ នាក់ របួស ១០ នាក់ងាប់គោក្របី ១០ ក្បាលនិងខូចខាតផ្ទះ​ ៧ ខ្នង។

យោងតាមក្រសួងធនធានទឹកនិងឧត្តុនិយមបានឱ្យដឹងថាចាប់ពិថ្ងៃទី ០២ រហូតដល់ថ្ងៃទី ៨ សីហាឆ្នាំ ២០២៣ ប្រទេស​កម្ពុជា​អាចមានភ្លៀងធ្លាក់ពីតិចទៅបង្គួរ លាយឡំដោយផ្គរ រន្ទះ និងខ្យល់កន្ត្រាក់។ ចំណែកនៅលើផ្ទៃសមុទ្រនឹងមានខ្យល់បក់បោកខ្លាំង ព្រមទាំងរលកសមុទ្រមានកម្ពស់ខ្ពស់៕

អត្ថបទ៖ សំអឿន